شەش گوندێن دەڤەرا بەرواری بالا داخوازا دانانا بورجەكێ پەیوەندیكرنێ دكەن
سندس سالح سلێڤانەیی:
خەلكێ شەش گوندێن دەڤەرا بەرواری بالا ل گوندێن (ئەدنێ، سەرەرۆ، دشێش، قۆمریێ، ئۆرە، تیلەرێ) نە، داخوازێ ژ كۆمپانیا (كۆڕەك تلیكۆم) دكەن بورجەك ل دەڤەرا وان بهێتە دانان، چونكو ئەو نەشێن پەیوەندیێ ب دهۆك و زاخۆ و چو دەڤەرێن دی بكەن و گەلەك جاران مرۆڤێن وان تووشی نەخۆشیان بووینە وان ئاگەه ژێ نینە و نەشێن پەیوەندیێن ب نەساخێ خوە بكەن و رێڤەبەرێ پوستە و گەهاندنێ ل دهۆكێ ژی دبێژیت: ما ئاگەه ژ ئاریشەیان وان هەیە و ل نێزیك دێ بورجەكێ گەڕۆك گەهیتە وێ دەڤەرێ.
مام ئەحمەد ژ گوندێ سەرەرۆ یە دبێژیت: ئەڤە چەندین سالن مە ئەڤ ئاریشە هەی و هەتا نوكە بۆ مە نەهاتیە چارەكرن، بۆ زانین هێلا كۆڕەك ل دەف مە نینە و ژ ناچاری ئەم كارتێن توركی دكڕین، ئەو ژی گەلەك دگرانن، لەورا هەكە بورجەك بۆ مە بهێتە دانان دێ سەرێ مە تەنا بیت و ئەڤە مافێ مەیە، چونكو مە نەڤێت كارتێن توركی بكڕین و پارەیێ مە بۆ وان بچیت، بەلكو مە دڤێت پارەیێ مە هەر بۆ كۆمپانیێن مە یێن نافخۆی بیت.
بابێ حسێنی، هاولاتیەكێ دی یێ گوندێ ئۆرە یە، دبێژیت: ئەم كارتێن توركی ب (26) هزار دیناران دكڕین و د ڤێ رەوشێ دا ئەڤ پارە گەلەكە و هەكە بورج بۆ مە بهێتە دانان دێ بارێ مە سڤك بیت، چونكو گەلەك جاران ئەم هزردكەین كو ئەم یێ د چالاكیێ دا و كەسێ ئاگەه ژ مە نینە.
ل دووماهیێ عەبدولجەلیل تاهر رێڤەبەرێ پوستە و گەهاندنێ ل پارێزگەها دهۆكێ دەربارەی داخوازیا وان گۆت: هەر گازندەیەكا بۆ مە دهێت ئەم دكەینە نڤیسارەكا فەرمی و ددەینە وێ كۆمپانیێ، هەروەسا دووفچوونا وێ ژی دكەین، سەبارەت وان شەش گوندان من دڤێت بێژەمە وان بورجەكێ گەڕۆك ل دەڤەرا كانیماسێ هەبوو، نوكە بورجەك یێ بۆ وان دهێتە چێكرن و ل نێزیك دێ ب دووماهی هێت پاشی ئەو بورجێ گەڕۆك دێ وێ دەڤەرێ هێتە ڤەگوهاستن و ئاریشەیا وان دێ چارە بیت.
