شەش یانەیێن پارێزگەهێ بەرهەڤیان بۆ پلا دو دكەن
ئەڤرۆ
قەیس وەیس:
بڕیارە ل دووماهییا حەفتیا بهێت یاریێن قۆناغا دویێ ژ هەڤڕكیێن خولا كوردستانێ بۆ یانەیێن پلا دو یا تەپا پێی بهێنە كرن، ئەوا دهێتە چاڤەڕێ كرن سوبەهی پشككێشانا یاریێن ڤێ قۆناغڵا بهێتە ئەنجامدان 19 یانە ژ وانا شەش یانەیێن پارێزگەها دهۆكێ پشكداریێ بكەن و هاتینە بەلاڤكرن ل سەر سێ كۆمان.
ئێكەتیا تەپا پێی یا هەرێما كوردستانێ هەر شەش یانەیێن پارێزگەهێ بۆ هەڤڕكیێن خولێ راگەهاندی نە ئەوێن د كۆما دویێ دانە ئەو ژی، باتیفا، بەردەرەش، شێلادز، تەناهی، شێخان و دینارتە، یاریێن وان پشتی پشككێشانێ دێ ل 12ێ ڤێ هەیڤێ ب شێوەیێ خول ئێك قۆناغ هێنە كرن و سەركەفتیێ ئێكێ و دویێ دێ دەربازبنە قۆناغا چارگۆشەیا زێرین.
ل دووڤ پێزانێن دەست ب رۆژناما ئەڤرۆ كەفتین كو هەر شەش یانەیێن پارێزگەهێ بۆ ماوەیێ زێدەتر دو هەیڤە بەردەوامن ل سەر بەرهەڤیێن خوە بۆ خولا كوردستانێ و هەموو یانە بزاڤێ دكەن بۆ دەستڤە ئینانا سەركەفتنان، هەروەسان د ماوەیێ بۆری دا چەندین گوهۆڕین هاتینە كرن ب ئینانا یاریزانان و راهێنەران، دیسان چەندین یاریێن هەڤالینی هاتینە كرن.
بۆ زانین كۆما ئێكێ پێكهاتیە ژ كفری، خۆرمال، بەختیاری، خەلاتی پێنجۆین، هەلەبجەیا شەهید، دۆكان، شارەزوور، پێنجوین، كۆما دویێ یانەیێن پارێزگەهێ نە، كۆما سێیێ سنوور، مەخموور، پەروەردە، چۆمان و خەبات، بڕیارە ئەڤرۆ دووماهی رۆژ بیت بۆ هنارتنا لیستا ناڤێن یاریزانان.
