شێوەكارەكێ كورد باوەرنامەیەكا جیهانی وەرگرت
رەمەزان زەكەریا
شێوەكار و كاریكاتۆرڤان (هەندرێن خۆشناو) شیا باوەرنامەیا رێزلێنانێ د پێشانگەها نێڤدەولەتیا پۆستەری دا ل وەلاتێ كۆریایا باشور ب دەستڤە بینیت، كو ئەڤە وەك دەستكەفتەكێ نوو بۆ هونەرێ كوردی ل سەر ئاستێ جیهانێ دهێتە هژمارتن.
ناڤهاتی، د دیدارەكێ دا بۆ رۆژنامەیا ئەڤرۆ گۆت: ل نیسانا 2025 داخوازنامەیەكا فەرمی بۆمن هات كو پشكداریێ د پێشانگەهەكا گەڕۆك یا نێڤدەولەتی دا بكەم، ئەڤ پێشانگەهە ژلایێ چەندین رێكخراوێن پیشەیی یێن دیزاین و هونەری ڤە ل كۆریا باشور هاتبوو رێكخستن و داخوازنامە بۆ نێزیكی (2000) هونەرمەندان ل سەرانسەری جیهانێ هاتبوو فرێكرن، بەلێ پشتی پشكنینەكا هوور ژلایێ لژنەیەكا بسپۆڕ ڤە ب تنێ كارێن (145) هونەرمەندان ژ ()28 وەلاتێن جودا هاتنە وەرگرتن كو كارێ من ژی ئێك ژ وان بوو، پێشانگەهـ ل ژێر ناڤ و نیشانێن گرێدانا جیهانێ ب ئەڤینی و ئاشتیێ هاتبوو ڤەكرن، وەرگرتنا باوەرنامێ نیشانا پووتە پێدانێ یە ب پەیاما ئاشتیێ و سەلماند كو هونەرێ كوردی دشێت سنۆران ب بەزینیت و پەیامەكا مرۆڤایەتی بگەهینیتە جیهانێ.
