شەش سالان ئەز دزیندانێ دا بووم خێزانا من نەدزانی ئەزێ ساخم
دیدار: رەمەزان دەشتمری/ زاخۆ
1 – 2
ل سەردەمێ شۆڕەشا ئەیلۆنا مەزن و شۆڕەشا 26ی گولانا پێشكەفتنخوازدا و ژیانا پێشمەرگایەتیێ چەندین ڕویدان و بویەرێن و نەخوش و دەردەسەری ب سەرێ گەلەك كەسان هاتینە كو دبنە جهێ حێبەتیێ و دیرۆك ژ خزمەت و خەباتا وان فهێت دكەت، ئەگەر بەرێ خۆە ب دەین دیرۆكا شۆڕەشا 26ی گولانێ و ل سەر دەمێ خەباتا پارتیزانی، كو ب چ شێوە و چەك و تەقەمەنی و هاریكاری بۆ سەركردایەتییا شۆڕەشێ ب دەست خۆەڤە دئینان، و كەسێن قەهرەمان و دلسوز و گیانێ خۆە ددەینان سەر دەستێ خۆە و دناڤبەرا سنورێ سێ وەلاتاندا رێك و ڕێبار دشەقاندن، و هاریكاری ب پشتا خۆە و ب ملێن خۆە بۆ شۆڕەشێ دگەهاندن.
ددیدارەكا تایبەت دا ل گەل پێشمەرگە و زیندانیێ سیاسی خالد سلێمان سەیفەدین بۆ ڕۆژنامەیا ئەڤرو سازكر و دبێژت: ئەز ل سالا 1956ی ل گوندێ هەورێزێ سەر ب ناحیا دەركار عەجەم ڤە ژدایكبوویمە و من كارێ ڕێنجبەریێ دكر. ل سالا 1976ی دناڤ ڕێزێن پارتی دیموكرانی كوردستان دگەل خودێ ژێ ڕازی شەهید عەمەرێ لەعلێ هاتم و ڕێكخستن و ژبۆ هاریكاریا شوڕەشێ و پێشمەرگەیی دكر و چەندین چالاكیێن نهێنی دناڤ سەنتەرێ باژێڕێ زاخۆ و ل تاخێ شەعبانیكێ ئەنجامدان. ئەوبی ل ڕۆژا 7/8/1981ی كارێ مە یێ ڕیكخستنا نهێنی ئاشكەرابی و ئەز نەچاربیم من قەستا ناڤ ڕێزێن شورەشا 26ی گولانێ كر و دگەل مەفرەزا شەهید عەمەرێ لەعلێ بیم پێشمەرگە و مە كارێ هاتن چوونا ڕۆژئاڤایێ كەردستانێ دكر و چەك و تەقەمەنی بۆ شوڕەشێ دئینان. هەر جارەكا مەفرەزا مە یا پێشمەرگەیی بۆ ڕۆژئاڤایێ كوردستانێ مە چەك و تەقەمەنی ژباژێڕێن دێركێ و قامیشلو و ب ڕیكا باژێڕێ مسێبینێ و باژێرێ جزێرێ و باژێڕێ سلوپیا و ل ئاڤا ڕویبارێ ئاڤا مەزن و ڕویبارێ هیزلی دەربازی كوردستانێ دبین و ئەو چەك و تەقەمەنی مە ب مل و پشتێن خۆە بۆ بارەگایێ لقێ ئێك ل دەڤەرا كوماتەیی دگەهاندن. ئەم سێ جاران هەر ب ئەڤێ ڕێكێ بۆ ڕۆژئاڤایێ كوردستانێ چووین و مە چەك و تەقەمەنی بۆ شوڕەشێ دئینان. ئەوبی ل شەڤا 12/3/1982ی ئەم ژ ڕۆژئاڤایێ كوردستانێ ڤەگڕیان و دەوارەكا هێستر ژ كەل و پەل و تەقەمەنییان باركری دگەل مەبی و سەرێ هێسترێ ددەستێ مندابی و ل دەمژمێر دووێ شەڤێ ئەم گەهشتن بەر لێڤا ئاڤا ڕویبارێ ئاڤا هیزلی و چەند هەڤالێن مە ب ڕێكا بوڕی دەراڤێ تەنگا خەرزێ دەرابزێ ئاڤێ بین و سەرێ دەوارا هێسترێ ددەستێ مندابی و ئەز ل دوماهیا هەڤالا دهاتم و بوسەیا عەسكەرێ توركیا ڕەمی ل مەكر. ل ئەوی دەمی هەڤالێن من شیان خۆە ئاڤا ڕویبارێ هزیلی دەربازی كوردستانێ ببن و ئەو