شێخان پێدڤی ب یاریگەهەك و هۆلەكا گرتی یە
ئیحسان حەسەن
ڕێكا بدەستڤەئینان و گەهشتنێ بۆ هەر ناسناڤەكێ وەرزشی هند یا ب ساناهی نینە، ژبەر كو هەر تیمەك یان یانەیەك حەز هەبیت كو بگەهیتە ئارمانجێن خوە و ببیتە قارەمان، پێدڤییە شیان و پشتەڤانی هەبیت، داكو بشێت وان هەموو ئاستەنگان دەربازبكەت، ئەوا پێدڤی بجه بینیت، دیارە وەرزشا دەڤەرداریا شێخان لڤێ داویێ و لسەر ئەنجامێ پشكداریێن وان یێن كاریكەر دخول و قارەمانیێن پارێزگەهێ و هەرێمێ دا، شیان ئەنجامێن دلخوشكەر بدەستڤە بینن، پشتی تیما وان یا فوتبۆلێ ب سەرفەرازی پلێتا دەربازبوونێ بۆ خولا پلا ئێكا كوردستانێ وەرگرتی، ژبلی ئەنجامێن دلخوشكەر یێن تیمێن پەروەردەیا شێخان لسەر ئاستێ هەلبژارتیێن پەروەردێن قەزایێن پارێزگەها دهۆكێ، چ دقارەمانیێن یاریێن رێكخستی دا، دیسان دفیستەڤالا وەرزشی یاریێن گورەپان و مەیدانێ دا، كو دزوربەی یاریان دا هەڤركی لسەر ناسناڤێ قارەمانییان و رێزێن پێشییێ دكرن، چ لسەر ئاستێ كوران دیسان یاكچان، ئەڤە وێ چەندێ دیاردكەت كو لڤی باژیری هژمارەكا زوور یا بەرهرەمەندێن وەزرشی لێ هەنە، ئەگەر كار پتر لسەر بهێتە كرن و پشتەڤانییەكا باشتر بۆ هەبیت، دێ شێن دەستكەڤتێن مەزنتر بدەستڤە ئینن، بەلێ ئەڤە رامانا وی َ چەندێ نادەت كو ئەڤ دەڤەرە یا بێ بەهرە ژ ئاریشە و ئاستەنگان، ژبەر كو ئەگەر ئەنجام ب یاریێن گورپان و مەیدانێ هەبن، هەتا نها چ یاریگەهێن تایبەت نینن، كو تراكێن غاردانان لێ هەبن كو راهێنانان لسەر بكەن، بەلكو بارا پتری فیستەڤالێن خوە یێن قوتابخانەیان ل وان جهان ئەنجامددەن، كو چ ساخلەتێن یاریكەهان لێ نینن كو یاریزان بشێت بەهرە خوە یا دروست تێدا دیاربكەت، ژبلی هندی زوربەی چالاكیێن وەرزشی ب تایبەت یێن قوتابخانەیان ل مەهێن زڤستانێ دهێنە ئەنجامدان، شێخان پێدڤی ب هۆلەكا گرتی هەیە، بۆ هندێ یاریێن فوتسالێ و باسكتبۆلێ و ڤۆلی بۆلێ و تەپا دەستی بۆ كوران وكچان لێ بهێنە كرن، چونكو ئەڤرۆكە پتر ژ سەكتەرەكێ وەرزشی لڤێ دەڤەرێ هەنە، ئەوژی یانە و بنگەهێن لاوان و تیمێن مللی و وەرزشا قوتابخانەیان، ب گورەی وان قوربانیێن وەرزشا شێخان ب گشتی و سەكتەرێ پەروەردێ بتایبەتی داین، باشترین دیاری و قەرەبوكرن ئەوە، كاربەدەستێن ڤی باژێری چ یێن ئیداری و هەتا یێن حزبی و حەژێكەرێن وەرزشێ، بزاڤان بكەن حكومەتا هەرێما كوردستانێ، یاریگەهەكا فرێزیێ سروشتی كو تێدا مەیدانا یاریێن گورەپان و مەیدانێ تێدا هەبیت، دگەل هۆلەكا وەرزشی یا گرتی لڤێ دەڤەرێ ئاڤابكەن، بۆ هندێ وەرزشڤانێن ڤێ باژێری بشێن ئارەزویا خوە بجه بینن، مە باوەریەكا تمام یا هەی كو كابینا نوو یا حكومەتا هەرێمێ دێ هیڤیێن وەرزشڤان و حەژێكەرێن وەرزشی لڤێ دەڤەرێ بجه ئینیت.
