شێرزاد عه‌لی: من دڤێت ب رێیا شانۆیێ په‌یاما خوه بگه‌هینم
ئه‌ڤرۆ، هه‌رهین محه‌مه‌د:
هونه‌رمه‌ندێ شانۆڤان شێرزاد عه‌لی نوری، كو نوكه ل وه‌لاتێ ئه‌لمانیا دژیت د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ گۆت: شانۆ حه‌زا من بوویه و پشتی ل زانكۆیێ هاتیمه وه‌رگرتن گه‌له‌ك جاران ژبلی ئه‌كته‌ریێ من شانۆ نڤیسینه و ده‌رهێنان ژی كریه و ب رۆلێن سه‌ره‌كی و بابه‌تێن ره‌خنه‌یی من ڤیاینه په‌یاما خوه بگه‌هینم، به‌لێ گۆتنا راستیان د شانۆگه‌ریان دا تشته‌كێ سرۆشتی یه، لێ نه‌بوونا دادپه‌روه‌ریێ ئه‌و راستیه بۆ من ب خرابی زڤراندیه و شانۆ ده‌رگه‌هه‌كه مرۆڤ كاره‌سات و ئێش و ئازارێن وه‌لاتیان و ملله‌تێ خوه تێدا دیاربكه‌ت و هه‌تا پێنج شانۆگه‌ریان من ئه‌نجامداینه و ل گه‌له‌ك جهێن دی یێن جودا وه‌كو شانۆگه‌ریا جیهانا بن ئه‌ردی و دۆژمنێ گه‌ل و فانتاسیا پێشمه‌رگه‌هه‌كێ نه‌دیار و هه‌لامه‌ت و هه‌دیسان شانۆگه‌ریا مشكێ پیشت دیكێلێ و ره‌نگێن سۆتی و قێژی د ڤان هه‌ر سێ شانۆگه‌ریان دا وه‌كو ده‌رهێنه‌ر و نڤیسه‌ر بووم.
شێرزادی زێده‌تر ژی گۆت: ل ده‌می ئه‌ز ل كوردستانێ من هنده‌ك شانۆگه‌ری ئه‌نجامدان و ژ به‌ر وان شانوگه‌ریان هاتمه كێمكرن و راوه‌ستاندن و ئه‌ڤ چه‌نده نه بتنێ دكارێن خوه یێن هونه‌ری دا، به‌لكو دكارێن هه‌ڤالێن خوه ژی دا هه‌كه وه‌كو ئه‌كته‌ر پشكداربام ئه‌ڤ چه‌نده ل گه‌ل من دهاته‌كرن و ژ به‌ر ڤێ چه‌ندێ بۆ ده‌مه‌كێ درێژ هاتمه راوستاندن و من چو كارێن شانۆیی ئه‌نجام نه‌دان، به‌لێ ئه‌ز نه‌شیامه حه‌زێن خوه چونكو ئه‌ڤه كارێ منه و دووماهی شانۆگه‌ریا خوه ب ناڤێ قێژی من نیشادا و كۆمه‌كا ئێش و ئازارێن گه‌نجان و جڤاكی كو نه‌شێن ب ده‌ڤ بێژن من ب شانۆیێ دیاركرن، به‌لێ بۆ من ب شێوه‌كێ نه‌رێنی زڤری و دبینم بزاڤا شانویێ ل كوردستانێ یا سنوورداره.
