شەڕێ دژی تیرۆرستێن داعشێ ژ هەمیان نەخۆشتر و قورستر بوو
دیدار، سالار محەمەد دۆسكی:
1 – 5
پێشمەرگەیێ شۆڕەشا گولانا پێشكەفتنخواز، بەحسێ ژیانا خوە یا پێشمەرگاتیێ دكەت، و ئەو چالاكیێن تێدا پشكدار بووی و ئاشكرا دكەت، كو شەڕێ داعش نەخوشترین شەڕ بوو دژیانا وی دا، چونكە ئەو هێزەكا رێكخستی بوون و بۆ كوشتنێ هاتبوون.
پێشمەرگەیێ شۆڕەشا گولانا پێشكەفتنخواز، لیوا عیسی بۆتی، د دیدارەكێ دا ل گەل رۆژنامەیا ئەڤرۆ بەحسێ چوونا خوە بۆ ناڤ رێزێن شۆڕەشێ دكەت و گۆت: پشتی نسكۆیا سالا 1975 مە دیت زورداریەكا مەزن ژلایێ رژێما بەعس ڤە یا ل مللەتێ كورد دهێتەكرن ، نەبتنێ كورد وەك پلە دو یان سێ دهاتنە هەژمارتن بەلكو كورد ل دەف ڤێ رژێمێ و دیڤەلانكێن وێ هەر مرۆڤ نەدهاتنە هژمارتن، كوردینی ل بەرمە شرینتر لێ دهات و مە چاڤەرێی چریسكەكا ئاگری دكر كو هندەك بێژن مە هندەك پێشمەرگە ل جهەكی دیتی نە وی دەمی خەلكێ كوردستانێ بێ ئومێدەیەك ل دەف پەیدا ب بوو وی دەمی ئەم قوتابی بووین، شتا گەنج هاتمە رێكخستن ب رێكا مامێ خوە (مەجید بوتی) داخواز ژ من هاتەكرن، بچمە دناڤا رێزێن پارتی دیموكراتی كوردستان دا وی دەمی دو برایێن من ژی ل گەل من بوون و چەند گوندیەكێن من ژی و داخواز ژ من هاتەكرن كو وەك نڤیسەر هاریكار بم ل گەل و هوسا مە دەستپێكر و من هێدی هێدی چەند هەڤالەكێن دی ژی پەیداكرن، دو هەڤالێن مە هاتنە دەستەسەركرن و هێشتا ئەم ئاشكرانەبووین ئەم پێنچ هەڤال دەركەفتین، وی دەمی برایەكێ منێ رێكخستی گۆتە من فەرماندە(سادق گەلناسكی) هندەك مرۆڤ ل گەل دانە و ل چیایێ گەلناسكێ یە و هەرنە دەف و سالا 1977ێ بوو و ئەم گەهشتینە (سادق گەلناسكی) وی دەمی ئەم دبێ چەك بووین و كاودان گەلەك بزحمەت بوون وی دەمی ئەو مەفرەزەكا پێشمەرگەی بوون و ئەم ماینە ل گەل و گەلەك جاران فرۆكە دهاتنە دەڤەرێ و لەشكرێ ئیراقێ ب فرۆكان دهاتە خوارێ و مە خوە ڤەشارت و جهێن خوە مە دگوهارتن، پشتی ماوەكی حوكمەتا بەعس دەست ب گرتنا خەلكی كر و تایبەت ئەوێن مرۆڤێن وا دناڤا شۆڕەشێ دا، لەشكرێ ئیراقێ هاتن گوندێ مە بۆتیا و پێزانین گەهشتنە من كو لەشكر چووینە دناڤا قوتابخانا گوندی دا و برایێن من (رەمەزان و عەبدوسەلام) هەر دو دەستەسەركرینە وی دەمی دایك و بابێن من خوە ڤەشارت بوون، و هەر دو برایێن من ئێك ل پولا (سیێ و چوارێ) سەرەتایی بوون وی دەمی قوتابیان ژ ترسا برایێن من نیشا لەشكری دان و مامۆستایێن قوتابخانێ گەلەك هیڤی ژ لەشكری كرن كو هەر دو زارۆكان نەبەن لێ لەشكری گوهداری یا مامۆستان نەكر و هەر دو دەستەسەركرن، و دوڤدا هەر دو هاتنە ڕەوانەكرن بۆ باژێرێ (بابل) و كەسەكێ نەزانی كیڤە برینە ل دەسپێكێ ل دووماهیێ ب پرسیارا و دیڤچوونێ بابێ من وا زانی هەر دو برایێن من برینە (بابل) بابێ من وا گەلەك بزاڤكرن كو ئێكێ مالا مە بچیت ببینت حوكمەتا بەعس نەهێلان ببیین، نێزیكی دو سالان برایێن من ل وی ژیێ بچووك مانە زیندانێ ڤە و خێزانەكا باكوزی كورێ وان ژی پێشمەرگە بوو و دایك و باب هاتبوونە زیندانكرن ئەوان هەر دوكان خوە ل هەر دو برایێن مە كرە خودان، ژیانەكا نەخوش بوو و جار رەڤین بوو و جار دەستەسەركرن .
