شێوازێ چێكرنا كەڤالێن وی یێ جودایە
هیڤی كەریم:
شێوەكارێ گەنج (ماهر مستەفا) كو ب (ماهر ئارت) دهێتە نیاسین و شێوازێ چێكرنا كەڤالێن وی ژ گەلەك شێوەكارێن دی یێ جوودایە، د دیدارەكێ دا بۆ رۆژنامەیا ئەڤرۆ گۆت: پتریا دەمێ خوە ئەز ب چێكرنا وێنەیان ڤە دبۆرینم و جوداییا من ل گەل شێوەكارێن دی ئەوە ئەز هندەك جاران كەڤالان ب كەسكاتی و زەرزەواتی چێدكەم و من گەلەك حەزژ ڤی جۆرێ كەڤالان هەیە.
هەروەسا گۆت: هەتا نوكە من پشكداری د هژمارەكا پێشانگەهان دا كریە و پتریا كەڤالێن هاتینە نیشادان ئەو بوون یێن من ب كەسكاتی و زەرزەواتی چێكرین و ئەز دشێم كەڤالان ب گەلەك تشتێن جیاواز چێكەم، بۆ زانین ئەز دەرچۆیێ قوناغا سەرەتایی مە و من ل چو پەیمانگەهێن هونەری نەخواندینە، لێ ژبەر حەزا منا زێدە بۆ كارێ هونەری ئەز یێ بەردەوامم و داهێنانێ دكارێ خوە دا دكەم.