شێوەکارەک: چو سنوور بۆ چێکرنا کەڤالان نینن
ئەڤرۆ، ھەرھین محەمەد:
ھونەرمەندێ شێوەکارو پەیکەرساز ھونەر حسێن د دیدارەکێ دا بۆ بەرپەرێ ھونەری یێ رۆژناما ئەڤرۆ گۆت: چ سنوور بۆ چێکرنا کەڤالان نین، ژ بەر کو کەڤال ھەر پێدڤی زێدەکرنێ یە و کار تێدا بھێتەکرن و لیوناردو داڤێنشی چار سالان ل سەر کەڤالێ مونالیزایێ کار کر و ل دووماھیێ ھەر ب دلێ ولی ژی نەبوو و ھەموو دەمان ژی شێوەکار یێ ژ ئاستێ خوە رازی نینە و دەمێ کەسەکێ ژ ئاستی َخوە بلندتر دبینیت بزاڤێ دکەت ژئاستێ وی ژی ببوریت و کارێن جوانتر بکەت و نیشان بدەت و گەلەک تشتەکێ جوانە شێوەکار کەڤالێن خوە ب فرۆشیت، چونکو ھونەرمەندێ شێوەکار پێدڤی ژیانی و پارەی یە و دیسان وی پارەی ژی بکەتە دناڤ ھونەرێ خوە و ھونەرێ خوە پێ زەنگین بکەت و دیسان پتریا ھونەرمەندێن جیھانێ دھەژارن، لەورا کەڤالێن خوە دفرۆشن و ب وی داھاتی دژین.
ھونەری گۆت ژی: پتریا جاران چێکرنا کەڤال و پەیکەران ل دەمێ شەڤێ دروست دکەم، چونکو ل وی دەمی مرۆڤ یێ ئارامە و ھزرێن مرۆڤی د بەرفرەھن و مرۆڤ ھەموو کارێن خوە یێن دی ب رۆژ دکەت و ل وی دەمێ ڤالا ئانکو ب شەڤ ب چێکرنا کەڤال و پەیکەران ڤە دەربازدکەم و پتریا وان کارێن پەیکەرێن ئەز چێدکەم ھەموو یێن مرۆڤانەو ھەرپەیکەرەکی سرۆشتی بیت کێمتر ژ ھەیڤەکێ ب دووماھی دئینم و کەڤالان ژی یێن سرۆشتی چێدکەم و ل سەر داخازیان ژی کەڤال و وێنەیێن مرۆڤان چێدکەم و باراپتریا وان داخازیا وێنەیێن کورانە، چونکو ھەتا نوکە دابو نەریتێن مە یێن کوردی رێگرن ل ھەمبەری کچێ وکچ نەویریت وێنێ خوە ب ھنێریت و بەلاڤ بکەت، یان ئەو شێوەکارە ل پەیجی َخوە بەلاڤبکەت.
ل دووماھیێ ناڤھاتی دبێژیت: جوداھی دناڤبەرا ھونەرمەندێ شێوەکار یێ کور و کچ دا ھەیە شێوەکارێ کور بەردەوامێ ب کارێ خوە دەت ھەتا دووماھیا ژیێ خوە ، بەلێ کچ بتنێ ل تەمەنەکی گرنگیێ ب کارێ خوە ددەت ب تایبەت دەمێ ژیانا ھەڤژینیێ پێک دئینت ب مالێ و زارۆیان ڤە مژوول دبیت و ناگەھیت کارێن نوو یێن ھونەری ئەنجام دەت بتنێ ڤی ھونەری وەکو بیرھاتنەکێ ل دەڤ خوە ھەلدگریت، بەلێ ھەکە جارەکێ زڤری سەر کارێ ھونەری وەکو بەرێ نەشێت کارێن جوان بکەت، چونکو دھونەری دا پێدڤیە رۆژانە راھێنان بھێنەکرن و ھزرێن نوی ب ئافرینت و ب دارێژتە سەر کەڤالی، یان بکەتە پەیکەر.
