شێرێن كوردان ئیراق گەهاندە مۆندیالێ
ئیحسان حەسەن
گومان تێدا نینە كو ستێرێن كورد چ یێن هەرێما كوردستانێ چ یێن پیشەكار ل وەلاتێن ئورۆپی یێن جودا رۆلەكێ سەرەكی و ئێكلاكەر هەبوویە بۆ دەربازبوونا هەلبژارتییێ ئیراقێ بۆ مۆندیالا 2026ێ، سەلماند كو ستوونەكا سەرەكی نە، گیانێ وان یێ بەرەڤانییێ و شەركرنێ دیاریگەهێ دا، پێگیری وزیرەكییا وان لدووڤ تایبەتمەندێن خوە یێن تەكنیكی یێن جودا د هەر 21 یاریێن هەلبژارتییێ ئیراقێ دكاروانێ وان یێ دەربازبوونێ دا، وەكر كو ئیراق پشتی 40 سالێن چاڤەرێكرنێ بگەهیتە هیڤیێن خوە و بۆ جارا دویێ دەربازی مۆندیالێ ببیت، من نەڤێت ئەز دگوتارا ڤێ حەڤتییێ بەحسێ لایەنێ تەكنیكی یێ هەر یاریزانەكێ كورد جودا د یاریێن بوریدا بكەم، كو نێزیكی 10 یاریزانان درێسێ ئیراقێ د ڤاڤارتنان دا لبەر خوەكرن، تنێ من دڤێت ئەز سرنجێ بێخمە لسەر هندەك خالان، كا چ پێدڤییە یاریزانێ كورد بەری مۆندیالێ و دگەل روودانێن مۆندیالێ بكەت، یا ئێكێ: یاریزانێن كورد بەری دەستپێكرنا مۆندیالێ ب تایبەت دیاریێن هەڤالینی دا ئەزموونا خوە یا دەولەتی بهێزتر لێ بكەن، كار پتر لسەر خوە گونجاندنێ لسەر شێوازێ یاریێ و پلانێن تەكتیكی بكەن، یا دویێ مۆندیال ب هێزا جەستەیی یا بلند و نەفەسەكا درێژ دهێتە نیاسین، پێدڤی كارەكێ زێدەتر لسەر خوە بكەن، داكو بشێن د 90 خولەكان ب هەمان ریتم یاریێ بكەن، ژبەر كو دمۆندیالێ دا ب تایبەت دگەل وێ كۆما ئیراق كەڤتیە تێدا فشار لسەر وان دێ تووند تربن، یا سێیێ ئەڤ یاریزانە پتر خوە بگونجینن دگەل فەلسەفا راهێنەرێ خوە گراهام ئارنۆلد وپلانێن وی ب دروستی چێبەجێبكەن، ژبەركو راهێنەر باش دزانیت جێوازییا ئەو ناڤێن لبەر دەستێ وی دگەل یاریزانێن تیمێن هەڤرك و ئەزموونا وان ب تایبەت دبەرگیریێ دا ژ دەڤەرا خوە، یا چوارێ خوە دووربێخن ژفشارێن دەرونی و باوەریەكا بلند یاریێ بكەن، هەر ئێك مۆرالا هەڤالێن خوە بلندتر لێ بكەت، بۆ هندێ ترسێ بشكێنن، یا پێنجێ بزاڤێ بكەن كو ب كێمترین خەلەتی ژیاریێن خوە دەركەڤن ژبەر كو هەر شاشییەكا بچووك دبیت ببیتە باجەكا مەزن لسەر تیمێ، ژبەر كو دەلیڤە د مۆندیالێ دا گەلەك دكێمن ب تایبەت دقووناغا كۆماندا، یا شەشێ ژهەموویان گرنكتر هەموو شیانێن خوە بێخنە كار بۆ هندێ ببنە جهێ باوەریا چاڤدێران دناڤا یاریگەهێ دا و ژدەرڤە، دوور نینە دەرگەهێن یانەیێن مەزن یێن ئورۆپی و بیانی بۆ بهێنە ڤەكرن، یا من دڤێت بێژم داكو یاریزانێن مە پتر رۆلێ خوە بینن و پتر ناڤ و دەنگییێ وەرگرن، دڤێت تەكەزیێ لسەر كارێ كوم بكەن، هەر دەم خوە بدانن پارچەیەك ژ سیستەمێ سەركەڤتنا تیمێ، ئەگەر یاریزانێن كورد مینا مێرخاس دوسكی، ئاكام هاشم ، رێبین سولاقا ، یوسف ئەمین و ماركو فەرەج، هەڤالێن وان یێن دی ئەگەر هاتنە داخوازكرن، دڤێت ب مێشكەكێ ئورۆپی و گیانەكێ كوردستانی بچنە مۆندیالێ، بەلێ هەر دێ مینیت دوور كەڤتن ژ خوە مەزنكرنێ و خوەگونجاندنێ خالا ئێكلاكر بۆ دەركەڤتنا شانازێن مە ب ئالایێ پیرۆزێ كوردستانێ دمەزنترین خرڤەبوونا جیهانی دا.
