شێوازێ چێكرنا CD من يێ ده‌رخستى
هه‌لبه‌ستڤان شه‌عبان سلێمان ئێك ژ وان هه‌لبه‌سڤانانه يێن خودان ستايله‌كێ خوه يێ تايبه‌ت د هه‌لبه‌ستێ دا هه‌ي، كو دبێژت ئه‌و كه‌سێ ئێكێ بوويه به‌رهه‌مئينانا (CD) و كليپكرنا هه‌لبه‌ستێ كري و ل ده‌زگه‌هێن راگه‌هاندنێ به‌لاڤكري و ئه‌و كه‌سانێن دي يێن د دووڤ وي را هاتين و ده‌ست ب كليپكرنا هه‌لبه‌ستێن خوه كرين زارڤه‌كرنا ستايلێ وي كرينه، ده‌مێ جارا ئێكێ وي هه‌لبه‌ست كليپ كري چه‌ندين ره‌خنێن دژوار ژ ئاليێ هه‌لبه‌ستڤانێن نووخواز ڤه لێ هاتنه كرن.
ژ بۆ زانينا تۆماركرنا كليپا ئێكێ يا شعري و رێبه‌رێن وێ و چێكرنا (CD)يێن هه‌لبه‌ستان و چه‌ندين پرسيارێن دي، مه ئه‌ڤ ديداره ل گه‌ل كريه.
ئه‌ڤرۆ: ده‌ستپێكا ته ب هونه‌ري بوو ل گه‌ل تيپا سه‌رسنكي و يا شۆره‌شڤان، ئه‌ڤه چاوا بوو؟
د سالێن هه‌شتيان دا من تيپا سه‌رسنكي يا مۆزيكي دامه‌زراند و هه‌لبه‌ست بۆ سترانێ نڤيسين. پاشي هاتمه باژێرێ دهۆكێ و ناڤنجيا خواندنێن ئيسلامي ب دووماهي ئينا، د وي ده‌مي دا بوويمه ئه‌ندامێ تيپا شۆره‌شڤان يا هونه‌ري. ل سالا 1986 ل زانكۆيا به‌غدا (كوليژا شريعێ/ پشكا خواندنێن ئيسلامي) هاتمه وه‌رگرتن، د وێ قۆناغێ دا چه‌ندين هوزان د پاشكۆيێ عيراق و رۆژناما بزاڤ دا به‌لاڤكرينه. پشتي سه‌رهه‌لدانێ ل سالا 1991 بوويمه رێڤه‌به‌رێ راديۆيا (FM) ده‌نگێ قوتابي و لاوان ل ده‌ڤه‌را ئامێدي. جارا ئێكێ وه‌ك ئه‌زموون هژماره‌كا زور ژ هوزانێن خوه وه‌ك تۆمارا ده‌نگي ل گه‌ل موزيكێ ل راديويێ به‌لاڤبوون، خودانێ يه‌كه‌م دراما ته‌له‌فزيوني بوويمه ب نڤيسين وزارڤه‌كرن ل شاشا ته‌له‌فزيونا (خه‌بات ) ل دهوكێ، د دووڤدا ب دامه‌زراندنا (په‌ياما ده‌ڤه‌را ئامێديێ) رابوويمه وه‌ك دامه‌زرێنه‌ر و ئاماده‌كار و ده‌رهێنه‌ر و شيايمه پتر ژ (60) كورته چيرۆكان پێشكێشي ته‌له‌فزيۆنا دهۆكێ بكه‌م.
