شیلان دخوازیت ب رێیا هونه‌ری ژینگه‌هێ ب پارێزیت
ئاكرێ، نه‌وزاد هلۆری:
كچا باژێرێ ئاكرێ بناڤێ شیلان عه‌بدولره‌حمان ئێكه‌مین كچه ل كوردستانێ كو كه‌ڤالێن شێوه‌كاری ب ره‌نگه‌كێ جوان ب ره‌ژیێ و به‌را و ئاخ و بهاراتان دروست بكه‌ت و ئه‌و دخوازیت ب رێیا كارێ هونه‌ری ژینگه‌هێ ب پارێزیت.
شیلان بۆ رۆژناما ئه‌ڤرۆ دبێژیت: “من چوو بسپوری و تایبه‌تمه‌ندی د هونه‌ری دا وه‌كو خواندن و زانست نینه، به‌لێ ژ به‌ر كو من ڤیان و حه‌زه‌كا زێده بۆ هونه‌رێ شێوه‌كاری هه‌یه ژ به‌ر ڤێ چه‌ندێ من ده‌ستپێكر و سوپاس بۆ خودێ نوكه كه‌ڤالێن شێوه‌كاری یێن جوان و جوراوجور دروست دكه‌م”.
ناڤهاتیێ زێده‌تر گۆت: “كه‌رسته‌یێ چێكرنا وێنه و كه‌ڤالێن شێوه‌كاری یێن كو ژ لایێ من ڤه دهێنه بكارئینان ره‌ژی و به‌ر و ئاخ و بهاراتن، ئانكو ژ ره‌نگێ سرۆشتی بخوه دكه‌مه كه‌ڤال، پلانا من یا سه‌ره‌كی ئه‌وه كو ئه‌ز ژ به‌رمایك و ئه‌و كه‌رسته‌یێن كو دهێنه هاڤێتن و ژینگه‌ه پێ پیس دبیت بكه‌مه كه‌ڤال و ژینگه‌هێ ب پارێزم، له‌وا ئه‌ز گه‌له‌كا نێزیكی سرۆشتی و ژینگه‌هێ مه”.
شیلان كو ژیێ وێ 19 سالن و قوتابیا زانكویێ یه و ل پشكا زینده‌وه‌ر دخوینیت، زێده‌تر گۆت: “هه‌تا نوكه چێكرنا كه‌ڤالێن شێوه‌كاری بۆ من نه‌بووینه ژێده‌رێ سه‌ره‌كی یێ داهاتی، به‌لێ تا راده‌یه‌كی ژی شیامه كه‌ڤالێن خوه بفروشم”.
هه‌ژی گۆتنێ یه كو شیلانێ ل ئه‌یینی یا بوری پێشانگه‌هه‌كا شێوه‌كاری ل سه‌رێ گری ل ئاكرێ ل گه‌ل چه‌ند كه‌سه‌كێن دی ڤه‌كر و تێدا هژماره‌كا كه‌ڤالێن خوه نیشادان كو د تایبه‌ت بوون ب ره‌نگێن سرۆشتی ڤه.
