شیره‌تكاره‌كێ خێزانی: زۆربه‌یا زه‌لامان وه‌كی تۆلڤه‌كرن هه‌ڤژینا دویێ دئینن
هه‌ولێر، قائید میرۆ:
شیره‌تكاره‌كێ خێزانی بو روژناما ئه‌ڤرو ئاشكرا كر، ل گوره‌ی دووفچوونه‌كا هاتیه كرن لدۆر بابه‌تێ ئینانا هه‌ڤژینا دویێ ده‌ركه‌فتیه زۆربه‌یا زه‌لامان ئه‌گه‌رێن شه‌رعی نینن بۆ ئینانا هه‌ڤژینا دویێ به‌رۆڤاژی زێده‌تر وه‌كی تولڤه‌كرنێ ل هه‌ڤژینا ئێكێ ده‌مێ ئاریشه‌یه‌ك ناڤبه‌را وان په‌یدا دبیت زه‌لام هه‌ڤژینا دویێ پێك دئینیت و گۆت: هه‌كه لێك تێگه‌هشتن هه‌بیت زۆربه‌یا زه‌لامان د به‌رهه‌ڤ نینن هه‌ڤژینا دویێ بینن.
محه‌مه‌د گومه‌شینی، شیره‌تكارێ خێزانی دیار كر، دناڤا قانوونێن عێراقێ و هه‌رێما كوردستانێ هژماره‌كا مه‌رج و پیڤه‌را بۆ ئینانا زێده‌تری هه‌ڤژینه‌كێ هاتینه دیار كرن، ژلایێ قانوونی و شه‌رعی ئه‌ڤی بابه‌تی ئاریشه نینه، به‌لێ ئه‌م دزانین قانوونا بارێ كه‌سی ل هه‌رێما كوردستانێ هاتیه راستڤه‌كرن و هژماره‌كا مه‌رجا هاتینه دیار كرن بۆ ئه‌نجامدانا گرێبه‌ستا هه‌ڤژینا دویێ.
گومه‌شینی گۆت: (ئه‌ز ناچمه ناڤا هویرده‌كاریێن ئاینی و قانوونی لدۆر ئینانا هه‌ڤژینا دویێ، به‌لێ وه‌كی شیره‌تكاره‌كێ خێزانی و جڤاكی من دووفچوون كریه بۆ پرسا ئینانا هه‌ڤژینا دویێ و بۆ من ده‌ركه‌فتیه، زۆربه‌یا كه‌سێن ژ هه‌ڤژینه‌كێ زێده‌تر دئینن مه‌ره‌م ئه‌و نینه ده‌قێن ئاینی و شه‌رعی بجه بینن، به‌رۆڤاژی ئه‌گه‌رێن دی هه‌نه).
محه‌مه‌د گۆتژی: (ئه‌ز باوه‌رم به‌ری ئینانا هه‌ڤژینا دویێ ئه‌گه‌ر ژن و زه‌لام تنێ دانوستانه‌كا هێمن بكه‌ن و لێك تێگه‌هشتن هه‌بیت و كه‌سه‌ك هه‌بیت ئاخفتنه‌كا خێرێ دناڤبه‌را دو هه‌ڤژینادا بكه‌ت، هینگێ زۆربه‌یا وان زه‌لامێن دڤێت هه‌ڤژینا دویێ بینن نائینن و دێ پرۆسه هێته هه‌لوه‌شاندن، ئانكو زه‌لام ل جهێ مه‌زاختیان ل هه‌ڤژینا دویێ بكه‌ت هه‌كه ئه‌ڤی مه‌زاختی بو هه‌ڤژینا ئێكێ دانیت 60 %ێ یا كه‌سێن هه‌ڤژینا دویێ دئینن دێ په‌شێمان بن و هه‌ڤژینا دویێ نائینن).
محه‌مه‌د گومه‌شینی ئاماژه پێ كر كو ئه‌گه‌رێ په‌یدابوونا ئاریشه‌یان و چاره‌سه‌رنه‌كرنا وان دناڤبه‌را ژن و زه‌لامان دبیته ئه‌گه‌رێ ڤێ چه‌ندێ كو زه‌لام هه‌ڤژینا دویێ پێك بینن، ئانكو كارڤه‌دانا زه‌لامی هه‌مبه‌ری هه‌ڤژینا وی دبیته ئه‌گه‌رێ ئینانا هه‌ڤژینا دویێ و گۆت: (ل گوره‌ی دووڤچوونه‌كا من بۆ ئه‌ڤێ پرسێ زۆربه‌یا زه‌لامێن هه‌ڤژینا دویێ پێك دئینن به‌رهه‌ڤیان بۆ ناكه‌ن و چ پلان نینن وه‌كی ئاڤا كرنا خێزانه‌كا نوو، به‌لكۆ زێده‌تر وه‌كی تولڤه‌كرنێ ل هه‌مبه‌ری هه‌ڤژینا ئێكێ پرۆسا هه‌ڤژینا دویێ ئه‌نجام دده‌ت).
د ئاخفتنێن خوه یێن دووماهیێ دا محه‌مه‌د گومه‌شینی، شیره‌تكارێ خێزانی گۆت: (ئه‌ز باوه‌رم لێك تێك تێنه‌گه‌هشتن و ئێكدو قه‌بوول نه‌كرن دبیته ئه‌گه‌رێ په‌یدابوونا ئاریشه‌یان دناڤبه‌را ژن و زه‌لامان و ده‌ستپێكرنا ژیانه‌كا دژوار، به‌رۆڤاژی دڤێت ژن و زه‌لام ئێك قه‌بوول بكه‌ن و لێك تێگه‌هشتن هه‌بیت زۆر ئاریشه دێ هێنه چاره‌سه‌ر كرن ئه‌ز باوه‌رم ژن ژی هنده‌ك جاران گونه‌هبارن ل سه‌ر بجه نه ئینانا هنده‌ك ئه‌ركێن هه‌ڤژینیێ و زه‌لام دهێته پالدان بۆ ئینانا هه‌ڤژینا دویێ، هه‌روه‌كی زه‌لام ژی یێ گونه‌هباره ل هه‌مبه‌ری ژنێ).
