شێلادزێ: 50% ژ خه‌لكى بهايێ كاره‌با نشتميانى نه‌دايه
شێلادزێ، نەوزاد ھلۆری:
رێڤەبەریا کارەبا ئامێدیێ دیارکر کو ل سنوورێ ناحیا شێلادزێ چوو کێشەیێن کارەبێ نینە و کارەب لسەر چەند ھێلەکا ھاتیە دابەشکرن، بەلێ 50% ژ خەلکی بھایێ کارەبا نیشتمانی نادەن.
مونیر رێکانی، بەرپرسێ ھوبا پلاندانان ل رێڤەبەریا کارەبا ئامێدیێ بۆ ئەڤرۆ نیوز گۆت: (رەوشا کارەبا نیشتمانی نوکە ل سنوورێ قەزا ئامێدیێ باشە و چ کێشە نینن، بتنێ ل وەرزێ زستانێ ژبەر خواستا پتر یا خەلکی بو کارەبێ ھندەک کێشە دروست دبوون، نوکە ل سنوورێ ناحیا شێلادزێ 215 بگورێن کارەبێ ھاتینە دانان، ھاتە دابەشکرن بو چەند فیدەرەکان، داکو بارگرانی لسەر تورێن کارەبێ دروست نەبیت و وەلاتی نەمینن بێ کارەب).
زێدەتر گۆت: (زێدەباری کو نوکە موچەیێن خەلکی دروست بوینە، بەلێ خەلک پارەی نادەت، نوکە 50% ژ خەلکێ سنوورێ ناحیا شێلادزێ بھایێ کارەبا نیشتمانی نەدایە و دەیندارێن کارەبا نیشتمانی نە، پێشتر ژی نەددان بەلێ ل وی دەمی موچە گیرودبوون، بەلێ نوکە موچە دروستن).
