شەهیدێن تیرۆرێ و شەڕێ داعشێ بۆ سەر ئیراقێ دێ هێنە ڤەگوهاستن
هەولێر، قائید میرۆ:
جێگرێ سەرۆكێ لیژنا شەهید و زیندانیێن سیاسی ل پەرلەمانێ ئیراقێ ئاشكراكر، شەهیدێن دەستێ تیرۆرێ و شەڕێ بەرهنگاربوونا داعشێ بۆ سەر میلاكێ حوكمەتا ئیراقێ دێ هێنە ڤەگوهاستن و مووچەیێ وان دێ هێتە زێدەكرن.
شوان كەلاری، جێگرێ سەرۆكێ لیژنا شەهیدان و زیندانیێن سیاسی ل پەرلەمانێ ئیراقێ بۆ رۆژناما ئەڤرۆ دیاركر، بڕیارە د دەمەكێ نێزیك دا شەهیدێن دەستێ تیرۆرێ و شەڕێ بەرهنگاربوونا تیرۆرستێن داعشێ بۆ سەر میلاكێ حوكمەتا فیدڕال بهێنە ڤەگوهاستن و گۆت: «مووچەیێ كەسوكارێن وان دێ زێدەبیت، هەموو ئەو كەسێن ل سەر دەمێ دەستپێكرنا شەڕێ تیرۆرێ، پشتی سالا 2003ێ شەهیدبووین، لیستا وان دێ هێتە ڤەگوهاستن و كەسوكارێن وانا دێ ژ مووچە و چەندین شایستەیێن دی ژی مفاداربن».
شوان كەلاری گۆتژی: «بڕیارە زیندانیێن سیاسی ژی بۆ سەر میلاكێ دەزگەهێ زیندانیێن سیاسی ل ئیراقێ بهێنە ڤەگوهاستن و رێكارێن ڤەگوهاستنا وان هاتینە دەستپێكرن، چونكی حوكمەتا هەرێما كوردستانێ بۆ ڤێ مەرەمێ نڤیسارا فەرمی ئاراستەی سودانی كریە و ئەم نوكە یێ كار ل سەر ڤەگوهاستنا وان دكەین، ڤەگوهاستنا زیندانیێن سیاسی د بەرژەوەندیا وانا دایە، هەتا ئەو ژی ژ شایستەیێن دارایی مفاداربن».
