شەش یاریزانێن پارێزگەھێ پێنگاڤا ئێکێ ب سەرکەفتیانە ھاڤێتن
ئەڤرۆ نیوز، محەمەد عەلی نوری:
شەش یاریزانێن کور و کچێن پارێزگەھا دھۆکێ پێنگاڤا ئێکێ یا ھەڤرکیێن قارەمانیا خانزاد یا نیڤدەولەتی بۆ یاریا شەترەنجێ ب سەرکەفتیانە ھاڤێتن، پشتی شیاین د یاریێن خوە یێن ڤەکرنا قارەمانیێ دا سەرکەفتنێ ل سەر ھەڤرکێن خوە تۆماربکەن ئەوا نوکە ل ھەولێرا پایتەخت ب پشکداریا ١٠٧ یاریزانێن ھەرێمێ و عیراقێ و ئیران و سوریا و ئوردنێ دھێنە کرن.
سەرمەد بەرواری سکرتێرێ ئێکەتیا شەترەنجا پارێزگەھێ بۆ ئەڤرۆ نیوز راگەھاند کو ھەر شەش یاریزانێن دھۆکێ، سەلمان محەمەد قەسیم، نزار جەمیل، مستەفا کەمال، محەمەد عەبدولرەحمان، کارین کەمال و ڤین کەمال نوونەراتیا پارێزگەھێ د قارەمانیا نیڤدەولەتی یا خانزاد کریە کو ھەڤرکیێن وان دێ ب سیستەمێ سویسری نەھـ گەران بۆ ماوێ پێنچ رۆژا یا بەردەوامبیت.
ھەروەسا ناڤھاتی گۆت: یاریزانێن دھۆکێ شیان سەرکەفتنا ئێکێ د قارەمانیێ دا تۆماربکەن و پێنگاڤەکا باش بەر ب قۆناغا دویێ پاڤێژن، ئەڤەژی دەستپێکە بۆ زێدەتر باوەری بخوە و ھەڤرکیێ ل سەر رێزێن پێشیێ و دیارکر کو یا گرنگ د ڤێ قارەمانیێ دا ئەوە ھەرسەرکەفتنەکا یاریزان تۆماربکەن ژلایێ ئێکەتیا نیڤدەولەتی یا شەترەنجێ دھێتە ھژمارتن و د ل سەر خالێن خوە یێن لیستا یاریزانێن ڤێ یاریێ دا دھێتە زێدەکرن تایبەت یاریزانێن سەر ئاستێ دەر‌ڤە پشکداری ھەبن وەکو کارین کەمال و مستەفا کەمال.