شیرەتکارێ سەرۆک کۆمارێ تورکیا: ئەم ھێزێن خوە ژ لیبیا ڤەناکێشین
ئه‌ڤرۆ نیوز:
یاسین ئاکتای شیرەتکارێ سەرۆک کۆمارێ تورکیا د داخۆیانیەکێ دا راگەھاند کو ھێزێن وان یێن سەربازی ل سەر داخوازا فایز سیراج سەرۆکێ حوکمەتا ویفاق یا ترابلوسێ چووینە لیبیا و پەیمانێن کو ل گەل حوکمەتا ویفاق ھاتینە ئیمزا کرن ژی رێ دایە وان ل وی وەلاتی بمینن و گۆت: (د دەما نھا دا کو حوکمەتەک بۆ ھەلبژارتنێن لیبیا ھاتە ئاڤاکرن گرنگە لێ ئەو یەک رامانا ھندێ نادەت کو ئەم دێ ھێزێن خوە ژ لیبیا ڤەکێشین و ئەز وەسا دبینم کو سەرۆک وەزیرێن نوو یێ حوکمەتا بەروەخت یا لیبیا ژی ژ ھەبوونا ھێزێن مە نەرازی نینە و ھێزێن مە د بجھکرنا ئەرکێن خوە دا بەردەوامن).
ھەر د ڤێ مژارێ دا ئێکەتیا ئورۆپا، ئەمریکا و نەتەوێن ئێکگرتی ب فەرمی ژ تورکیا و روسیا خواستن کو ھێزێن خوە و کۆمێن چەکدارێن گرێدای خوە ژ لیبیا ڤەکێشن و ھەبوونا ھێزێن تورکیا و کۆمێن چەکدارێن رادیکال یێن کو ژ سووریە چووینە لیبیا سەدەمێ سەرەکی یێ ئالۆزیانە ل لیبیا و حوکمەتا تۆبروک یا ب سەرۆکاتیا جەنەرال حەفتەر ب توندی ل دژی ھەبوونا ھێزێن سەربازی یێن تورکیا و چەکدارێن سووری دەردکەڤیت و د داخۆیانیەکێ دا پشتی رێککەفتنا ھەر دو حوکمەتێن تۆبروک و ترابلوسێ ژی ھاتیە راگەھاندن کو ھەتا ھێزێن تورکیا و کۆمێن چەکدارێن سەر ب تورکیا ژ ئاخا وان دەرنەکەڤن ئالۆزیێن نھا ل لیبیا ژی دێ د بەردەوام بن، چونکو ئارمانجا دەولەتا تورکیا داگیرکرنا ئاخا لیبیا یە و چاڤێ خوە بەردایە سامانێن لیبیا و دڤێت تورکیا ھەموو ھێزێن خوە و گرۆپێن چەکدارێن سووری ژ لیبیا ڤەکێشیت.
د رەوشا نھا دا نێزیکی ھەشت ھزار سەربازێن تورکیا و دەە ھزار چەکدارێن توندرەو یێ سووری ل لیبیا ھەنە و پرانیا وان ل دەوروبەرێن ترابلوسێ بجە بووینە و د شەرێ بەری نھا دا ل سێرتێ پشکداری کرینە و وەلاتیێن لیبیا چەندین جاران ل ترابلوسێ بۆ دەرکرنا ھێزێن دەولەتا تورکیا خوەنیشادان ساز کرن و وەلاتیێن لیبیا ھێزێن سەربازی و ھەوالگیریێن دەولەتا تورکیا وەکو ھێزەکا داگیرکەر دبینن و ژ حوکمەتا ترابلوسێ دخوازن کو ھێزێن تورکیا و کۆمێن چەکدار ژ ئاخا لیبیا دەرخینیت.
