شینوار كه‌مال، دراما سنۆر ژ ڤالاهیه‌كێ نه‌هاتیه
ئه‌ڤرۆ، كاوین جیهاد ته‌حلاڤی:
گه‌له‌ك یا دل ئێشه مرۆڤ ل جهه‌كی یان وه‌لاته‌كی ژدایك بیت و ئه‌و جه یێ بێ سنۆر بیت، و د هه‌مان ده‌م دا ژ به‌ر نه‌بوونا وی سنۆری مرۆڤی كه‌رامه‌تا خوه ژی ژده‌ست دایه، و هه‌تا وی راده‌یی ژی كه‌س ژ مه كاره‌كته‌را خوه یا یاسایی ژی نینه، په‌یدابوونا مه بۆ ژیانێ سنۆر بۆ هه‌ر ئێك ژ مه دهێنه دانان، ب ڤێ چه‌ندێ ده‌رهێنه‌رێ دراما سنۆر شینوار كه‌مال به‌حسێ نڤیسین و دروستكرنا درامایا خوه یا نوو دكه‌ت.
شینوار كه‌مالی ل ده‌ستپێكێ ئاماژه ب وێ چه‌ندێ دا سنۆر ژ ڤالاهیه‌كێ نه‌هاتیه به‌لكو ئه‌و تشت بووینه یێن وه‌ل من كرین، هه‌تا سنۆر یێ بۆ خواندن و حه‌زژێكرن و ڤیان و ڤیانا دو كور و كچان ژی سنۆر بۆ دهێنه دانان، و هوسا هزرا ڤێ درامایێ دروست بوو و ب خوه‌ش حالی ڤه كۆمپانیا، پالۆ خوه لێ كریه خودان و نوكه دراما ل سه‌ر كه‌نالێ وار دهێته نیشادان و یا گرنگ ئه‌وه خه‌لكێ مه بڤان ئه‌كته‌ر و درامایێن ناڤخۆیی ڤه بهێته گرێدان و ژ به‌ر كو ئه‌م دزانین خه‌لكێ مه چه‌ند تێهنیێ درامایا كوردی یه.
دلینار یلدز كو د درامایێ دا وه‌كو ئه‌كته‌را سه‌ره‌كی دهێته دیتن ل سه‌ر رۆلێ خوه دبێژیت: خوه‌شیا سیناریۆیا ڤێ درامایێ وه‌كر كو ئه‌ز ژ بلی سترانبێژه‌ك ناڤدارم د ڤێ درامایێ دا وه‌كو ئه‌كته‌ر ژی ناڤدار ببم و ژ به‌ر كو سیناریۆ گه‌له‌ك ب دلێ من بوویه و ئه‌ز گه‌له‌ك ئێشاندم، لێ د هه‌مان ده‌م دا سیناریۆ نه وه‌كی ژیان و كاره‌كته‌را من بۆ یا گه‌له‌ك خوه‌ش ئه‌و بوو كو سیناریۆ گه‌له‌ك ب جوانی و پاقژی هاتبوو نڤیسین و ڤێ چه‌ندێ ژی گه‌له‌ك كارتێكرن ل من كو كو ئه‌ز خوه وه‌كو ئه‌كته‌ر ژی ببینم، و ئه‌كته‌را ئه‌ز ب روولێ وێ رابوویم ناڤێ وێ په‌ری یه.
جڤین مه‌هدی كو ئه‌كته‌رێ سه‌ره‌كیێ درامایێ یه دبێژیت: هنده‌ك تشت هه‌نه دبنه ئه‌گه‌ر مرۆڤ رۆلێ خوه د درامایێ دا ببینیت، و ب تایه‌به‌ت دامێ كو تو ل باژێره‌كێ وه‌كو زاخۆ بی و زاخۆ ژی ل سه‌ر سنۆری بیت، و ب خوه‌شحالیڤه كو ئه‌و رۆلێ ده‌رهێنه‌ری دایه من شیام ب وی رۆلی رابم، بۆ مه یا خوه‌ش ئه‌وه كو خه‌لكێ مه ئێدی گه‌له‌ك پشته‌ڤانێ دراما و ئه‌كته‌رێن خوه ب خوه‌یه و ئه‌ڤ چه‌نده ژی پتر هێزێ د ده‌ته مه كو كار ل سه‌ر به‌رهه‌م و درامایا خوه یا خومالی و ١٠٠% كوردی بكه‌ین، ژ به‌ر كو من نه باوه‌ره ئه‌ڤ كارێ هاتیه كرن ل كوردستانێ و ب تایبه‌ت ل ده‌رڤه‌را به‌هدینان كو به‌ری نوكه هاتبیته‌كرن.
زوزان خدر كو كچه‌كا باژێرێ دهۆكێ یه دبێژیت: هه‌بوونا ڤێ درامایێ بۆ ئه‌گه‌رێ وێ چه‌ندێ كو بۆ جارا ئێكێ ئه‌ز بشێم د درامایێ دا كار بكه‌م، ژ به‌ر كو د ناڤ جڤاكێ مه دا كچ گه‌له‌ك یا كێمه كو پشكداریێ د ناڤ درامایێ دا بكه‌ت، لێ ئه‌ز شیام وێ پێنگاڤێ ب هاڤێژم و وان ده‌رگه‌هان بشكێنم و یا گه‌له‌ك گرنگ ئه‌و بوو كو ئه‌و روولێ بمن هاتیه دان گه‌له‌ك نێزیكی كه‌سایه‌تیا من بوو.
هوگر زاهر، یێ كو ب ناڤێ مه‌تین د درامایێ دا دبێژیت: هه‌ر ل ده‌ست پێكا سیناریۆیێ و ئه‌و روولێ ب من هاتیه دان من وه‌كێ ب ده‌رهێنه‌ری دا كو به‌لێ ئه‌ز دشێم ب ڤی روولی راببم ژ به‌ر كو من كه‌سایه‌تیا خوه ١٠٠% د وی روولی دا ددیت و روولێ سه‌ره‌كی د درامایه‌كێ دا نه كاره‌كێ بچووكه و من گه‌له‌ك هزر كرن ل سه‌ر ڤێ چه‌ندێ لێ مرۆڤ دگه‌هیته وێ باوه‌ریێ كو گرنگیدان ب كور و كچێن كورد و ب تایبه‌ت ب ده‌ڤه‌ك و ده‌ڤه‌را مرۆڤی، شنی مرۆڤ دزانیت كا مرۆڤی چه‌ند كاره‌كێ باش و ژ هه‌ژی كر، و یا هه‌ری گرنگ بۆ مه ئه‌وه كو خه‌لكێ مه گه‌له‌ك پشته‌ڤانێ مه‌یه، ئانكو مرۆڤ دزانیت چه‌ند شه‌یدایێن كارێن خومالی نه.
دراما سنۆر، به‌رهه‌مێ كۆمپانیا پالۆیه و ژ سیناریۆ و ده‌رهێنه‌ریا (شینوار كه‌مال)ی یه، و پرۆدیوسه‌ر (محه‌مه‌د ژووری)یه و دراما ژ ١٣ خه‌له‌كان پێك دهێت و كارێ وێنه‌گرتنێ ل هه‌رێما كوردستانێ و وه‌لاتێ توركیا هاتیه‌كرن.
