شۆرەش ب گشتی یا خوش بوو هندەك جاران مرۆڤ دكەفتە نەخوشیان لێ ئەو ژی یا ب زەوق بوو
دیدار، سالار محەمەد دۆسكی:
پێشمەرگەیێ هەر دو شۆرەشێن ئیلۆن و گولانێ قادر تاها خالد زێوەیی ژ دایك بوویێ سالا 1954ێ یە ل گوندێ زێوا شێخ پیرامیس، بۆ رۆژنامەیێ بەحسێ كاودانێن وی سەردەمێ هاتنا پێشمەرگەی بۆ دەڤەرێ دكەت، و تایبەت ل سەر دەمێ سەركردایەتی یا پارتی دیموكراتی كوردستان یا بەروەخت.
پێشمەرگەیێ شۆرەشا گولانێ قادر تاها زێوەیی د دیدارەكێ دا ل گەل رۆژناما ئەڤرۆ گۆت: ل سالا 1976ێ هەر چ دەنگۆیێ پێشمەرگەی ل دەڤەرێ نەبوو و جارەكێ هندەك هەڤالێن مەیێن رێكخستی كو خەلكێ گوندێن(بابگوری و وەرمێلێ) هەبوون، و هاتنە دووف من ڕا و چووینە بەر خابیری وی دەمی (مستەفا مزیری) كادر بوو و ئەم گەهشتینە وی، ل وی دەمی دەنگۆ هەبوو كو سەركردایەتی یا بەروەخت هاتیە پێكئینان و چ بارەگا پێشمەرگەی نەبوون، و ئەم دناڤا گوندێن خەلكی دا بووین هەتا بارەگایەكێ پێشمەرگەی ل چەمانكێ هاتیە دروستكرن، و پشتی هەیڤەكێ مە جهێ خوە ڤە گوهاست و دووڤدا بۆ شەرێ ناڤخویی و مە ئەو ژی بەردا، ل دەسپێكێ بتنێ چالاكی بوون، پێشمەرگەی بوو نمونە دا ئەلغامەكێ بەرامبەر دوژمنی دان و گەلەك چالاكی نەدهاتنەكرن، و ئەگەر مە چالاكیەك ئەنجام ژی دا با ل دەڤەرا دۆسكیا دڤێت هەر وێ شەڤێ چووباینە چیایی، چونكە ل دەسپێكێ پێشمەرگە گەلەكێ كێم بوو ل دەڤەرێ و زێدەتر چالاكیێن پارتیزانی بوون، فەوجا سۆركی چ جاران پێشمەرگەی نە راكربوو و گەلەك یا گرنگ بوو، و هێرشا مە بۆ سەر وێ فەوجێ گەلەك دەنگ ڤەدا وی دەمی پێشمەرگەی گەلەك پێزانین نەبوون، و من دگۆتە هەڤالێن خوە ئەگەر (د. رۆژ نوری شاویس) ل گەل مرۆڤی بیت دێ مرۆڤ بۆچی ترسیت، وی دەمی خودێ ژێ رازی د.رۆژ قەناسەك د دەستی دا بوو و مرۆڤەكێ بهێز و ب جورعەت بوو، ل دەسپێكێ پێشمەرگەی هزرەكا مەزن بۆ ئەوێ فەوجێ دكر، و پشتی مە لێدای و هێرش مە بریە سەر گەلەك ب ساناهی و مورالەكا بلند مە شكاندن، وی دەمی د. رۆژ و سەید صالح چەم سەیدی هاتنە بەر سیمێ فەوجێ ئەگەر ئەوان چ شەر ژی نەكربان وی دەمی بتنێ هاتنا وان مورالەكا مەزن بوو، بۆ پێشمەرگەی و دەسپێكێ زەعیم عەلی هاڤێتنێ و دووڤدا ئەز و جەوهەر ئەردنی چووینە ناڤ فەوجێ و مە هێرش كر، وی دەمی زریپۆشەكا دوژمنی رەمی دكر و هەمان دەم من ئارپیچیەك هاڤێتێ و هەمی پێشمەرگەی و بێ جوداهی و ب سینگەكێ گەلەك مەزن پشكداری كر، و هاڤێتێ و ئێكسەر ئەو فەوج هاتە پاقژكرن و ئەڤە جارا ئێكێ بوو پێشمەرگە هێرشی ڤێ فەوجێ بكەت، و ئەڤێ هێرشێ گەلەك دەنگڤەدان ل شۆرەشا گولانێ و دەڤەرێ بگشتی هەبوو.
