شەش كەسان خوە بۆ پۆستێ دەڤەردارێ شنگالێ بەربژێركریە
دهۆك، لەزگین جۆقی:
جێگرێ پارێزگارێ نەینەوا دیار كر، نێزیكی شەش كەسان خۆ بۆ پۆستێ دەڤەردارێ شنگالێ بەربژێركری و جڤاتا پارێزگەها نەینەوا دەنگدان ل سەر پاشئیخستیە و دبێژیت: پێدڤیە دەڤەردارێ شنگالێ ل دووڤ رێككەفتنەكا سیاسی بهێـتە دانان.
عومەر عەلی، جێگرێ پارێزگارێ نەینەوا بۆ رۆژناما ئەڤرۆ خویا كر، نوكە دەڤەرداریا شنگالێ ب وەكالەت دهێتە ب رێڤەبرن و دانانا دەڤەردارەكی بۆ شنگالێ د ڤێ قووناغی دا گەلەكا گرنگە، ژ بەركو حوكمەتا ئیراقێ ب تایبەتی ژی وەزارەتا كۆچ و كۆچبەران یا رژدە هەمی كەمپێن ئاوارەیان بهێنە دائێخستن و ئاوارە ڤەگەڕن و گۆت: «هەتا نوكە رەوشا شنگالێ یا باش نینە، ب تایبەتی ژی د وارێ ئاڤەدانی و تەناهیێ دا گەلەك هێز و گروپ ل شنگالێ هەنە، لەو دڤێت دەڤەردارێ شنگالێ ل دووڤ رێككەفتنەكا سیاسی بهێتە دانان یان ژی كەسەكێ سەربخۆ پۆستێ دەڤەرداریێ وەربگریت».
ناڤهاتی گۆتژی: «شنگال پێدڤی ب پڕۆژەیێن خزمەتگوزاری یە و گەلەك زیان گەهشتیە خەلكێ شنگالێ، هەتا نوكە حوكمەتا ئیراقێ خەلكێ زیانڤێكەفتیێن شنگالێ قەرەبوو نەكرینە، لەورا ژی یا گرنگە دەڤەردار بهێتە دانان».
