شۆڕەشا گولانێ بەرسڤەكا توند بوو بۆ دوژمن و داگیركەرێن كوردستانێ
دیدار، سالار محه‌مه‌د دۆسكی:
ئێك ژ بێژەرێن هەرە كاریگەر و بناڤ و دەنگ دناڤا شۆڕەشا 26ی گولانێ دا ل ئێزگێ دەنگێ كوردستانێ بەحسێ رۆلێ دەنگێ كوردستانێ دناڤا شورەشا گولانێ دا دكەت، و ئاشكرادكەت كو هەمی بزاڤ و هەولێن دوژمنێن مللەتێ كورد ئەو بووینە دەنگێ كوردستانێ نەمینت، چونكە دزانی دەنگێ كوردستانێ مل ب ملێ پێشمەرگەی ڤە شۆڕەش دكر .
جێگرێ بەرپرسێ مەكتەبا سیاسی یا پارتی دیموكراتی كوردستان ل دهوك سەباح بیتوللا، ئێك ژ پێشمەرگێن هەرە دیار دناڤا شۆڕەشا 26ی گولانا پێشكەفتن خواز دا و ئێك ژ بێژەرێن هەرە بەرچاڤ ل ئێزگێ دەنگێ كوردستانێ، د دیدارەكێ دا ل گەل رۆژناما ئەڤرۆ بەحسێ چەندین كاوانێن وی سەردەمی ل شورەشێ دكەت و گۆت: شۆڕەشا گولانێ بەرسڤەكا توند بوو بۆ دوژمن و داگیركەرێن كوردستانێ و ئێكەم گۆتارا سەركردایەتی یا پارتی دیموكراتی كوردستان ل وی سەردەمی كوردستان گورەپانا راستەقینەیا بەرخودان و شۆڕەشێ یە، شۆڕەشا گولانێ بۆ دوژمن و داگیركەران سەلماند كو دفەرهەنگا رێبازا پارتی و بارزانی دا دو تشت ماینە، نەتسلیم بوون و خوە نەچەماندن، راستە ئەم شكەستینە و ئاوارە بووینە و دەربەدەربووینە و پاشڤەچووینە لێ چو جاران مە خو رادەست نەكریە و مە خوە نەچەماندیە، ونموونە گەلەك زورن هەر سەر دەمێ شێخ عەبدوالسلامێ بارزانی ل سالا 1914ێ دەمێ چوویە سەر كنفا سێدارێ تەنازول بۆ دوژمن و داگیركەران نەكر، شێخ ئەحمەدێ بارزانی پتر ژ 11 سالان دقەید و زنجیران دا بوو ل زیندانێن دوژمنی دا ل سەر دەمێ شاهێ عیراقێ و گەلەك جاران شاهێ عیراقێ خەلك دهنارتە دەف ل زیندانێ كو بتنێ ل سەر كاغەزەكێ داخازا لێبورینەكێ ژ شاهی بكەت دێ ژ زیندانێ هێـتە ئازادكرن، خودێ ژێ رازی شێخ ئەحمەد بارزانی دگۆت داخازا لێبورینێ ژ زالم و دكتاتورا ناكەم، بتنێ داخازا لێبورینێ ژ خودێ دكەم، شكەستنا كومارا كوردستان ل باژێرێ مهابادێ بارزانیێ نەمر ل گەل 500 قەهرەمانان و رەنگەگە ب چەكەكێ گەلەك سڤك لێ ب باوریەكا گەلەك مەزن و خوە راگر بەرسینگێ سێ لەشكەران گرت (توركیا، عیراق و ئیران) و شكاندن وپێلێن رویبارێ ئاراس دەرباز بوو و گەهشتە ئێكەتیا سوفێتی یا بەرێ و دەرگەهێ كلینێ لێدا و دگۆتە هەمی دونیایێ مللەتەكێ هەی بناڤێ كورد و ئاخەكا هەی بناڤێ كوردستان لەوما دشێین بێژین شۆڕەشا گولانێ نە ئومێدی كرە ئومێد و شكەسستن بشكەستنێ ئینا و شكەستن كرە سەركەفتن و ئەو خەونا دوژمن و داگیركەرێن كوردستانێ بوومە دیتی كو ئێدی هزرا بزاڤا رزگاری خوازا كوردستانێ ب دووماهی هات، ئەو خەونا وان بن ئاخ بوو و جارەكا دی پیرەژینەكا سەرفەراز و سەركەفتی هات.
