شێوه‌كاره‌ك: هێشتا شێوه‌كارێن كورد نه‌گه‌هشتینه ئاستێ شێوه‌كارێن جیهانی
ئه‌ڤرۆ، زنار تۆڤی:
شێوه‌كار ناسر غازی زاده، خه‌لكێ رۆژهه‌لاتێ كوردستانێ یه و ل باژێرێ سه‌قز ژ دایك بوویه، پاشی چوویه باژێرێ سه‌رده‌شت و ل وێرێ ژیانا خوه بوراندییه، نوكه ل پاریس ل پایته‌ختێ فره‌نسا دژیت، د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ دیار كر: ل باژێرێ سه‌رده‌شتێ بابێ وی مامۆستا بوویه، ده‌مێ ئه‌و زارۆك وی حه‌زه‌كا مه‌زن ل سه‌ر هونه‌ری و چێكرنا وێنه‌یان هه‌بوو، پشتی وی خواندنا خوه ل سه‌ر ده‌شتێ ب دووماهی ئینای، وی قه‌ستا باژێرێ مهابادێ كریه و ل وێرێ باوه‌رناما دبلۆمێ وه‌رگرتیه، پاشی وی ل زانكۆیا ته‌هرانێ پشكا هونه‌ری خواندیه و بوویه مامۆستا ل هه‌مان زانكۆ، ئه‌ڤه نێزیكی 50 سالانه ئه‌و د وارێ هونه‌ری دا كار دكه‌ت و كه‌ڤالان دروست دكه‌ت.
ناڤهاتی گۆت ژی: ل سالا 1983 من قه‌ستا ده‌رڤه‌ی وه‌لاتی كریه و ئه‌ز هاتیمه پاریس ل فره‌نسا، پاشی ئه‌ز چوومه زانكۆیا سۆربوون، من ل پشكا هونه‌ری خواند، من باوه‌رناما ” دێ، ئو ، ئا ” ل وێرێ وه‌رگرت، ل دووڤ دا من دڤیا باوه‌رناما دكتۆرایێ ل زانكۆیا سۆربوون بخوینم، لێ ژ به‌ر هنده‌ك ئه‌گه‌ران ئه‌ز نه‌شیام دكتۆرایێ ته‌مام بكه‌م، هه‌روه‌سا به‌ری ئه‌ز بهێمه فره‌نسا ناڤارۆكا پرانیا كه‌ڤالێن من ل سه‌ر ریالیزما سۆسیالی بوون، به‌لێ پشتی ئه‌ز هاتیمه فره‌نسا من وه‌سا دیت، كو ئه‌ڤ كه‌ڤالێن به‌ری نوكه من چێكرین خزمه‌تا هونه‌رێ من ناكه‌ت، ب تایبه‌تی ژی ل زانكۆیا سۆربوونێ، هنده‌ك هونه‌رمه‌ندێن بیانی كارتێكرنا خوه ل سه‌ر من هه‌بوو، له‌وما من شێوازێ خوه گۆهارت، من چه‌ندین پێشانگه‌هێن شێوه‌كاری ل فره‌نسا ڤه‌كرینه و پێشانگه‌هه‌ك ژ وان بۆ ده‌مێ دو هه‌یڤان رۆژان ل سه‌ر ته‌له‌ڤزیۆنێن فره‌نسی هاته نیشاندان و وه‌زیرێ ده‌رڤه یێ فره‌نسا كلۆد مالۆرێ یێ وی سه‌رده‌می سه‌ره‌دانا پێشانگه‌ها من كر و كه‌ڤالێن من ل سه‌ر ژیان و ژیارا كوردان بوو، من ل سه‌ر كه‌نالێن ته‌له‌ڤزیۆنی یێن فره‌نسی به‌حسێ نه‌هامه‌ت و ده‌رده‌سه‌ریێن كوردان كر.
ناسر هێشتا دبێژیت: ل فره‌نسا من سینه‌ماكارێ كورد یلماز گۆنه‌ی ژی دیتییه و چه‌ندین جاران مه هه‌ڤدیتن ژی ل سه‌ر هونه‌رێ كوردی ئه‌نجامداینه، د هه‌مان ده‌مدا خانما دانیال میته‌ران ژی چه‌ندین جاران هاتییه ئه‌نیستیتۆیا كوردی ل پاریس و كه‌ڤالێن من ل وێرێ دیتینه، هه‌تا نوكه من 41 پێشانگه‌هێن شێوه‌كاری ڤه‌كرینه، پرانییا وان پێشانگه‌هێن من یێن تایبه‌ت بووینه و ناڤه‌رۆكا كه‌ڤالان ژی ل سه‌ر كوردان ژین و ژیار و ده‌رده‌سه‌ریێن وان بووینه، من ڤییایه ده‌نگێ كوردان بگه‌هینمه هه‌موو خه‌لكێ جیهانێ، د نوكه دا ئه‌ز گه‌له‌ك كار ل سه‌ر كۆلبه‌ران دكه‌م، ل رۆژهه‌لاتێ كوردستانێ و ئێش و ئازارێن وان دكه‌مه كه‌ڤال و به‌لاڤ دكه‌م، د هه‌مان ده‌مدا من هه‌ڤپه‌یڤین ل گه‌ل ئه‌نیستیتۆیا كوردی ل پاریس كرینه، كو ئه‌ز پێشانگه‌هێ لسه‌ر ژیانا كۆلبه‌ران ل رۆژهه‌لاتێ كوردستانێ ل ئه‌نیستیتۆیا كوردی ڤه‌كه‌م، به‌رپرسێن مه‌زن یێن فره‌نسی دێ ل وێ پێشانگه‌هێ به‌رهه‌ڤ بن، مه به‌رهه‌ڤی بۆ ڤی بابه‌تی كرینه.