ل دور رۆژێن سەخت و دژوار ژی هەمان پێشمەرگەی گۆت: ل سالا 1981 ل نێزیك گوندێ زڤنگێ ل دەڤەرا دۆسكیا، وی دەمی چالاكیێن پێشمەرگەی ل ئەڤان دەڤەرا گەلەك كێم بوون، و جارەكێ ئەم چووین و ئەم كەفتینە بیسەكا لەشكرێ رژێمێ و د هەمی دەڤەرا را لەشكرێ رژێمێ دەر دورێن مە گرتن، و هاتن و هەمی هیڤی و ئومێدی وی لەشكری ئەو بوو ئەم قورتال نەبین و بهێنە دەستە سەركرن، وی دەمی مە مرنا خوە دانا و ئەم چووینە دناڤا تراشان دا و هەمان دەم فرۆكە ژی هاتنە هنداف سەرێ مە و رەمی كر، و فرۆكان هوا خوە نێزیك كر مە هزر دكر دێ ژ دارا گرن و مە خوە ڤەشارت و ئەو ژی بێ هیڤی بوون، وی دەمی ئەم قورتال بووین و ئەم بتنێ هەشت پێشمەرگە بووین، و مە هەمیان گۆت مرنەك هەبیت بوومە دێ ئەڤرۆ بیت، چونكە ئەو هێزا هاتی گەلەك ژ هێز و شیانێن مە مەزنتر بوو، دیسا دەمێ مانگێشكێ ژی ستاندی مە مرنا خوە دیت و سوپاس بۆ خودێ ئەم ب ساخی قورتال بووین.
قادر تاها زێوەیی هەروەسا گۆت: وی دەمی گەلەك كەیفا مە دهات دەمێ مە چالاكیەك كربا و ب سەركەفتیانە و بێ زیان ئەم ژێ دەركەتباین، گەلەك یا خوش بوو و هەمان دەم دەمێ مە چالاكیەكا لەشكری ئەنجامدا با و هەڤالەكێ مە شەهید با یان بریندار ب با ئەم گەلەك عاجز دبووین، و ئەو ژی شولا خودێ بوو ما دا چ ژ مەهێت.
پێشمەرگێ شۆرەشا ئیلۆن و گولانێ قادر زێوەی ئەو ژی ئاشكراكر، كو وی دەمی رێكخراوا وان بناڤێ(شرین) بوو ل گەل (خسرو بامەرنی) ل سالا 1988 ئەو رۆژا فرۆكان ل وەرمێلێ دای مە ترۆمبێل ئینان و مە مالێن خوە ئینانە گەلیێ شین و مە هزر كر، كو ئەگەر لەشكرێ ئیراقێ هێرش ئینا دێ ترۆمبێلان هێلین و دێ ب سەر چیایی كەڤین، و دووڤدا چ نەبوو و بتنێ فرۆكەكێ هێرشی وەرمێلێ كر، و چوو و دووڤدا مە گۆت دێ چینە هەسنپیركا و ئەم چووین هەتا هەمزا جادە یا ڤالایە و كەسەك نەمایە، و دووڤدا چووین و ئەم ماینە برسی و مریشكێن مە كیڤی ب بوون و هوسا رەڤین حەجكو مرۆڤ نەدیتی نە، و مە گرتن و خوارن و ئەم ماینە هیڤی یا مرۆڤ و كەس و كارێن خوە و هەر ئێك ل رەخەكی را خوە قورتال كربوو، و مەتشتێن خوە هێلان ل جمبلكی و ب هێسترەكێ ئەم چووین و دەربازبووینە تیلەرێ، من گۆتێ دێ چمە ئاڤێ بۆ هەوە ل سەرەرو هەتا چوویم من ب چاڤێن خوە دیت وی گوندی دیكێلا ژێ بلند دبیت، و زڤرینە ئورە، ب مال و عەیال ڤە چووینە سلوپی و هەیڤەكێ ماینە ل گەڤەرێ .
هەمان پێشمەرگەی گۆت: شۆرەش ب گشتی یا خوش بوو هندەك جاران مرۆڤ كەفتە نەخوشیان لێ ئەو ژی یا ب زەوق بوو وی دەمی گەلەك ژڤێگاڤێ ب زەوق تر بوو، و بەرپرس و پێشمەرگە هەمی وەك ئێك بوون، و پارە خوارن و ئاڤاكرنا قەسرا و هەڤركانێ نەبوو، وی دەمی بۆ كوردینیێ خەلكی دكر، یێ چو نە كربیت نوكە عەمید و لیوا نە و سەر سەرێ پێشمەرگێ هەژار و بۆ مرۆڤی گەلەك نەخوش و خەلكێ دەڤەرێ هەمی د دیدەڤانە ئەڤە 45 سالە ئێك رۆژ ژی من پێشمەرگایەتی نەهێلایە ، و ل سالا 1981ێ ل گوندێ داودیێ بریندار بوویمە و سالا 1996/18/9/ ل سەر سنورێ ئیرانێ ل شەرێ چەسپاندنا قانوونێ بریندار بوویمە .
ل دووماهیێ گۆت: ژ خودێ خوازم خودێ مللەتێ مە ژ هەر زولم و زۆرداریەكێ پارێزیت و خودێ بەرپرسێن مە چێ كەت.
