شەنگە گول
بەهزاد بەهرام
هەستە وەرە شەڤینێ
دەستەكی دانە سەر سینگێ من
دا بزانی سەنگە دل
دەستێ دی بكە ناڤ دەستێ من
ئەی هەوار! گەرم و نەرم و شل
ژ بەری سحارگەه
دلۆپێن خوناڤێ
لسەر بشكۆژان ببارینیت
ژبەری بابەلیسك
زڤڕۆكێ لدۆر مە بئالینیت
ژبەری تیڕۆژكێن ڕۆژێ
شەوقا تە لمن بڤەمرینیت
هێشتا وەرە پێشبری من
هند نێزیك ببە
مژویلانكێن چاڤێن مە تێكەل ببن
تو دزانی بۆچی؟
ژبەركو سۆراڤا لێڤێن تە گەلەك تۆخە
ب خویسارا سەر لێڤێن من
دێ رەنگ ڤەبووی كەت
تو دزانی خۆشاڤا لێڤێن تە چەندا روونە
ب هێڤێنێ سەر لێڤێن من
دێ مەهیت و سەرتوی گرتی بیت.
