شەش گوندێن قەزا شێخان هێشتا كارەبا گشتی نەگەهشتیێ
ئەڤرۆ
سالار محەمەد دۆسكی:
رێڤەبەرێ بەلاڤەكرنا كارەبێ ل قەزا شێخان راگەهاند، گرنگە وەلاتی د هاریكاربن ل گەل فەرمانگەها كارەبێ ب وێ چەندێ بارسڤكی بكەڤیتە سەر كارەبێ و خواست ژی پتر پشتەڤانی ل رێڤەبەریێ بهێتەكرن ل سەر دامەزراندن و هەمیشەكرنا فەرمانبەرێن گرێبەست.
ئەندازیار نافع مستەفا ئەحمەد، رێڤەبەرێ بەلاڤەكرنا كارەبێ ل قەزا شێخان بۆ رۆژناما ئەڤرۆ گۆت: پشتی جێبەجێكرنا پرۆژێ پیڤەرێن زیرەك (سمارت) ل سنورێ رێڤەبەریا مە، رەوشا گوهوركا باشە و هژمار گوهورەكێن سۆتی و ژ كاركەفتی بەر ب كێمبوونێ چوویە و گۆت: د پلاندایە وێستگەهەكا 132 كی ڤی ب دووماهی بهێت و ب ڤی كاری دێ شێین چەندین كارێن دی ئەنجام بدەین، گەهاندنا كارەبێ بۆ تاخێن نوو و ناحیێن (ئەلقوش، زێلكان، كەلەكچی، قەسرۆوك، ئەتروش، باعەدرێ)، كومەلگەه و گوندان و گەهاندنا كارەبا نشتیمانی بۆ شەش گوندان كو هەتا نوكە كارەبا گشتی نینە و خەلكێ تێدا ئاكنجی یە، ئاڤاكرنا ئاڤاهیان بۆ بنگەهێن كارەبێ ل سەنتەر و ناحیان، رۆناهیكرنا شەقامێن گشتی ل سنورێ رێڤەبەریا مە.
هێشتا گۆت: ل دەسپێكا دامەزراندنا رێڤەبەریا مە 26 هزار پشكدار ل سەر كارەبێ بوون، نوكە بووینە پتر ژ 47 هزاران و هەیڤانە نێزیكی 200 پشكداران زێدەدبن.
ل دور قەرێن كارەبێ ژی، ئەندازیار نافع گۆت: سەرجەمێ قەرێن گشتی ل سەر پشكدارێن كارەبێ هەشت ملیار و دو سەد ملیون دینارن، سەرجەمێ قەرێن كومكری ل سالا 2022 دبنە ملیارەك و 674 ملیون دینار، قەرێن ئەڤ سالە هاتینە وەرگرتن هەتا هەیڤا شواتێ سێ 341 مەلیون و دینار بووینە.
ل دور میلاكی ژی گۆت: رەوشا میلاكی رێڤەبەریا مە نە یا باشە و مە 178 فەرمانبەر هەنە و 94 گرێبەستن و 84 هەمیشەینە، ژ كێشێن رێڤەبەریا مە پتریا وێستگەهێن مە گەروكن، ژ بەر زێدەبونا پشكداربان بارێ وێستگەهان گرانبوویە، كێمبوونا ئامیرێن پێدڤی و ترۆمبێلان، هەبوونا قەرێن زوور یێن هەلاویستی ل سەر فەرمانگەهێن میری سەر ب پارێزگەها نەینەوا ڤە، هەبوونا سێ كەمپێن پەنابەران ل سنورێ رێڤەبەریا مە، كێمبوونا میلاكی رێڤەبەریا مە، داخوازی ل سەر راكێشانا كارەبێ بۆ پرۆژێن چاندنێ.
رێڤەبەرێ بەلاڤەكرنا كارەبا شێخان گۆت: ل سالا بۆری شیاینە 208 سەرپێچیان راكەین و سزابدەین ب كوژمێ 18 ملیون و 750 هزار دیناران، ئەڤ سالە ژی چەندین سەرپێچی هاتینە بڕین، ل سالا بوری شەش پرۆژە هاتینە بجهئینان ب كوژمێ 29 ملیون دیناران، هەروەسا ئەم رابووینە ب كرینا كەل و پەلا و بارسڤكرنا گوهورەكان و گەهاندنا كارەبێ بۆ مالێن جودا و دەرئێخستنا فیدەرێن 11 كەی ڤی ب هژمارا وان 15 پرۆژە بوون ب كوژمێ 400 ملیون دیناران بوون و ب رێژا 8% پرۆژە ل سەرە داهاتێ كارەبێ هاتینە بجهئینان ب كوژمێ 150 ملیون دیناران بووینە و ل سەر بودجا پارێزگەها دهۆكێ ب كوژمێ ملیارەك و 423 ملیون دیناران پرۆژێن جودا جودا ل ژێر ئەنجامدانێ نە.
ناڤبری ل دور پێشڤەبرنا رەوشا كارەبێ ل شێخان گۆت: گرنگە پێشینەیا رێڤەبەریێ ب رێژا 100% بهێتە زێدەكرن، دا بشێین پتر خزمەتا وەلاتیان بكەین، هەكە بودجا هەرێمێ هاتە پەسەندكرن ئەم دشێین پتر خزمەتێ بكەین، هەمیشەكرنا فەرمانبەرێن گرێبەست و دامەزراندنا فەرمانبەرێن نوو.