ئه‌ڤرۆ: هزرا چێكرنا ( CD) چاوا بۆ ته هات و ئێكه‌م ( CD ) كه‌نگي ته تۆماركر و كێ پشته‌ڤانيا ته كر؟
ل سالێن نۆتان و پشتي من ئه‌و ئه‌زموون ل راديويێ كري دووڤدا يه‌كه‌م هزر هات خوه چه‌كداركرن، بۆ خواندنێ ل سه‌ر رێك و رێبازێن هوزانێ و هزرا دانانا رێك و ستايله‌كێ نوو ما ل گه‌ل من هه‌تا كو سالا 2000 من بريارا ده‌ركرنا ڤي ستايلي داي، ژ به‌ر كو ل وي ده‌مي ل دهوكێ ديواره‌ك د ناڤبه‌را خه‌لكي و هوزاني دا په‌يداببوو، گه‌له‌ك جاران هنده‌كان مرنا هوزانێ راگه‌هاند بوو، من بريارا هاتنا ناڤ گۆره‌پانا هوزانێ دا ب ستايلێ خوه يێ ڤه‌كري و ب ره‌نگێ (ديوان سيدي) ده‌نگ و موسيقا دا. من هه‌مي فه‌رهه‌نگێن زمانێ كوردي يێن پێك داداين و زمانێ شرين و ڤه‌كري و ئاسان ژ ده‌ڤۆكا به‌هدينان، من په‌يره‌وكر. ديوانا خوه يا ئێكێ ل ژێر ناڤێ (تورا ئه‌ڤينێ) ب هاريكاريا ئه‌مير سه‌ديق ل ستۆديا راديۆيا دهۆكێ من توماركر و ل تۆمارگه‌ها دۆسكي ب هاريكاريا شيرزاد باجلوري و لقمان دۆسكي من ب ده‌نگ ل سه‌ر سيدي و كاسێتان به‌لاڤـ كريه كو جارا ئێكێ بوو هوزان دهێته به‌رهه‌مهێنان و لايه‌ك خوه لێ دكه‌ته خودان و ل بازاري دهێته فرۆتن. ئه‌زموونه‌ك بوو ره‌نگه‌كێ سه‌رده‌م يێ گه‌هاندنا هوزانێ و پاشي بوو ستايله‌ك د سالێن دووڤدا هوزانڤانا (CD) چێكرن و تۆمارگه‌ه و كۆمپانيا خوه ل (CD) يێن خه‌لكه‌كێ دي كريه خودان. ئه‌و به‌رهه‌م نياتيه‌ك بوو بۆ وه‌رگري و ناڤه‌رۆك بانگه‌ك بلندبوويه بۆ ژ خه‌و راكرنا خه‌لكي ژ پالپشتيا هه‌ڤركێن سياسي بۆ رێزگرتنا كوردينيێ، پتري ره‌نگێن حزبا من بۆ هه‌لبژارتنان ستايلێ خوه وه‌سا باوه‌ري هه‌بوو خه‌لك شاره‌زايه ئێدي ل خوه‌شي و مفايێ خوه دگه‌ريت نه ل زه‌خره‌فه‌و مامكێن هوزانان و وه‌رگر نه ئاماده‌يه بچيت ل فه‌رهه‌نگان بگه‌ريت كا هوزانڤاني چ گۆتيه.
ئه‌ڤرۆ: كليپا ته يا ئێكێ كه‌نگي وه‌كو شعر ته تۆمار كر؟
ل سالا 2004 ده‌مێ من ديوانا دويێ ب ناڤێ (په‌ياما عه‌شقێ) ديسا ب ده‌نگ ل سه‌ر سيدي و كاسێت به‌رهه‌م ئينايه و بۆ ئاڤاكرنا ديواره‌كێ دي يێ موكم دستايلێ خوه‌دا ،هزرا دروستكرنا كليپا شعري يا ئێكێ ل سه‌ر داخوازيا هونه‌رمه‌ند هه‌رمان محه‌مه‌د تاهر بوو، ده‌مێ دكيۆمه‌نته‌ك ل سه‌ر ستايلێ من يێ نوو يێ هه‌لبه‌ستێ دروستكر د گه‌لدا سيناريۆ و وێنه و مونتاژێ يه‌كه‌م كليپا من كر كو دهێته هه‌ژمارتن بزاڤا ئێكێ بۆ دروستكرنا (كليب شعر) ل كوردستانێ، ئێدي شێوازێ (CD) و كليپكرنا هه‌لبه‌ستێ پشتي ڤێ ميژوويێ خه‌لكي زارڤه‌كرنا من كريه، ئه‌و ژي پشتي گه‌له‌ك ديدار و چاڤپێكه‌تنێن راديۆ و ته‌له‌فزيۆن و رۆژنامه و كۆڤاران و خورتبوونا بازارێ كڕينا هوزانا سيدي و فرۆتنا وێ ل تۆمارگه‌ه و نڤيسينگه‌هێن سيديان نموونه ده‌زگه‌هێ (حسن شريف) يێ به‌رهه‌مهێنانێ ل دهوكێ خوه ل به‌رهه‌مێ وي يێ نوو كره خودان و (8000) دانه ژ سيدي و كاسێت ژێ كوپي و به‌لاڤكرن و فرۆتن كو يه‌كه‌م جاره و ئه‌زموونه ل دهوكێ و كوردستانێ هوزان وه‌ك ستران دبيته به‌رهه‌مئينان و دهێته فرۆتن.