سەباح بەیتوللا، زێدەتر ژی گۆت: رێكەفتی 9/5/1980ێ چوومە ئێزگێ دەنگێ كوردستانێ وەك بێژەر، دەنگێ كوردستانێ كارتێكرنەكا گەلەك مەزن هەبوو دبلندكرنا هەستا نەتەوەیی دا وەك بەنداڤەكێ بەرامبەر داگیركەر و دوژمنێن كوردستانێ، لەوما هەتا ل شۆڕەشا ئەیلونێ ژی هەر دانوستاندنەكا دوژمنی ل گەل سەركردایەتی یا پارتی دیموكراتی كوردستان ئەنجام دابیت، ئێك ژ مەرج و داخازیێن دوژمنی ئەو بوویە كو پەخشێ ئێزگێ دەنگێ كوردستانێ بهێتە راوستاندن، چونكە ئەوان زانی كارتێكرنەكا گەلەك مەزن هەیە، چەندین جاران بارەگایێ ئێزگێ دەنگێ كوردستانێ هاتە توبارانكرن و شەهید ژی دان و دووماهی جار گەلەك بزاڤكرن ب ئامیران تشویش بكەیڤیتە سەر ئێزگەێ و دەنگ نەهێـتە بەلاڤەكرن بەلێ هەر دبەروام بووین و هەتا نوكە بەردەوامە..
جێگرێ مەكتبا سیاسییا پارتی دیموكراتی كوردستان دهوك خوەیاكر: شۆڕەشا گولانێ ئەف تەكنلوژیا نوكە نەبوو كەنالێن ئەسمانی و روژنامە و گوڤار نەبوون و بتنێ دەنگێ كوردستانێ بوو و دەنگێ مەزلومەتیا ڤی مللەتی بوو و گەهاندنا راستی یا ڤی مللەتی بوو و گەهاندنا بۆچوونا ناڤخوە بۆ دەرڤە لەوما ژی وەك هەڤالەكی لێ هات بوو بۆ هەر تاكەكی بۆ هەر خێزانەكا كوردستانێ و بەردەوام چاڤەرێری دەنگێ كوردستانێ بوون، و هەتا پێشمەرگەی ژی ژبلی تڤنگا وی هەر پێشمەرگەكی رادیۆیا خوە هەبوو و هەر هەمیان گوهداریا دەنگ و باسێن شۆڕەشێ دكر و پەیاما سەركردایەتی یا پارتی و هەر تشتەكێ دهاتە ئەنجامدان ب رێكا ئێزگێ دەنگێ كوردستانێ گوهداری دكر، هەتا دناڤا جەركێ دوژمنی دا مالەك نەبوو وائیرەكێ نەهینت و رادیۆیا خوە دهلكرن و ل سەردابا دا گوهداری یا ئێزگێ دەنگێ كوردستانێ دكر.
سەباح بەیتوللا هەروەسا گۆت: ئێزگێ دەنگێ كوردستانێ ل شورەشا ئەیلولێ هەبوو و رێكەفتی 28/9/1963ێ هاتە دامەزراندن و هەتا نوكە یێ بەردەوامە، دەمێ ئەز ل دەنگێ كوردستانێ بارەگایێ ئێزگەی ل سێگوشا سنری بوو دگۆتنێ (دانەپەل) دناڤبەرا هەر دو گوندانێن (هەلەج و شەقلاڤە) ل دەڤەرا ملگەڤەر ل ئیرانێ، دووڤ دا بڕیار هاتەدان كو ئێزگێ دەنگێ كوردستانێ بۆ ناڤ كوردستانێ بهێتە ڤەگوهاستن ل دەسپێكێ هاتینە گوندێ (شێخانوكێ) پشتا شینێ، چونكە گەلەك بەفر هاتبوو و رێك هاتبوونەگرتن، هەتا رێك هاتیە ڤەكرن دەنگێ كوردستانێ هاتە ڤەگوهاستن بۆ دەڤەرا (كێلەشینێ) ل دەڤەرەكێ دگۆتنێ (كەرگەسین) دووڤ دا هاتە ڤەگوهاستن بۆ دەڤەرا (گولنار) جارەكا دی هاتە ڤەگوهاستن بۆ دەڤەرا (خرێنەی) ل ڤێ دەڤەرێ ئێزگێ دەنگێ كوردستانێ ژلایێ بالەفرێن دومژنی ڤە هاتە توبارانكرن و بمخانی ڤە دو پێشمەرگە شەهیدبوون بناڤێ( محەمەد ئەمین نێروەیی، محسن نێروەیی) پێشمەرگەكێ دی هەر یێ نێروەی بریندار بوو، دوژمنی دزانی ئەڤی دەنگی چو برینەكا كویر ئێخستی یە دناڤا لەشێ دوژمنی دا لەوما هەمی بزاڤا وان ئەوو بۆ ب هەمی رێكا ئەڤجا توبارانكرنێ یان تەشویشێ ئەڤ دەنگە بهێتە بن بركرن، لەوما كارتێكرنەكا مەزن ل بووچوونا ناڤخوە و دەرڤە كربوو، ببوو سكرەك بۆ بەرسفدانا پرۆپاكندێن دوژمن و داگیركەرێن كوردستانێ و هەستا نەتەوەیی بلندتر لێ دكر و لەوما ژی مە دیت گەنج و لاوێن كوردستانێ یێ قەستا ناف شۆڕەشێ دكەن و چەكێ شەرەف و كەرامەتێ دژنی دوژمن و داگیركەرێن كوردستانێ هەلدگرن و دەنگێ كوردستانێ كارتێكرنەكا مەزن دڤی بیاڤی دا هەبوو لەوما شێم بێژم دەنگێ كوردستانێ بخوە شۆڕەشەك بوو دناڤ هەر مالەكێ دا و پێشمەرگە بوو دناڤ هەر چەپەرەكی دا و كادرەك بوو دناڤا هەمی رێكخستنێن نهێنی دا و هەتا دەنگێ كوردستانێ كارتێكرن ل سەر زیندانیان هەبوو ئەگەر جارەكێ رادیۆیەك ب دەستكەفتبا ئەوان زیندانیان هەمی بزافكرن ل جهەكی گوهداری یا دەنگێ كوردستانێ بكەن و كەس نەدشیا رێكێ ل دەنگێ كوردستانێ بگریت و گەهشتە هەمی جهان.
