شەرع نەشێت رەوشا سووریێ کۆنترۆل بکەت
بسپۆرەکێ کاروبارێن رۆژهەلاتا ناڤین دیار دکەت، رەوشا سووریێ گەلەک ئالۆزە و ئەمریکا بزاڤان دکەت ب رێیا دەستهەلاتا ئەحمەد شەرعی رەوشا سوووریێ ئارام بکەت، لێ روودانێن نها نیشا ددەن ئەحمەد شەرع و دەستهەلاتا وی نەشێن رەوشا سووریێ کۆنترۆل بکەن.
فەهیم تاشتەکین بسپۆرێ کاروبارێن رۆژهەلاتا ناڤین دیار کر، کوشتنا دو سەربازێن ئەمریکا ل سووریێ د دەمەکێ دایە کو چەندین سالن سەربازێن ئەمریکا ل دەڤەرێن ل ژێر کۆنترۆلا هێزێن کوردی دانە و هەتا نها چو زیان ژی نەگەهشتینە هێزێن ئەمریکا، کوشتنا دو سەربازێن ئەمریکا ب دەستێ کەسەکێ کو دبێژن چەکدارەکێ نێزیکی ئەحمەد شەرعی بوویە و هەروەسا ئەندامەکی هێزێن ئێمناهیێ یێ سووریێ بوویە نیشا ددەت کو د ناڤ هێزێن ئەحمەد شەرعی دا گەلەک کەس ل دژی ڤێ یەکێ نە دەستهەلاتا وی ل گەل ئەمریکا کار بکەت، چونکی بەری نها ژی گەلەک هێزێن نێزیکی ئەحمەد شەرعی ل دژی ڤێ یەکێ بوون دەستهەلاتا نوو یا شامێ پەیوەندیان ل گەل ئەمریکا دروست بکەت.
بسپۆرێ کاروبارێن رۆژهەلاتا ناڤین ئەو یەک ژی دیار کر، دیارە ئارمانجا سەرەکی یا ئەمریکا ئەوە دا بشێت ب رێیا ئەحمەد شەرعی داعشێ و هێزێن دی یێن توندرەو ل سووریێ نەهێلیت، ئەو یەک د دەمەکێ دایە کو گەلەک کەسێن نێزیکی شەرعی بخوە کەسێن توندرەون و دبیت پشتی دەمەکێ ئاریشەیێن مەزن ژی ژ بۆ ئەمریکا دروست بکەن و کوشتنا دو سەربازێن ئەمریکا ژی د راستی دا زەنگا مەترسیێ یە بۆ ئەمریکا، دبیت روودانێن وەسا گەلەک جارێن دی ژی روو بدەن، ئەو یەک ژی نیشا ددەت بەرۆڤاژی بزاڤێن ئەمریکا کۆنترۆلکرنا رەوشا سووریێ ژ ئالیێ دەستهەلاتا ئەحمەد شەرعی ڤە کارەک گەلەک زەحمەتە.
فەهیم تاشتەکین د بەردەوامیا ئاخڤتنا خوە دا ئەو یەک ژی دیار کر، پشتی کوشتنا دو سەربازێن ئەمریکی دبیت هەلوەستی ئەمریکا ل هەمبەر دەستهەلاتا ئەحمەد شەرعی بهێتە گوهۆڕین، چونکی نها ژی د ناڤ کۆنگرێسێ ئەمریکا و د ئاستێ وەزارەتێن دەرڤە و بەرگریێ دا گەلەک کەس ل سەر ڤێ باوەریێ نە، کو نابیت ئەمریکا پشتەڤانیێ ل ئەحمەد شەرعی بکەت و پێدڤیە پشتەڤانیا ئەمریکا یا مەرجدار بیت.
بسپۆرێ کاروبارێن رۆژهەلاتا ناڤین سەبارەت ب هێزێن سووریا دیموکرات ژی دیار دکەت، هەسەدێ ب کریاری سەلماندیە کو هێزەکا رێکخستی و چالاکە و شیایە ئارامیا دەڤەرێن باکور و رۆژهەلاتێ سووریێ ژی بپارێزیت، ژ بەر ڤێ یەکێ گرنگە ئەمریکا پێداچوونێ د سیاسەتا خوە ل سووریێ دا بکەت، پێدڤیە هزرەکا مەزنتر بۆ هەسەدێ بهێتە کرن، هەسەدە دشێت ببیتە هێزەکا هەری مەزن و کاریگەر ژ بۆ پاراستنا هەموو سووریێ، چونکی روودانێن ل سوەیدا و دەڤەرێن عەلەویان و ئالۆزیێن نها ل سووریێ هەموو نیشا ددەن، کو ئەحمەد شەرع و دەستهەلاتا وی نەشێن رەوشا سووریێ کۆنترۆل بکەن.
