شێوەکارەک: جھێن پەیوەندیدار وەکو پێدڤی خزمەتا ھونەرمەندان ناکەن
ئەڤرۆ، ژێگر سادق:
سەرماوز محەمەد، شێوەکارەکا پارێزگەھا دھۆکێ یە د دیدارەکێ دا بۆ رۆژناما ئەڤرۆ دیار کر کو ئەو دەرچوویا پەیمانگەھا ھونەرێن جوانە و نوکە ژی رێڤەبەرا پشکا چالاکیانە ل پەروەردا شێخان و پشکداری د چەندین کار و چالاکیێن ھونەری ل دەڤەرێ دا کریە.
ناڤھاتیێ ئاماژە دا وێ چەندێ کو ھەر ژ زارۆکینیێ وێ حەزا کارێ ھونەری ھەبوویە و دەست ب ھونەرێ شێوەکاری کریە و بۆ گەھشتنا خەونێن خوە خوە ماندوو کریە و گۆت: “ھونەر د بەرێ دا نەبوویە ژێدەرەکێ داھاتی، بەلێ د نوکە دا باشترە پشتی گەلەک ھونەرمەندان بزاڤ کری کو ھونەرێ خوە د بیاڤێ بازرگانی دا بکار بینن و مفای بگەھینە بیاڤێ ئابووری و وەلاتی، بەلێ مخابن کو جھێن پەیوەندیدار ب ھونەری و ھونەرمەندان ڤە نەشیاینە وەکو پێدڤی خزمەتا ھونەرمەندان بکەن”.
سەرماوزێ خویا کر کو ئەو کەڤالێن خۆ ب شێوەیەکێ تایبەت دروست دکەت و دەزی و پەرۆکان و چەندین کەرەستێن ھشک کری ب کاردئینیت بۆ وێ چەندێ ھونەرێ خوە ب شێوەیەکێ جوانتر پێشکێشی مرۆڤایەتیێ بکەت و گۆت: “کارێ بازرگانی یێ باشە مرۆڤ بکەت دا بشێت پتر خزمەتا کارێن خوە بکەت، چونکی مرۆڤ ب رێیا داھاتی پتر دشێت کارێن خوە یێن ھونەری بەرفرەھـ بکەت”.
ناڤھاتیێ گۆت: “ھەر کەسەکی ھزر ھەنە، بەلێ ھزرا من یا تایبەتە کو بکەم و ھەتا نھا نەشیایمە بکەم ئەو ژی ئەوە من دڤێت پێشانگەھەکێ ل دەرڤەی وەلاتی ڤەکەم کو ئەڤە ددەمەکی دایە ھندەک ژ بەرھەمێن من چووینە وەلاتێن ھولەندا و ویلایەتێن ئێکگرتی و ئەلمانیا و بریتانا، بەلێ مخابن ئەڤە نە خەونا من یا مەزنە، بەلکو من دڤێت پێشانگەھەکا مەزن ل وەلاتێن جودا جودا ڤەکەم بۆ ھندێ ھونەرێ خوە بگەھینمە ھەموو جیھانێ”.
