شەڕێ ئیرانێ و ئەمریکا نەخشەیێ سیاسی یێ جیهانێ گوهۆڕیە
بسپۆرەکێ پەیوەندیێن نێڤدەولەتی دیار دکەت، ژ بەر شەڕێ نها ئەمریکا دێ پێداچوونێ د پەیوەندیێن خوە ل گەل ئێکەتیا ئۆرۆپا دا کەت و هەروەسا ئەگەرێ هەلوەشاندنا ناتۆ ژی هەیە و وەلاتێن کەنداڤی ژی دێ پێداچوونێ د پەیوەندیێن خوە ل گەل ئەمریکا دا کەن.
د. ئیقبال دووڕە بسپۆرێ پەیوەندیێن نێڤدەولەتی دیار کر، شەڕێ نها یێ ئەمریکا و ئسرائیلێ ل گەل ئیرانێ بوویە ئەگەرێ گوهۆڕینێن گەلەک مەزن و مرۆڤ دشێت بێژیت کو نەخشێ سیاسی یێ جیهانێ ژی هاتیە گوهۆڕین و گۆت: (وەلاتێن ئێکەتیا ئۆرۆپا هاریکاریا ئەمریکا نەکرن، ئەمریکا ژ وەلاتێن ئێکەتیا ئۆرۆپا گەلەک توورە یە، ل ئالیێ دی ئەندامێن ناتۆ ژی ئەمریکا ب تنێ هێلان و نها ئەمریکی وەسا هزر دکەن مانا وان د ناتۆیێ دا ئێدی چو مفایا خوە بۆ ئەمریکا نینە و ژ بەر ڤێ یەکێ ژی پشتی ب دووماهی هاتنا شەڕی دێ گوهۆڕینێن گەلەک مەزن ل سەر ئاستێ جیهانێ روو دەن و ژ بەر ڤێ یەکێ ژی هەکە ئەز بێژم شەڕێ ئیرانێ بوویە ئەگەرێ گوهۆڕینا نەخشێ سیاسی یێ جیهانێ د جهێ خوە دایە).
ناڤهاتی ئەو یەک ژی دیار کر، تنێ بابەت ئەمریکا و ئۆرۆپی ژی نینن، بەرێ خوە بدەنە وەلاتێن کەنداڤی کو ژ بەر ڤی شەڕی زیانێن گەلەک مەزن گەهشتینە وان وەلاتان و هەر ژ نها ڤە وەلاتێن کەنداڤی هزرا ڤێ یەکێ دکەن کو پشتی شەڕی پێداچوونێ د پەیوەندیێن خوە یێن ل گەل ئەمریکا دا بکەن، و هەروەسا ئێدی ب چو رەنگەکێ پەیوەندیێن ئیرانێ و وەلاتێن عەرەبی ب تایبەتی ژی یێن کەنداڤی باش نابن و باوەریا وان وەلاتان ئێدی ب ئیرانێ نەمایە و ئەمریکا ژی نەشیا وەکو پێدڤی وان وەلاتان بپارێزیت و گۆت: (پشتی شەڕێ ئیرانێ ب دووماهی بهێت دێ وەلاتێن کەنداڤی هزرا پاشەرۆژا خوە کەن، دبیت ئەو نەچار بن هەڤپەیمانیەکێ بهێز دروست بکەن و ئێدی ئەو نەچار نینن وەکو بەرێ تنێ پشتا خوە ب ئەمریکا گەرم بکەن، چونکی نها گەلەک مەترسی ل سەر وەلاتێن کەنداڤی هەیە و ئەو وەسا دبینن ئەمریکا نەشیایە وەکو پێدڤی ل هەمبەر مەترسیا ئیرانێ وان بپارێزیت).
ناڤهاتی ئەو یەک ژی دیار کر، شەڕێ نها کاریگەریا خوە ل هەموو جیهانێ کریە، هەکە شەڕ بۆ دەمەکێ دی ڤەکێشیت دێ قەیرانا وزێ دروست بیت و بێگومان دێ کاریگەریا خوە ل سەر هەموو کەرتێن ژیانێ کەت، چونکی هەتا نها ئەمریکا نەگەهشتیە ئارمانجێن خوە و ل ئالیێ دی وەسا دیارە ئیرانێ ژی بەرهەڤیێن خوە بۆ چەندین سالان کریە کو بشێت شەڕی بکەت، دڤێت ژبیر نەکەین نها ئیران شەڕێ مان و نەمانێ دکەت و ژ بەر ڤێ یەکێ ژی رەوش بۆ ئەمریکا و ئسرائیلێ زەحمەت بوویە، چونکی هەتا نها ئەمریکا و ئسرائیلێ نەشیاینە دەستهەلاتا ئیرانێ بگوهۆڕن و ئیران خوە بۆ شەڕەکێ دەمدرێژ بەرهەڤ کریە.
بسپۆرێ کاروبارێ سیاسی ئەو یەک ژی دیار کر، رەنگە ئەمریکا نەچار بیت سەربازێن خوە رەوانەی ئاخا ئیرانێ بکەت و ل هەمبەر دا ئیران ژی نها بەرهەڤیان بۆ شەڕەکێ وەسا دکەت، هەکە تشتەک وەسا روو بدەت دێ هەموو هەڤسەنگیێن سیاسی ل دەڤەرێ هێنە گوهۆڕین و وی دەمی هەموو رۆژهەلاتا ناڤین دێ بیتە مەیدانا شەڕی و بێگومان دێ کاریگەریا خوە یا هەری مەزن ژی ل سەر کوردان هەبیت و گرنگە هەموو هێزێن کوردی ب تایبەتی ژی یێن رۆژهەلاتێ کوردستانێ خوە بۆ هەر ئەگەرەکێ بەرهەڤ بکەن.
