شێخان و بەردەرەش دەربازبوونە چارگۆشەیا زێڕین و شێلادزێ و باتیفا مانا خوە پاراستن
ب دووماهی هاتنا قۆناغا ئێكێ ژ هەڤڕكیێن خولا پلا دو یا كوردستانێ دەربازبوون بۆ پلا ئێك هەردو یانەیێن پارێزگەها دهۆكێ شێخان و بەردەرەش پێنگاڤەكا باش بەر ب جهئینانا خەونا جەماوەرێ خوە هاڤێژیتن پشتی دگەل یانەیێن حاجیاوا و سەنگەسەر دەربازبوونا خوە بۆ قۆناغا دویێ و چارگۆشەیا زێرین مسۆگەر كر، پشتی شیایین د یاریێن خوە یێن گەڕا نەهێ و دووماهیێ ژ قۆناغا كۆما سەركەفتنێ بینن.
ژ كۆما ئێكێ یانەیا بەردەڕش ب سەركەفتنەكا مەزن چار گۆلان بێ بەرانبەر ل سەر یانەیا هەریر ئینا و بوو قارەمانا كۆما ئێكێ ب 22 خالان ئەوا یانەیا سەنگەسەر ب هەڤپشكی دگەل دەربازبووی پشتی رێزا دویێ هاتی ب كۆمكرنا 20 خالان، هەر دڤێ كۆمێ دا هەردو یانەیێن هەریر و خەلاتی پێچوین ئەوێن رێزێن نەهێ و10ێ و دووماهیێ هاتین پاشڤە چوونە پلا سێیێ یا خولا كوردستانێ.
ژلایێ خوەڤە و ژ چارچووڤەیێ كۆما دویێ دا یانەیا شێخان ژی بوو قارەمانا كۆما خوە و دەربازبوو قۆناغا چارگۆشەیا زێرین، پشتی ب سەركەفتی ل سەر مێڤانا خوە یانەیا پەروەردە ب شەش گۆلان بێ بەرانبەر گۆلەكێ و خالێن خوە گەهاندنە 20 خالا سەرێ لیستێ هات، ئەوا یانەیا حاجیاوا ب هەڤپشكی دەربازبووی پشتی رێزا دویێ هاتی ب كۆمكرنا 18 خالان، هەر دڤێ كۆمێ دا هەر دو یانەیێن باوەنووڕ و خەبات ئەوێن ێزێن نەهێ و 10ێ و دووماهیێ هاتین پاشڤە چوونە خولا پلا سێیێ.
ژلایەكێ دووڤە یانەیا شێلادزێ ژ كۆما ئێكێ مانا خوە د خولا پلا دو دا پاراست ئەوا ڕێزا سێیێ هاتی ب 14 خالان، هەروەسان نوونەرا چارێ یا پارێزگەهێ و ئیدارا سەربەخوەیا زاخۆ یانەیا باتیفا ژی هیڤیێن دەربازبوونێ بۆ پلا ئێك ژ دەستدان و مانا خوە ل پلا دو پاراست پشتی ل رێزا پێنجێ هاتی ب كۆمكرنا 15 خالان.
ژڤانێ یاریێ و چەند یانە دەربازبن؟
ل دووڤ سیستەمێ هاتییە بەلاڤكرن فدراسیۆنا فوتبۆلا كوردستانێ دێ دڤێ حەفتیێ دا كۆمبوونا خوە كەت ژبۆ دەستنیشانكرنا یاریێن چارگۆشەیا زێرین، ل دووڤ ڕێنمایان سەركەفتنیێ ئێكێ یێ كۆما ئێكێ دێ بەرانبەر خودانا ڕێزا دویێ یا كۆما دویێ كەت، سەركەفتنیێ ئێكێ یێ كۆما دویێ دێ بەرانبەر خودانا ڕێزا دویێ یا كۆما ئێكێ كەت، یاریێن وان ب شێوەیێ هاتنوچوونە، هەردو یانەیێن دەربازبنە یارییا دووماهیێ دێ ئێكسەر پلێتا دەربازبوونێ بۆ خولا پلا ئێكا كوردستانێ وەرگرن.
