شێوازێ گۆتنا وانه‌یان ل كه‌رتی تایبه‌ت پێشكه‌فتی تره ژ یێن حكۆمی
هه‌ولێر، قائید میرۆ
بسپۆره‌كێ په‌روه‌ردێ هۆشداریێ لدۆر لاوازیا كه‌رتێ په‌روه‌ردێ دده‌ت و دبێژیت، پشتی سالا 2005ێ خواندن بوویه پاره و زێده‌تر پاره‌ی رۆل هه‌یه د كه‌رتێ په‌روه‌ردێ هه‌روه‌سا ئاشكراكر، پێدڤیه سیاسه‌تا په‌روه‌ردێ بهێته گۆهڕین و ژبلی زمانێ دایكێ قوتابی د قۆناغێن بنه‌ڕه‌تی و ئاماده‌یی فێری دو زمانێن بیانی ببن.
عه‌دنان مه‌جید، بسپۆرێ كه‌رتێ په‌روه‌ردێ بۆ رۆژناما ئه‌ڤرۆ گۆت” پێدڤیه پێنگاڤێن كریاری بۆ گۆهۆڕینا كه‌رتێ په‌روه‌ردێ، ڤالاهیه‌كا مه‌زن د كه‌رتێ په‌روه‌ردێ دا هه‌یه و په‌روه‌ردیچ نه‌شێت تاكه‌كی په‌روه‌رده بكه‌ت بۆ ئه‌ڤی ولاتی، دڤێت دوباره سیاسه‌تا په‌روه‌ردێ بهێته دارشتن بشێوه‌یه‌كی پلانا حوكمه‌تێ و په‌روه‌ردێ دیاربیت بۆ نموونه پرسیاره‌كا جوگرافیێ ل قوتابیه‌كێ ئاماده‌یی بكه‌ت تشته‌ك بیر نه‌مایه، ماده‌م قوتابی پشتی ته‌مام كرنا قۆناغا ئاماده‌یی وانه لبیر نه‌مابیت ئه‌ڤه واتایا ڤێ چه‌ندێ دده‌ت ئاریشه د فێركرنێ دا هه‌یه، ئه‌ز باوه‌رم باشترین چاره‌سه‌ر بۆ گۆهۆڕینا كه‌رتێ په‌روه‌ردێ ئه‌ڤه ژبلی زمانێ دایكا زمانێ ئینگلیزی و زمانه‌كێ دیژی بهێنه زێده‌كرن، واته قوتابی فێری زمان ببیت، چونكه مه بڤێت و نه‌ڤێت ئه‌ڤرۆ سه‌رده‌م یێ هاتیه گۆهڕین و دڤێت ئه‌م ژلایێ په‌روه‌ردێ ڤه خۆ بگۆهڕین، ئه‌ڤرۆ ده‌رچوویه‌كێ زانكۆیێ هه‌گه‌ر زمانه‌كێ بیانی نه‌زانیت بتایبه‌تی ئینگلیزیێ ئه‌ڤه ده‌لیڤا كاری بۆ نینه، پشتی چه‌ند سالێن دی هه‌ر ئێكجار دێ بیته مه‌رج هه‌روه‌كی ل زۆر لایانڤه بوویه مه‌رج بۆ وه‌رگرتنا كارمه‌ندان، هه‌گه‌ر قوتابی د قۆناغێن بنه‌ڕه‌تی و ئاماده‌یی فێری دوو زمان ببیت ئه‌ڤه دێ كاریگه‌ری لسه‌ر ئاستێ زانستیێ قوتابی هه‌بیت.
ئه‌ڤی بسپۆرێ كه‌رتێ په‌روه‌ردێ ئاماژه‌كر بێی زانینا زمانێن بیانی باوه‌رنامه تنێ وه‌ره‌قه‌یه‌كه دده‌ستێ قوتابی دا و بارگرانیه لسه‌ر حوكمه‌تێ ژی، چونكه قوتابی پشتی ده‌رچوونێ هه‌ر چاڤه‌ڕێی حوكمه‌تێ دكه‌ت بهێته دامه‌زراندن، به‌رۆڤاژی ئه‌گه‌ر قوتابی سێ زمانا بزانیت ئه‌ڤه دێ هاریكاریه‌كا زۆر مه‌زن بیت بۆ قوتابی پشتی ده‌رچوونێ.
عه‌دنان مه‌جید دیاركركو ئه‌جێندا وه‌زاره‌تا په‌روه‌ردێ یا زانستی نینه، چونكه جوداهیه‌كا زۆر دناڤبه‌را قوتابخانێن ئه‌هلی و یێن حوكمه‌تێ دا هه‌یه، شێوازێ گوتنا وانه‌یان ل قوتابخانه‌یێن كه‌رتێ تایبه‌ت زۆر پێشكه‌فتی تره ل وانه‌یێن كه‌رتێ حوكمه‌تێ، ئه‌ڤێ چه‌ندێ ژی ئاریشه‌یه‌كادی بۆ جڤاكێ مه په‌یداكریه، جڤاك لسه‌ر هه‌ژار و ده‌وله‌مه‌ندا به‌لافكریه قوتابیێ هه‌ژار ئه‌گه‌ر یێ زیره‌كژی بیت ل قوتابخانێ نه‌چاره هه‌ر بچیته قوتابخانا حوكمه‌تێ و قوتابیێن ده‌وله‌مه‌ندژی دچنه قوتابخانێن ئه‌هلی و پێشكه‌فتی، ل قۆناغا زانكۆیێ ژی هه‌مان ئاریشه هه‌یه قوتابیێ ده‌وله‌مه‌ند پشتی قۆناغا قوتابخانێ دێ چیته زانكۆیا ئه‌هلی و كارژی دێ بده‌ستڤه كه‌ڤن، ژبه‌ركو فێری كار و زمان دبیت قوتابیێ هه‌ژارژی هه‌ر دێ وه‌ك خۆ ل زانكۆیێن حوكمه‌تێ تنێ باوه‌رنامێ بده‌ستڤه ئینیت بێ به‌رهه‌م، مخابن پشتی سالا 2005ێ پاره رۆلێ خۆ دبینیت ل كه‌رتێ په‌روه‌ردێ.
