شۆرهشا سپى
شۆرهشا سپى, پێناسا شۆرهشا سپى, واته ئهو شۆرهشا بێى خوین ڕێژتن دهێتهكرن, و ئێك ژهیمایێن شۆرهشا سپى گههشتنه ب ئارمانجان، بێى توندوتیژی بهێته بكارئینان, بهلێ دهربارهى زاڕاڤێ رهوشهنبیر، كو ههمى جاران بزاڤێ دكهم ل سهر بنڤێسم, ههمهجۆریا ڤى زاراڤى روى ب روى من دبیت, ئهرێ رهوشهنبیر كیه؟, و ئهو چ سالوخهت وسیمانه دڤێت ل دهف رهوشهنبیرى ههبن؟, و ئهو چ كارن كو پێدڤیه پێراببیت؟.
كهسێ رهوشهنبیر ههلوهستێن خوه ل سهر زانینێ ئاڤا دكهت, و بیروبۆچوونێن خوه ل سهر ههر تشتهكى ل دهوروبهرێن وى رووبدهن ب تایبهتى ل سهر كێش وبێشن گشتى ددهت.
مووسل باژێرهكێ مهزنه وب سهدان وبهلكو ب هزاران رهشهنبیرێن ئهكادیمى و كهسێن خودان پێگههێ جڤاكى و مامۆستایێن ئاینى وسهرۆكێن پارتێن سیاسى و بهرپرسێن رێكخراوێن جڤاكێ سڤیل و راگههاندكار تێدا ههنه, بهرپرسایهتیا پێشكێش كرنا بیروبۆچوون و رایا دكهڤیته سهر مللێن ڤان كهسان, چونكو ئهڤرۆكه ل مووسل گهلهك كار و بیروبۆچوون رووددهن و ل سهر كهسێن رهوشهنبیر پێدڤیه ب رهنگهكێ گشتى ب بیر و بۆچوونێن باش رازى ببن و یێن نهباش رهد بكهن, چونكو باژێر دێ كهڤیته بهر ههڤركیێن ناڤخوهیى یێن دژوار, ههكه دیتن و نێرینهكا سیاسى و رهوشهنبیریهكا ههڤكرتى نهبیت د ناڤبهرا رهوشهنبیرێن پارتێن سیاسى و بزاڤێن سیاسی یێن مووسل، دیسا ژبیر نهكهین هندهك مایتێكرنا سیاسى یێن ههبین ژ لایێ هندهك كهسێن خۆڤهنیساندى ل بهر باژێرى وخهلكێ وێ دهێنه كر, وئهو كهس دێ موسل پالدهن بۆ تشتهكى نهچاڤهرێ كرى ومهترسیدار, ههر چهنده ئهو كهسێن پیلانگێر دزانن ئهو كار ل سهر زهمینهكا نهخۆشكرى دكهن, ژ بۆ بهلاڤكرنا هزر و بیر و بۆچوون ورێنمایێن خوه, بهلێ ئهو بزاڤێ دكهن هزرێن خوه د ناڤ جڤاكی دا بهلاڤ بكهن ههر وهكو, (وى كهسێ گهنمى ل سهر بهڕهكى دچینیت), و ئهگهر ڕێ ل كارێ وان نههێته گرتن دێ د گهل كارێ وان بازنێ زیانێن مرۆڤى و كهرستهیێ (مادى) زێدهبن, دیسا قهیران و نهبوونا باوهریێ دێ د ناڤ پێكهاتێن پارێزگههێ دا زێده بیت, ههكه پێشهاتێن سیاسى یێن دووڤدا دهێن, د راستههێلا بهروڤاژی نهخشه و پلانێن وان نهچن, دێ جۆره پهككهفتن و لهنگیهك كهڤیته د ناڤ جڤاكی دا و نهشێت ل سهر وان ئاستهنگ و ئاریشێن د پێشهرۆژهكا نێزك دا دكهڤنه د رێیا وان دا زال ببن, نوكه باژێرێ مووسل و پارێزگهها نهینهوا ب ڕهنگهكێ گشتى, پێدڤى ب هشیاریهكا سیاسى و جڤاكى و ئابوورى و رهوشهنبیرى یا گشتگیره و ب شۆرهشهكا سپى ههیه, كو دهربرینێ ژ پێدڤیا جڤاكێ مووسلى و دیتنهكا نوو بكهت, و تێدا گۆشێن نێرینا مه بۆ كاران ب شێوهكێ راستتر و هوشمهندتر بگوهۆریت, ئهڤه دێ دهست پێ بكهت ب ئهنجامدانا دانوستاندنهكا شارستانى داكو وان ههمى نهرێنى و ههڤدژیێن د ناڤبهرا پێكهاتێن سیاسى و جڤاكى و رهوشهنبیرى د بحهلینیت, و كار ل سهر هندێ بكهت ئهو كونترۆل و زلم و زۆریا داعشێن تیرۆرست ئهنجامدایى ل ناڤ باژێرى ژناڤ ببهت, و بۆ ڤێ چهندێ دڤێت رهوشهنبیرى پشكداریهكا كارا د ئهڤێ شۆرهشا سپى یان رابوونا هزرى یا نێزك دا ههبیت, داكو بشێت كهرتێن جڤاكى بلڤینیت و ئاستێن وان یێن لێبۆرینێ و ههڤكاریا پێكڤه و پێكڤهژیانێ و برایهتیێ و ئێك چارهنڤێسێ بلندتر لێ بكهت و دانپێدانێ ب یێ بهرامبهر بكهت, و بۆ دهستڤهئینانا ڤێ چهندێ دڤێت پێنگاڤێن نهلڤ و ههڤسهنگ و پر باوهرى بهاڤێژیت, ئهڤه دێ مه بهرهڤ رۆژهڤهكا ئارامتر و تهناتر بهت, دێ چارهسهریا وان دووراتیى و ژێكڤهبوون و دهرهاڤێژێن داعشێ پهیدا كرین كهین, ههر وهسا ئهو سیاسهتا فێلباز و تاك لایهنه یا حوكمهتا فیدرال بهرى سالا 2014 پهیرهو دكر دێ ژ ناڤبهین. ل دهمێ ل دهروبهرێن مه ههمى تشت هاته گوهارتن, دێ ههمى قورسایى و گرنگێدان و سیستهمێن باش و هزر و بریار و ههتا داخوازی و دیتن و نێرینێن مه ژ بۆ پێشهڕۆژێ دهێنه گوهۆرین, ب ڤى ڕهنگى دێ باژێرێ خوه ئاڤهدان كهین ل سهر بنیاتهكێ موكم ودێ بهرڤ پێش مه هاندهت.
