شەش گرۆپێن ئیراقی چەكدانانێ رەت دكەن
د پێنگاڤەكا نوو دا كو ئاماژەیە بۆ توندبوونا ململانێیێن سیاسی و سەربازی ل ئیراقێ، شەش میلیشیێن ئیراقی داخوازا ئەمریكا بۆ چەكدانانێ ب فەرمی رەت دكەن و رادگەهینن كو چەكێن خوە ب پیرۆز دزانن و داخوازا دەركرنا قانوونا خزمەت و خانەشینییا حەشدا شەعبی دكەن.
هەر ئێك ژ میلیشیێن(عەسائیب ئەهلولحەق، كەتائیب سەیدولشوهەدا، كەتائیب كەربەلا، ئەنساروللا ئەلئەوفیا، بزاڤا نوجەبا و كەتائیب حزبوللا) كو خوە د ناڤا بەرەیەكیدا ب ناڤێ ( هەماهەنگییا موقاوەما ئیراقی) دایە نیاسین بەیاننامەیەك بەلاڤكر وتێدا راگەهاند كو ئەو چەكێن خوە ب چەكێ بەرگریێ و چەكەكێ پیرۆز دزانن، ئەڤە ژی وەك ئاماژەیەكە بۆ رەتكرنا داخوازا ئەمریكا بۆ چەكدانانێ.
هەروەكو ئاماژە ب وێ چەندێ هاتیە كرن كو دڤێت كارێ بەراهیێ یێ حوكمەتا داهاتییا ئیراقێ و جڤاتا نوونەرێن ئیراقێ، دەركرنا وێ قانوونان بیت كو خزمەتا وەلاتی دكەن، نموونەژی ب قانوونا خزمەت و خانەنشینییا حەشدا شەعبی ئینا. ژبلی وێ چەندێ ژی داخوازكریە هەموو هێزێن بیانی ل سەر ئاخا ئیراقێ بهێنە دەركرن.
د پشكەكا دی یا وێ بەیاننامەیێدا، وان شەش میلیشییان ئەوژی رەتكر كو ل دۆر چەكدانانێ ل گەل هیچ ئالییەكێ دەرەكی دانوستاندنێ ناكەن، بەلكو تنێ دانوستاندنان ل گەل حوكمەتا ئیراقێ كەن، ئەوژی پشتی وێ چەندێ سەروەرییا تمام ل وەلاتی بدەستڤەبهێت كو مەبەستا وان ژێ دەركرنا هێزێن ئەمریكا و هەڤپەیمانانە.
ئەڤە د وەختەكیدایە كو ئەمریكا یا رژدە ل سەر وێ چەندێ میلیشیێن حەشدا شەعبی چەكێن خوە دانن، بۆ ڤێ مەبەستێ ژی دۆنالد ترەمپ، سەرۆكێ ئەمریكا، كەسەك ب ناڤێ مارك ساڤایا وەك نوونەرێ تایبەتێ خوە ل ئیراقێ دەستنیشان كریە.
