شێخ زێدو باعه‌دری: پێدڤیه دادگه‌ها فێدرال رۆهنكرنه‌كێ ل دۆر بریارا خوه یا كۆتا ئێزدیان بده‌ت
ئه‌ڤرۆ، له‌زگین جوقی
شیره‌تكاریه‌كێ په‌رله‌مانێ كوردستانێ رادگه‌هینیت، پێدڤیه دادگه‌ها بلند یا فیدرالی ل ئیراقێ رۆهنكرنه‌كێ ل دۆر بریارا خوه یا گرێدای كورسیا كۆتا بۆ ئێزدیان بده‌ت ودیاركه‌ت كا دێ هه‌ژمارا كورسیێن كۆتا بۆ ئێزدیان زێده كه‌ت یان دێ كێم كه‌ت و كو ب وێ چه‌ندێ دێ ده‌نگێن ئێزدیان به‌لاڤ بن ودێ ئێزدی هه‌موو هه‌ڤركیێ ل سه‌ر ئێك كورسیا كۆتا كه‌ن.
شێخ زێدو باعه‌دری، شیره‌تكارێ په‌رله‌مانێ كوردستانێ گۆت” یا دیاره دادگه‌ها بلند یا فیدرالی كورسیێن كۆتا بۆ ئێزدیان زێده ناكه‌ت و ب ڤێ چه‌ندێ دێ ده‌نگێن ئێزدیان به‌لاڤ بن ، به‌رێ 10 سالان ژی دادگه‌ها فیدرالی گۆتبوو كورسیێن كۆتا یێن ئێزدیان زێده بكه‌ن ب گۆره‌ی پلێتا ئاهێن خوارنی پێدڤیه ئێزدیان مافێ 5 هه‌تا 7 كورسیان هه‌بیت، لێ هه‌تا نوكه ئێزدیان ب تنێ ئێك كورسیا كۆتا ل جڤاتا نوونه‌رێن ئیراقێ یا هه‌ی وئه‌ره‌ب رازی نه‌بوون كورسیێن كۆتا بۆ ئێزدیان زێده‌ببن و نوكه ژی دادگه‌ها فیدرالی بریاره‌ك ل دۆركورسیا كۆتا ئێزدیان دایه وپێدڤیه دادگه‌ها ناڤبری رۆهن وئاشكرا بكه‌ت كا دێ هه‌ژمارا كورسیان زێده‌بیت یان ژی دێ ده‌نگێن ئێزدیان به‌لاڤه‌كه‌ن ب ریێا ئێك كورسیا كۆتا”.
شێخ زێدو باعه‌دری، ئاشكه‌را كرك:” ئه‌و بزاڤێ دكه‌ن ده‌نگێن ئێزدیان ل پارێزگه‌ها دهۆكێ ژی به‌لاڤه ببن وهه‌موو ئێزدی هه‌ڤركیێ ل سه‌ر ئێك كورسیا جڤاتا نوونه‌ران بكه‌ن و ئه‌ڤه ژی د به‌رژوه‌ندیا ئێزدیان دا نینه و ب دیتنا من پلانه‌ك دژی ئێزدیان هه‌یه كو فه‌رمان وئه‌نفال نه بتنێ ب رێیا شه‌ری نه، به‌لكو ب ریێا سیاسه‌تمه‌دارین شوڤینێ ژی دهێنه كرن و ئه‌وا نوكه دهێته ئه‌نجامدان دبینم به‌غدا بزاڤێ دكه‌ت فه‌رمانه‌كا دێ ب سه‌رێ ئێزدیان بینیت هه‌روه‌كو هزاره‌ها ده‌نگێن ئێزدیان ل پارێزگه‌ها نه‌ینه‌وا ژبه‌ر كورسیا كۆتا به‌لاڤ كرین، ب هه‌مان شێوه دخوازن ل دهۆكێ ژی وه‌سا بسه‌رێ ئێزدیان بینن له‌وما داخواز دكه‌ین دادگه‌ها فیدرالی رۆهنكرنه‌كێ بده‌ت كا وان دڤێت هه‌ژمارا كورسیێن ئێزدیان زێده بكه‌ن یان ژی كێم بكه‌ن وده‌نگێن خه‌لكێ مه وبه‌لاڤ بكه‌ن”.
ئاماژه كر” گه‌له‌ك یا گرنگه په‌رله‌مانتارێن مه ل جڤاتا نوونه‌رێن ئیراقێ ل سه‌ر ڤی بابه‌تی راوه‌ستن وئه‌و بریار ببیته ئه‌گه‌ر بۆ زێده‌كرنا كورسیێن كۆتا ئێزدیان نه‌كو ببیته ئه‌گه‌ر بۆ به‌لاڤكرنا ده‌نگێن ئێزدیان بۆ ئێك كورسیا كۆتا ل جڤاتا نوونه‌ران”.
