شەمبیێ دێ پێشانگەھا وێ یادویێ ھێتە ڤەکرن
ئەڤرۆ، عەلی حاجی:
ئیسرا جاسم کچەکا شێوەکارە ل باژێرێ دھۆکێ، د دیدارەکێ دا بۆ رۆژناما ئەڤرۆ دیارکر کو دەمەکە ئەو مژوولی ڤەکرنا پێشانگەھەکا تایبەتە ب کارێ خوە ڤە و وێ دڤێت ب رێیا زانکۆیێ زێدەتر شیانێن خوە دیار بکەت.
ناڤھاتیێ گۆت: ل بن درۆشمێ فولکلۆر بناغێ ھەر ھونەرەکێ یە دێ پێشانگەھەکا تایبەت ب کارێ خوە یێ کارێ دەستی و گرافیکی ڤە ل رۆژا شەمبی ل زانکۆیا نەورۆز ڤەکەم، د ڤێ پێشانگەھێ دا دێ ٢٣ کارێن دەستی و ١٠ کەڤالێن گرافیکی ھێنە نیشان دان و جودا ژ ھەموو کارێن دی من ڤیایە ب رێیا ڤێ پێشانگەھێ پتر شیانێن خوە دیار بکەم ژبەر کو ئەڤ چەندە دێ بیتە رێیەک بۆ من ئەوا د شیانێن من دا ھەین دیار بکەم، ھەر چەندە ئەڤە پێشانگەھا من یا دویێ یا تایب ەتە بەلێ ڤێ پێشانگەھێ جوداھی ھەیە ژبەرکو زێدەتر من کارێ دەستی کری یە و مالا مە ژی پشتەڤانیەکا باش ل من کری یە و ماموستا و سەرۆکێ پشکا مە ل زانکۆیێ پشتەڤانی ل ڤی کاری کری ینە.