هەمان پێشمەرگەیێ شۆڕەشا گولانا پێشكەفتنخواز، عیسی بۆتی گۆت: مامە ل گەل پێشمەرگەی و (سادق گەلناسكی) ئەوێن خێزان ل گەل گۆتن ئەم دێ خێزانێن خوە ڤەگوهێزینە سەر سنوری و هندەك دەوار پەیداكر و ئەم ژی ل گەل بووین وی دەمی گەنج بووین و بێ چەك بووین و ئەم ژ (گەلناسكێ) دەركەفتین و ئەم ب شەڤ گەهشتینە گوندەكی ل بەر خابیری دگۆتنێ(چەم تەرێ) مە خوە ڤەشارت و شەڤا دوڤدا ئەم چووینە (بوسەلێ) و دگۆتن كەفتنە درێكا مە دا دگۆتنێ(ئەبلەهێ و پیربلو) گوند بەرداینە وی دەمی من نەزانی بۆچی بەرداینە و حوكمەتێ گوند چول كربوون و خەلكێ ئەوان گوندان ل كومەلگەهان ئاكنجی بوون و هندەكا دگۆتن دا بچنە دناڤا خانیان دا ل گوندی چونكە هەیڤا ئیلۆنێ بوو و گەلەك یا گەرم بوو، (سادق گەلناسكی) مرۆڤەكێ شارەزا بوو و گۆت نوكە گەلەك ئاژەلێن ب زەرەر دناڤا ژووردا هەنە و باشترە ئەم نەچینە ژوور و ئەم دێ دناڤا گورستانێ دا بین و هەتا دونیا زەلال دبیت ئەم دێ دەینە رێ و هێشتا رێكا دویرە و كەسەكی زێرەڤانی دكر و هێشتا چاڤێن مە باش گەرم نەبووین زێرەڤانی گازیكر و گۆت دەنگێ مرۆڤان یێ دهێت و ئەم رابووینە و هەتا ڤی دەمی هێشتا من چەك نەبوویە و من چ جاران تڤەنگ نەهاڤێتی یە و ئەڤە دێ بیتە ئێكەم شەر پشكداریێ تێدا بكەم و مە گوهداری كر ب بزمانێ عەرەبی دئاخڤن و ئەم نەشێین چ بكەین، چونكە خێزان و زارۆك ل گەل مە دا هەنە و مە بڕیار دا بلەز خوە ب هاڤێژن و ئەگەر رێكا مە نەهاتبیتە گرتن، (سادق گەلناسكی) مرۆڤەكێ گەلەكێ زیرەك و ئازا بوو و گەلەك مورال لدەف هەبوو، و هەمان دەم گولەك ب پێ وی كەفت بوو و یێ بریندار بوو و نەدشیا برێڤە بهێت و ب گوپالی چوو و گەلەك جاران چوو سەر پشتا هێسترێ و (سادق) گۆت ئەگەر شیابا مە و ئێك ل گەل من هاتبا داچینێ و مە گۆتێ ئەڤە هاتینە چێ؟ گۆت ئەڤە هاتینە گوندا ب سوژن و گوند دبەرداینە.
