شیانێن هه‌ڤڕكیا بابێ خوه د گۆتنا سترانان دا نینن
ئه‌ڤرۆ، هه‌رهین محه‌مه‌د:
سترانبێژێ كوچكۆ دیوانا بینه‌ر نێروه‌یی، كو دبیته كورێ سترابێژ مه‌سعود نێروه‌ی د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ دبێژیت: بابێ من كارتێكرنا خوه ل سه‌ر من هه‌بوو كو سترانا فولكلۆری و یا كوچكۆ دیوانان بێژم و ئه‌و ژینگه‌ها ئه‌ز تێدا یا چیایی یه و یا تژیه ژ كه‌لتور و فولكلۆرێ كوردی و ب پشت راستی ڤه دبێژم ئه‌و كه‌سێ بۆ ده‌مێ چه‌ندین سالا د بواره‌كی دا كاربكه‌ت وه‌كو ماموستایه‌كی لێ دهێت بۆ مرۆڤی و مرۆڤ دێ شه‌رم كه‌ت ل هه‌مبه‌ری و سترانا بێژیت، ئانكو ترسه‌ك بۆ مرۆڤی په‌یدا دبیت ل جهه‌كی مرۆڤ خه‌له‌ت بیت ده‌مێ سترانێ دبێژیت و ل ده‌ستپێكا من و ستران گۆتنێ ژی من شه‌رم دكر ل هه‌مبه‌ری بابێ خوه سترانا بێژم و هه‌تا نوكه ژی ئه‌و كارتێكرنه پیچه‌ك یا مای و د ستران گۆتنێ دا ئه‌ز هه‌ڤركیا بابێ خوه ناكه‌م و ئه‌و بۆ من وه‌كو ماموستایه‌كی یه و من شیان وه‌كو وی نینن و ئه‌و سترانێن گه‌له‌ك ده‌ڤه‌ران دبێژیت، ئانكو یێن هه‌ر چار پارچێن كوردستانێ دبێژیت و دبینم گوهدارێ سترانا فلكلۆری و كوچكۆ دیوانان هه‌ریێ مایی و به‌ر ب زێده‌بوونێ یه و ئه‌ڤه ژی وێ چه‌ندێ دگه‌هینت كو ل ڤێ دووماهیێ گه‌له‌ك گه‌نج ده‌ركه‌فتی نه و شه‌یدایێن سترانا فولكلۆری نه.
بینه‌ری گۆت ژی: دشێم سترانان بێژم بێ راوه‌ستیان و بتایبه‌ت هه‌كه سترانبێژه‌كێ دی ل گه‌ل من بیت و سترانان پاڤێژینه به‌ر ئێك و ئه‌ز سترانه بێ مۆزیك بیت دشێم بۆ ده‌مه‌كێ نه‌دیار سترانان بێژم و ئه‌م ئه‌ڤ گه‌نجێن نوی ده‌ركه‌فتین حه‌زدكه‌ین ب سترانێن فولكلۆری خزمه‌ته‌كێ بۆ ملله‌تێ خۆ بكه‌ین و سترانا فلكلۆری ره‌سه‌ناتیا ملله‌ته‌كی دیاردكه‌ت وه‌كو شوره‌شه‌كێ یه و دبیت به‌رێ دا نڤیسین نه‌بوو هه‌ر كاره‌ساته‌ك و تشته‌كێ روودابا دبوو ستران و ده‌نگبێژێن مه ب هزرو شیانێن خوه ئه‌و وێران كرن و شه‌رۆ شورو داستانێن ب سه‌ر ملله‌تێ كورد دا هاتین ب سترانێ ڤه هاندن و وه‌كو مێژوویه‌كێ لێ هاتینه بۆ ملله‌تێ كورد.
ل دووماهیێ نێروه‌ی گۆت: د به‌رنامێ من دایه كلیپێن فولكلۆری چێكه‌م و كه‌ناله‌كی ژی ل گه‌ل من گۆتیه كو كلیپه‌كێ بۆ من چێكه‌ن، به‌لێ هێشتا چ دیارنه‌بوویه و وان خوه بێده‌نگ كریه و گه‌له‌ك یا گرنگه جهێن په‌یوه‌ندیدار خوه ل هونه‌رێ كوردی بكه‌نه خودان، به‌لێ ب مه‌رجه‌كی ل سه‌ر هنده‌ك مه‌رجان كلیپێ دروستكه‌ن و ستران وه‌كو خوه بهێته گۆتن و ده‌ستكاری تێدا نه هێته‌كرن.
