شێوه‌كاری پارچه‌كا گرنگه ژ ژیانا من
زنار تۆڤی:
سۆلتان محه‌مه‌د عه‌بدوللا، شێوه‌كاره‌كێ گه‌نجه، د دیداره‌كێ دا بۆ رۆژناما ئه‌ڤرۆ دبێژیت: هه‌ر ژ زارۆكاتیا خوه من حه‌ز ل سه‌ر چێكرنا وێنان و كارێ شێوه‌كاریێ هه‌بوو، له‌ورا من هنده‌ك جاران وێنه چێدكرن، مالباتا من و هه‌ڤالێن من گه‌له‌ك پشته‌ڤانیا من كرینه‌هه‌تا گه‌هشتیمه ڤی ئاستی، نوكه ئه‌ڤ به‌هره‌یه ل ده‌ف من مه‌زن بوویه و شێوه‌كاری بوویه پارچه‌كا گرنگ ژ ژیانا من.
ناڤهاتی گۆت: ناڤه‌رۆكا كه‌ڤالێن من ل دۆر سرۆشتێ كوردستانێ و ئاشۆپی و مرۆڤایه‌تیێ نه، دیسان ئه‌ز كه‌ڤالان ل دووڤ هزر و حه‌زا خوه ژی چێدكه‌م، نوكه كاری ل سه‌ر چێكرنا كه‌ڤاله‌كێ مه‌زن یێ مێژوویی دكه‌م، كو ده‌ربڕینێ ژ مێژوویا كوردستانێ دكه‌ت، لێ هه‌تا نوكه من پشكداری د چو پێشانگه‌هێن شێوه‌كاری دا نه‌كریه، ئه‌ڤ چه‌نده ڤه‌دگه‌ریت بۆ نه‌بوونا پشته‌ڤانیێ، ب تنێ من پشكداری د پێشانگه‌هێن قوتابخانێ دا كریه، له‌وما یا گرنگه ئه‌ز پشكداریێ د پێشانگه‌هێن شێوه‌كاری دا بكه‌م دابشێم باشتر به‌هره و هونه‌رێ خوه بده‌مه نیاسین.
ل دووماهیێ گۆت: ب دیتنا من نوكه ئاستێ هونه‌ری ل سه‌نته‌رێ باژێرێ دهۆكێ یێ باشه، لێ ل قه‌زا و ناحیێن گرێدایی دهۆكێ یێ كێمه ل چاڤ باژێرێن دی یێن كوردستانێ، دیسان هیڤیا من ئه‌وه، كو جهێن شۆله‌ژێ هاریكاری و پشته‌ڤانیا من بكه‌ن، داكو پتر شیانێن من د بۆارێ شێوه‌كاریێ دا ده‌ركه‌ڤن و ئه‌ز ژی بگه‌همه هیڤیا خوه و ببمه شێوه‌كاره‌كێ خودان شیان ل سه‌ر ئاستێ دهۆكێ، هه‌روه‌سا من هنده‌ك كه‌ڤالێن خوه ب ریێا ئۆنلاین فرۆتینه، هنده‌ك ژی من ئیناینه دهۆكێ و فرۆتینه، دیسان ئه‌ز وه‌ك شێوه‌كاره‌ك من گه‌له‌ك حه‌ز ل سه‌ر چێكرنا كه‌ڤالان هه‌یه، ئانكو كانێ چاوا نه‌ساخه‌كێ پێدڤی ب ده‌رمانان و چاره‌سه‌ریێ هه‌یه، من ژی وه‌سا پێدڤێ ب فرچا و بۆیاغێ هه‌یه.
