شۆڕه‌ش ئیبراهیم: كلیپا من یا ئێكێ و دووماهیێ گه‌له‌ك ب دلێ منن
دهۆك، شاكر ئه‌تروشی:
كلیپا شه‌شێ یا سترانبێژ (شۆڕه‌ش ئیبراهیم) هاته به‌لاڤكرن و هه‌ر ژنوكه ئه‌و یێ به‌رهه‌ڤیێن خوه بۆ تۆماركرنا چه‌ند سترانێن دی دكه‌ت، و ب گۆتنا وی هه‌كه هاریكاریا وی بهێته‌كرن و سپۆنسه‌ر هه‌بن وی تێرا ئه‌لبۆمه‌كێ ستران دێ هه‌بن.
ناڤهاتی گۆت: سترانا من یا نوو ب ناڤێ (نێرگزه) ژ په‌یڤێن سه‌لمان شێخمه‌می و ئاوازا شامل بریفكی یه، بۆ تۆماركرنا وێ ماموستا فه‌همی سه‌لمان هاریكاریا من كریه و ئه‌ز ب باوه‌رم دێ جهێ خوه گریت.
شۆڕه‌ش، كو ل سالا 2007 پشكداری د به‌رنامێ رێكا ستێرا دا كربوو، هێشتا گۆت: به‌ری وی به‌رنامه‌ی ژی من ستران دگۆتن و كلیپه‌ك ب ناڤێ (ئه‌و ئه‌ڤینا هنده سالان) به‌لاڤ كربوو، لێ پشتی به‌رنامه‌ی خه‌لكه‌كی پتر ئه‌ز نیاسیم و به‌رنامه بۆ ده‌رگه‌هه‌ك كو ب شێوه‌كی فه‌رمی تر به‌رده‌وامیێ بده‌مه سترانگۆتنێ، هه‌روه‌سا ده‌رگه‌هێ دی ئه‌و بوو من په‌یمانگه‌ها هونه‌رێن جوان یا ب دووماهی ئینای و تایبه‌تمه‌ندیا من ئامیرێ عۆدێ یه، هه‌روه‌سا ئه‌ز سازێ ژی دژه‌نم، ئه‌ڤه ژی بۆ ئه‌گه‌ر كو ب شێوه‌كی ئه‌كادیمی كاربكه‌م، هه‌روه‌سا برایێ من شیمال ژی كو په‌یڤ و ئاوازان د دانیت گه‌له‌ك هاریكاریا من كریه، نوكه ژبلی سترانگۆتنێ ئه‌ز چو كارێن دی ناكه‌م و كلیپا من یا ئێكێ و یا دووماهیێ گه‌له‌ك ب دلێ منن، ژبه‌ركو من ژدل حه‌زژێكرینه.