سەباح بەیتوللا دوپاتكر: دەنگێ كوردستانێ گەلەك بەلاڤ دبوو و گەلەك جاران دەنگ و باسێن ئێزگێ كوردستانێ دبوونە ژێدەر بۆ ئاژانسێن جیهانی و دەرڤە چونكە هەر هەمیان زانی ئەڤە دەنگێ مللەتەكێ مەزولمە و دەنگەكێ راستەقینە یێ خەلكێ كوردستانێ یە و ئەڤە دەنگێ خودانێن بڕیارێ یە و دەنگێ رێبازا پارتی دیموكراتی كوردستانە و هزرەكا مەزن بۆ ئەڤی دەنگی دهاتەكرن.
سەباح بەیتوللا ئەو ژی ئاشكراكر، هەتا ل داستانێن پێشمەرگێ كوردستانێ و تایبەت ل دەڤەرا بەهدینان وەك داستاندێن (دێرەلوك، مانگێشك، گەلناسكێ، مەتارێ بامەرنێ) دەنگێ كوردستانێ خولەك بخولەك ل گەل پێشمەرگەی بوو دناڤا جەنگی دا وهاندان و پشتەڤانیا پێشمەرگەی دكر، خولەك بخولەك و هاندنا جەماوەرێ كوردستانێ بۆ وێ چەندێ رادەستی ئیرادا دوژمن و داگیركەرێن كوردستانێ نەبن.
ل دور بیرهاتنێن نەخوش ژی ل ئێزگێ دەنگێ كوردستانێ، صەباح بەیتولا گۆت: دەمێ دوژمنی ئەنفال ب سەر مللەتێ مە دا ئینای، هەلەبجە، وەغەركرنا شەهیدێ سەركردە ئدریسێ جانەمەرگ خودێ ژێ رازیبت، هەر داستانەكا پێشمەرگێ قەهرەمان تێدا هاتبانە شەهیدكرن ژ نووچێن نەخوش بوو ل دەمێ مە دخواندن و بەلاڤەدكرن.
ل دور بیرهاتنێن خوەش ژی، صەباح بەیتولا گۆت: هەر داستانەكا پێشمەرگێ قەهرەمان توماركربا خوەش بوو، ڕامالینا دوژمێن مللەتێ كورد ل سەرهلدانێ و ئازادكرنا باژێرێن كوردستانێ دەنگ و باسێن خوەش بوون، و گەلەك دورشمێن خوەش مە گازی خەلكێ خوە دكر و سەرهلدان دەسكەفتەكێ گەلەك مەزنە كو بەرهەمێ وێ حوكمەت و پەرلەمانێ كوردستانێ یە و ئەڤرۆ هەرێما كوردستانێ بوویە دەڤەرەكا گەلەك كاریگەر ل دەڤەرێ و هەتا ل جیهانێ ژی و گەلەك ب چاڤەكێ مەزن دهێتە دیتن .و دەمێ دبێژن هەرێما كوردستانێ ئانكو رێبازا پارتی و بارزانی.
سەباح بەیتوللای ل دوماهیێ گۆت: سەرێ رێز و تەقدیرێ بۆ هەموو شەهیدێن شۆڕەشا گولانێ دچەمینم و سەروەرێ وان بارزانیێ مەزن و ئدریسێ جانەمەرگ، ل شۆڕەشا گولانێ داستانێن مەزن هاتنە تۆماركرن و ژ دەنگێ تڤەنگا پێشمەرگەی بهێنا ئازادیێ و بهارێ دهات، سلاڤ ل ئەوان رێكخستنێن نهێنی ئەوێن دناڤا جەرگێ دوژمنی دا بەر سینگێ دوژمنان دگرت و ڕامانا ترسێ نەدزانی، سلاڤ ل ئەوان زیندانیێن سیاسی و گەلەك دهاتنە ئەشكەنجەدان و هەمی جورێن ترس و لێدان و برسێ دیتین وسەر بۆ دوژمنان نە چەماندین، سلاڤ بۆ دایكێن قەهرمان كو نان بۆ پێشمەرگەی پاتی، سلاڤ بۆ جەماوەرێ كوردستانێ، سلاڤ بۆ جەنابێ سەرۆك(مەسعود بارزانی) و راستی جەنابێ وی و جەنابێ رەحمەتی (ئدریس بارزانی) رۆلەكێ مەزن هەبوو د سەرئێخستنا شۆڕەشا گولانێ دا .
