شەڕێ ئیراقێ و كاساسی گەهشتە فدراسیۆنا نێڤدەولەتی
د داخویانیەكێ دا جەمال ئەلئەسەدی شیرەتكارێ یاسایی ل فدراسیۆنا فوتبۆلا ئیراقێ دیار كر پشتی كێشا ڕاهێنەرێ وان یێ دەستكاركێشایی یێ ئسپانی خیسۆس كاساس گەهشتییە لژنەیا چارەسەرییا ئاریشەیان و دۆڤچوونێ ل فدراسیۆنا نێڤدەولەتی فیفا، بڕیارە د ڤێ حەفتیێ دا گەنگەشە و دانۆستاندنێن تەسەل ل سەر سكالایا مە دژی كاساسی بهێتە كرن.
هەروەسان ناڤهاتی دیار كر پشتی ئەوان ئەنجامێن لاواز یێن هەلبژارتیێ ئیراقێ د ڤاڤارتنێن كێشوەرێ ئاسیا بۆ مۆندیالا جیهانی 2026ێ مە سێ جاران د دەمێن جودا داخواز ژ كاساسی كربوو ل بەغدا بەرهەڤبیت لێ ڕەدكر و بەرهەڤ نەبوو لەوما ژی فدراسیۆنا فوتبۆلا ئیراقێ نەچاربوو ئەوی دووربێخیت و دووڤدا دەست ژ كارێ خوە كێشا، ل دووڤ بەندێ 14 یێ فیفایی مە سكالا ل سەر ڕاهێنەری كرییە و ڕژدین ژبەركو ئەوی و كادرێ ڕاهێنانێ پێگیری ب بەندێن گرێبەستێ نە كریینە ل دووڤ بەندێ دیاركری دڤێت كاساس ب 200 هزار دۆلاران بهێتە سزادان، لێ دێ چاڤەڕێ بڕیارا دووماهیێ یا فدراسیۆنا فیفایێ بین.
ژلایەكێ دووڤە عەدنان درجال سەرۆكێ فدراسیۆنا فوتبۆلا ئیراقێ ڕاگەهاند ئەینییا بهێت دێ ناڤێ ڕاهێنەرێ هەلبژارتیێ ئیراقێ هێتە ئێكلا كرن و هەتا نوكە چو ڕاهێنەرێن بەرچاڤ ب فەرمی نە هاتینە دەستنیشانكرن.