ئه‌ڤرۆ: هزرا تێكه‌لكرنا ستران چاوا بۆ ته چێبوويه؟ و گه‌له‌كێن دي وه‌كي ته دكن، ئه‌ڤه چ مه‌سه‌له‌يه؟
ئه‌ز به‌رده‌وام ل نووكرن و پێشخستنا ستايلێ خوه دگه‌ريام و ئه‌ڤ هزره ب هاريكاريا هونه‌رمه‌ند حاجي زاخۆيي بۆ من هات. د سالێن 2005 و دووڤدا ده‌مێ ئه‌م ل ئاهه‌نگ و ديدارێن ته‌له‌فزيۆني دگه‌هشتين ئێك، وي دستراند و من هه‌لبه‌ست دگۆتن، پاشي بوو نه‌ريته‌ك. لێ ب تنێ ئه‌ز و حاجي هه‌تاكو من كليپا (رابه خاني) چێكري كو تێدا من سترانا (راپ) ل گه‌ل خواندنا هوزانێ و كوپله‌كا سترانه‌كا فولكلۆرێ كوردي تێكه‌لكرينه، لێ مخابن هه‌ر پێنگاڤا من هاڤێتي بۆ نووكرنا ستايلێ خوه هنده‌ك هه‌بووينه كۆپي بكه‌ن و ل دووڤ من دا چێكه‌ن. دا كو پتر هوزانا خوه به‌ر ب بيانيان ڤه ببه‌م بزاڤا دي ئه‌و بوو من هوزانه‌ك چێكر و كاك زه‌يد گيتار لێدا و نيڤا وێ ڤه‌گوهاسته ئينگليزي و مه پيگڤه گۆت.
د هنده‌ك كۆپلێن شعري يێن ته و بورهان زێباري دا مرۆڤ هه‌ست دكه‌ت كو ئێك شعره و په‌يڤ گه‌له‌ك نێزيكي ئێكن، لێ ده‌نگ جودانه، كێ ژ كێ وه‌رگرتيه؟
ئه‌و راسته، نه ل گه‌ل ناڤبري ب تنێ، به‌لكو ئه‌ڤ هه‌ڤپشكيه ل گه‌ل زوربه‌يي هه‌ڤالێن من يێن هوزانڤان ئه‌وێن پشتي من ئه‌ڤ ستايله هه‌لبژارتي و د دووڤ من دا (CD) چێكرين و كليپ دروستكرين و بزاڤ كري وه‌ك من سترانێ و هوزانێ تێكه‌ل بكه‌ن، بۆ مرۆڤي ڤي هه‌ستي په‌يدا دكه‌ت، لێ گه‌له‌ك يا ئالۆز نينه و گه‌له‌ك ب ساناهيه چ كه‌سێ دووڤچوونێ بكه‌ت، گه‌له‌ك ب ساناهي دي دياربيت كا كێ جارا ئێكێ گۆتيه و تۆمار و به‌لاڤكريه، يا دياره كي پێشره‌و بوويه و كي زارڤه‌كره بوويه د هه‌ر پينگاڤه‌كێ دا.
ئه‌ڤرۆ: ده‌مێ ته شعرێن خوه كليپكرين گه‌له‌ك ره‌خنه ژ ئاليێ هه‌لبه‌ستڤان ڤه ل ته هاتنه‌كرن، لێ نوكه ئه‌ڤ چه‌نده يا دبته ديارده و ئه‌وێن دوهي ره‌خنه دكرن ئه‌و ب خوه يێن كليپان چێدكن، تو بۆ ڤێ دوانيێ چ دبێژي؟
ده‌مێ من ستايلي هه‌لبه‌ستا په‌ياما ڤه‌كري په‌يداكري و (CD) دروستكري، جارا ئێكێ بوو د ديرۆكا هه‌لبه‌ستێ دا بوويه به‌رهه‌مهێنان و كۆمپانيا خوه لێ كرينه خودان و كريه بازار و فرۆتنا ده‌نگي وه‌كي (CD)يێن سترانبێژان هێره‌شه‌كا گه‌له‌ك دژوار هاته سه‌ر من ژ لايي نووخوازان ڤه، به‌لكو د ديداره‌كا ته‌له‌فزيۆني دا براده‌ره‌كي ئاشكه‌را گۆت ((حه‌قي ڤان كه‌سان ئعدامكرنه يان نه‌في كرنه بۆ وه‌لاته‌كێ بيدائي د ناڤ مه‌دا مستاهلي ژيانێ نينن))، لێ به‌رسڤا من ئه‌و بوو، من پتر باوه‌ري دا ستايلێ خوه و من كليپا شعري دروستكر. ڤێجا به‌رپه‌رێن رۆژنامان و ديدارێن ته‌له‌فزيۆني و راديۆيا د هه‌ڤڕكيێ دا كليپێ به‌هرا خوه يا هێره‌شكرنێ هه‌بوو، مينا: شعر نابيت كليپ، شعر ب خوه وێنه‌يه چاوا دێ هيته وێنه‌كرن، ئێكي د به‌رسڤا پرسياره‌كێ دا دلێ خوه خرابكر ژ كه‌ني و گۆت: مامۆ شعر ئه‌ده‌به و كليپ هونه‌ره ژ ئه‌رد و ئاسمانان ژێكجودانه!
