شەش جهێن شوونواری ل باتیفا هەنە مێژوویا وان بۆ بەری 500 هزار سالان ڤەدگەڕیت
زاخۆ، دلۆڤان هالۆ:
محەمەد مراد، نڤیسەر و كەسایەتیێ ناسیار یێ قەزا باتیفا بۆ ڕۆژناما ئەڤرۆ دیار كر، ل سنوورێ قەزا باتیفا شەش جهێن شوونواری یێن گرنگ لێ هەنە كو مێژوویا وان بۆ ژبەری 50 هزار سالان ڤەدگەڕیت، ژبەر خوە پاراستنێ ژ سەرما و باران و بەفرێن زۆر و گیانەوەرێن دڕندە مرۆڤان كرینە جهێن ئاكنجیبوونا خوە.
ناڤهاتی ئاماژە ب وێ چەندێ ژی كر، ژ وان جهێن شوونواری یێن قەزا باتیفا ناوسكا گەلیێ دەم دەمووكا یە ل گۆندێ ئاڤهێ، ئەڤ ناوسكە د كەڤری دا هەلكۆلایی یە و جهێ سێ كەسان د ناڤ وێ ناوسكێ دا دیارە كو وەسا ئاشكرا دبیت خێزانەكا سێ كەسی لێ ژیایە، ل جهەكێ دی یێ شوونواری ل باكوورێ باتیفا دوو ناوسك ل پشت كانیا قوقولێ ل گۆندێ بەهنوونێ هەنە كو ئەڤ هەر دوو ناوسكە د كەڤرەكێ دا هەلكولاینە و هەر ئێك ژ وان جهێ چار كەسان لێ هەیە.
گۆت ژی:»ل جهەكێ دی دوو ناوسك ل تەنشت خابیری ل ناحیا بێگۆڤان ژی هەنە كو د كەڤرەكێ مەزن دا هەلكوولایی نە، وەكو تەختان دهێنە پێش چاڤ و هەر ناوسكەك جهێ ڤەحەواندنا سێ كەسان بوویە، هەر دیسان ل نێزیك كانیا گۆندێ ڕۆیسێ ل هنداڤ خابیری دوورگەهەكا شوونواری لێ هەیە كو ژ بەرێن چارگۆشەیێن مەزن پێك دهێت و ب شێوێ ژوورەكێ دروست كرییە، جهێ خێزانەكا شەش كەسی لێ هەیە».
زێدەتر ژی گۆت:»ئێك ژ شوونوارێن دی یێن گرنگ چیایێ شابانییێ كو دكەڤیتە باكوورێ ڕۆژئاڤا باتیفا، چار كیلۆمەتران ژ باتیفا دوورە، و بانیەكا بەرفرەهـ ل سەرێ چیایێ شابانیێ هەیه كو هەمی كەڤرێن خورستێن بەرێن گەنمی نە، و پتری سەد بیرێن هەلكولایی ل سەر حەلانان هەنە، كویراتیا وان دوو مەتر هەتا سێ مەترانە، ژبەركو چو ژێدەرێن ئاڤێ ل نێزیك نینن، ئەڤ بیرە بۆ دالدانا ئاڤێ و دەخل و دانی و ئاكنجیبوونێ ژی بكارئیناینە، كو بنێ بیران جهێ خێزانەكا پێنج كەسی تێدایە، دەرێن هندەك بیران د تەنگن و ژبەر باران و بەفرێن زۆر ب كەڤر و حەلانێن مەزن دهاتنە گرتن، جهەكێ دی یێ شوونواری كو دبێژنێ مزەیتێن تری كو ئەو ژی هەر ل چیایێ شابانیێ یە، بانیەكا مەزن و تژی كەڤر و كاشن و جهێ مزیتا تری و دوشاڤا تری د كەڤری دا هەلكۆلایە».