وی شێوه‌كاری ئه‌و چه‌ند ژی ئاشكرا كر: پشكه‌كا كه‌ڤالێن من ل سه‌ر ئێش و ئازارێن ژنا كورد بووینه و هێشتا جڤاكێ مه ب چاڤه‌كێ و كێ م ب چاڤێ عه‌شاییری به‌رێ خوه دده‌نه ژنان، ژن نه‌شییاییه جهێ خوه ب دروستی په‌یدا بكه‌ت، دڤێت ژنان ژی وه‌كو مێران مافێ خوه هه‌بیت، بشێن ده‌ربرینێ ژ بیر و بۆچوونێن خوه بكه‌ن، له‌وما دناڤا كه‌ڤالێن خوه دا، ئه‌ز وه‌سان نیشان دده‌م، كو جهێ ژنان ژ یێ زه‌لامان بلندتره، دڤێت رێز ل ژنان بهێته گرتن، چونكی ژن نیڤا جڤاكینه.
ناسری ئه‌و ژی گۆت: ژ بلی وه‌لاتێ فره‌نسا وی ل چه‌ندین وه‌لاتێن ئورۆپی پێشانگه‌ه ڤه‌كرینه، د هه‌موو پێشانگه‌هێن من گه‌له‌ك خه‌لك به‌رهه‌ڤ بووینه و خه‌لكێ فره‌نسی پتر ژ یێن كورد كه‌ڤالێن من دكر، هێشتا ره‌وشه‌نبیریا كرینا كه‌ڤالان لده‌ف كوردان په‌یدا نه‌بوویه، ل گه‌له‌ك جهێن گرنگ یێن حكومه‌تا فره‌نسی كه‌ڤالێن من هاتینه هه‌لاویستن، ب رێیا تۆرێن جڤاكی ئه‌ز كه‌ڤالێن خوه دفرۆشم، ئه‌ز شییایمه ب ڤێ رێكێ داهاته‌كێ باش ب ده‌ست خوه بێخم، هه‌روه‌سا وه‌كو پێدڤی من په‌یوه‌ندی ل گه‌ل شێوه‌كارێن كورد نینه، هه‌ر چه‌نده گه‌له‌ك جاران من بزاڤ كرینه، كو ئه‌م شێوه‌كارێن كورد پێكڤه كار بكه‌ین، لێ ئه‌م نه‌شییاین ڤێ پێنگاڤێ بهاڤێژین، ئه‌ڤ چه‌نده ڤه‌دگه‌ریت بۆ بیروباوه‌رێن سیاسی، دیسان ل هه‌رێما كوردستانێ شێوه‌كارێن كورد شییاینه كارێن گه‌له‌ك باش و سه‌ركه‌فتی ئه‌نجام بده‌ن، ل رۆژهه‌لاتێ كوردستانێ پێنگاڤێن باش هاتینه هاڤێتن.
ناڤهاتی ئه‌و ژی خویاكر: ئه‌م نه‌شێین شێوه‌كارێن كورد ب یێن ئورۆپی هه‌ڤبه‌ر بكه‌ین، چونكی ل ئورۆپا هونه‌ری تایبه‌تمه‌ندییا خوه هه‌یه و ئه‌ڤ چه‌نده ل كوردستانێ نینه، دیسان هێشتا شێوه‌كارێن كورد نه‌گه‌هشتینه ئاستێ شێوه‌كارێن جیهانی، هێشتا هونه‌ر ل ده‌ف مه تشته‌كێ نوویه، دیسان ل رۆژهه‌لاتێ كوردستانێ ئاریشێن ئایینی هه‌بووینه، ڤێ چه‌ندێ وه‌كرییه، كو هونه‌ری هند گرنگییا خوه هه‌بیت و نه‌شییایه جهێ خوه بكه‌ت، له‌وما هه‌تا نوكه مه هونه‌رمه‌ندێن كورد ل سه‌ر ئاستێ جیهانی نینن.