ئه‌ڤرۆ: مه‌ره‌ما ته ژ ڤي ستايلي چبوويه و ته بزاڤ نه‌كرينه كو ستايلێ خوه ژ سنۆرێن كوردستانێ ده‌رباز بكي؟
سه‌ربه‌ستي دنڤيسينێ ب په‌يامه‌كا ڤه‌كري بج جوانيێك لێ نه په‌يامه‌كا ئێكجار ڤه‌كريك ڤالا ژ هه‌ست و سۆزان، ئه‌ز د شێوازێ خوه‌دا گرنگيێ دده‌مه وه‌رگري و باري ل گه‌ل ب نيڤي دكه‌م، ديسا د شێوازێ خوه‌دا پشتبه‌ستن ب خه‌يالێ و شكاندنا هنده‌ك قانوونان د هوزانێ دا دكه‌م، لێ هه‌مي گاڤا بۆ ب ساناهيكرنێ ژ بۆ وه‌رگري بێي مژداري كو وه‌رگري تێدا به‌رزه‌كه‌ت، بێ ماسك كو راستيێ لێ ڤه‌شێريت، من دڤێت ژ دل و ب هه‌مي باوه‌ري په‌يڤێ ب ساناهي بكه‌مه ئامانه‌ك پاك و رامانێن زێرين بكه‌مه تێدا. من شێوازه‌ك دڤێت تێدا من نه‌ڤێت شكاندنا هه‌ر قالبه‌كي ل گۆر ديتنا خوه يا كه‌سايه‌تي د سه‌رێ وه‌رگري را بشكينم، من دڤێت هوزانا من دوور بيت ژ په‌يداكرنا گۆمانه‌كا وه‌سا كو وه‌رگري پتر ئالۆز كه‌ت و د گومانێ دا بێ باوه‌ر بكه‌م، و ل شوونا زمانێ هوزانێ زيندي بكه‌م، زمانه‌كي ب كه‌يفا خوه ل سه‌ر وه‌رگري بسه‌پينيم، نابيت يه‌كجار دابڕينێ ژ كه‌لتورێ خوه بكه‌م، هه‌ر چه‌نده و دڤيا هوزانڤاني ديتنێن خوه يێن جودا هه‌بن، لێ ديسا نابيت حورمه‌تێ بۆ قودسيه‌تێن ديني ب هه‌مي ره‌نگان وه‌ك ئازاديا هزري نه‌هێلم، من دڤێ شه‌رڤانێ ديتنا خوه بم.
ئه‌ڤرۆ: تو نابيني كو سه‌ليقه و خوه‌شيا ده‌نگێ ته و ته‌مبه‌ليا خوانده‌ڤاني، بووينه ئه‌گه‌ر كو شعرا ته پتر د ناڤ خه‌لكي دا به‌لاڤ ببت؟
من شاره‌زاي د وارێ خواندنا هوزانێ دا په‌يداكر و من زاني هوزانا خوه وه‌ك نوشداره‌كي نشته‌رگه‌ر بكه‌م، ژ ئه‌گه‌را شاره‌زاييا من د ته‌جويدا قرانێ دا! ديسا هوستاييا من د موزيكێ و خواندنا من يا به‌رده‌وام د هونرێ گۆتارێ و (الالقا‌و المسرحي)دا، له‌وا من هونه‌رێ خواندنێ كار پێكر، هه‌ر ژ ده‌ستپێكي هه‌تا كو دووماهيێ و سه‌ره‌ڕايي گوهۆڕينا ده‌نگي ژ هه‌ر هوزانێ بۆ هوزانێ د ناڤ هوزانێ دا گوهۆڕينا ده‌نگي من دكرن.