قورتالبین و من سەرێ هەفسارێ هێسترێ بەرنەدا و دەملدەست عەسكەرێ توركیا ڕیكا جهێ دەربازینێ گرتن و تەقەیەكا زور هاتكرن. هەڤالێن من ەژ ئەڤێ بوسەیێ دەربازبین و ئەز نەچاربیم پاشدا ب زڤڕم ژبەركو من دەوارا هێسترێ سەرێ وێ بەربەدا و ل ناڤ ئەوان چەماندا من خۆە هەشاردا و ل دەمێ دونیا زەلالبینێ و ڕۆژهەلاتنێ لێگەڕیانا عەسكەری ل ئەوێ دەڤەرێ دەستپێكر و ل ئەوی سەردەمی و ل دویڤ ڕاسپاردەیێن سەركردایەتیا شوڕەشێ و جەنابێ كاك مەسعود بارزانی كو نابت پێشمەرگە تەقێ ل عەسكەرێ دەولەتەكا دیتر ژ بلی عەسكەرێ ڕژێما ئیراقێ بكت. ئەزب نەچاری من خۆە ڕادەستی عەسكەرێ دەولەتا توركیا كر. ل ڤێرێ نە من چ ژ هەڤالێن خۆە زانی كانێ دساخن و یان هاتینە شەهیدكرن و هەر وەسا ئەوان ژی چ تشت ژ من نزانین كا چ تشت ب سەرێ من هاتیە و چارەنڤیسێ من ب چ سەرچوویە. دەمێ هاتیم دەستەسەركرن و هەر ئێكسەر ل ترومبێلەكا عەسكەری سیاركرم و هەژمارا هەشت عەسكەر دگەل من سیاركرن و دەستێن من كەلامچەكرن و بۆ زیندانا باژێرێ سلوپیا ڤەگوهاستم. ل زیندانا باژێرێ سلوپیا دەمێ ڤەكولین دگەل هاتیكرن و پرسیارا ناڤێ من كرین و من گوت: ئەز خەلكێ عیراقێ مە و پێشمەرگەمە و ل دژی ڕژیما ئیراقێ شورەشێ دكین. دادوەری گوت: ئەم دێ تە ڕادەستێ دەولەتا ئیراقێ كین بەلێ من گوت هەكەر هوین من ڕاستی دەولەتا ئیراقێ بكن هەر ئێكسەر دێ من سێدارەدەن. پشتی بورینا پاردە ڕۆژان ئەز ڕەوانەیی زیندانا باژێرێ مێردینێ كرم و هەر ئێكسەر زیندانكرنكرم. بۆ ماوێ دوو حەفتیان ل زیندانا باژێرێ مێردینێ دا مام و ل سپێدهیەكێ ناڤێ من خواندن و دەستێن من ژ پشتڤە گرێدان و شەش جەندورمە دان دگەلم و قایلا منژی دگەل خۆە ئینان و ئەم ب ترومبێلەكا ژ جورێ دولمیش سیاركرن و بۆ زیندانا نیلدا ل باژێڕێ ئامەدێ برم و هەر ئێكەسر زیندانكرم. بۆ ماوێ هەشت جاران ڤەكولین دگەل من هاتكرن و جارا دوماهیێ ژ دادگەهكرنێ و ب ئامادەبوونا سێ دادوەران و پشتی بڕیار داین بۆ ماوێ بیست و ئێك سالان هاتم حوكومكرن. ل ئەڤێ زیندانێ بێ سەرەدان و دویر ژ كەس و كاران من ڕوژانێن خۆە دزیندانا نیلدا ل باژێڕێ ئامەدێ بوراندن و ب ئەڤی ئاوایی ئەز مام ل زیندانێ هەتا سالا 1986ی بریار هات دان ئەز ژ زیندانا باژێڕێ ئامەدێ بۆ زیندانا باژێڕێ مەلاتیا بێم ڤەگوهاستن. ل زیندانا باژێرێ مەلاتیا دگەل خەلكەك دیتر هەتا سالا 1988ی من ڕۆژانێن نەخوەش و ب تنێ و دویر ژ دیتنا خێزان و كەس و كاران ل زیندانا باژێڕێ مەلاتیا دە بوراند. دەمێ ئەنفالا ڕەش یا سالا 1988ی ب سەر مللەتێ مەدا هاتی و خەلك دەربەدەری وەلتێ توركیا بی و ل كەمپا ئامەدێ ئاكنجی كرین.
