شەڕێ حەماس و ئسرائیل..
سێ سیناریو و هەرسێ زەحمەت
شەرێ ئسرائیل و حەماسێ دگەرما و گەرما خوەدایە، هێشتا هەردوو ئالى قەبێ ئێکودوو دخوازن و گەف ل بەرامبەرى گەفێ تێت ڕاگەهاندن و مرۆڤێن بێگونەهێن کەرتێ غەزایێ بەردەوام دبن قوربانى…
دکاودانەک هۆسادا دێ زەحمەت بیت، باسێ سیناریوێن ئاشتیێ بێتە کرن. لەوان ژى پرسیارەک تێت پێش: ئایا ئەڤ شەڕ دێ بەرەف چ سیناریویێ چیت؟!
یەکەم سیناریو: دێ ئەوبیت، ئەوا گەلەک ب دلێ نەتەنیاهۆ و ڕاستڕەوێن ئسرائیلێ. غەزا دگەل ئەردى بێت تەخت کرن، خەلکێ غەزایێ ببیت موهاجر و پەناهبەر ل دەولەتێن عەرەبا، ئەوجا هێرشا لەشکەرییا ئسرائیلێ ب سەر غەزەیا وێراندا بگریت. سەدان هزار ژ خەلکێ غەزایێ دێ ئێن کوشتن، وێنێن پەناهبەران و دەرد و ئازارێن وان دێ مالپەر و شاشێن تەلەفزیونا پر کەن و ڤان وێنان دێ کارڤەدانا خوە هەبیت لسەر ڕایاگشتییا جیهانى و ئەوروپى و تەنانەت یا ئەمریکى ژى و خوەپێشاندانان دێ کارتێکرنا خوە لسەر بارێ سیاسیێ وەلاتێن خوە هەبیت. ب تایبەت ل ئەوروپا ڕایاگشتى دێ ژ لایەن حزب و گرۆپێن ئەوروپى یێن ڕاستڕەو ب دژى حزبێن حوکومدارێن نوکە هێت بکار ئینان و دێ بیت مایێ نەسەقامگیریێ ل ئەوروپا. ژ لایەک دیڤە ئەمریکا و دەولەتێن دى یێن پشتەڤان و دوست بۆ ئسرائیلێ دێ نە ئامادە بن، تا ڤێ ڕادێ بەرژەوەندیێن خوە دگەل دەولەتێن عەرەبى و ئسلامى تێک بدەن. نەمازە دویر نینە کوشتنا سەدان هزاران مەدەنییا ل غەزایێ ببیت مایێ سەرهلدانێن جەماوەرى یێن توند ل وەلاتێن عەرەب و ل هندەک وەلاتێن مسلمان ژى و کار ب بەر بەرفرەهبوونا شەڕیڤە بچیت و ئاگەر بەربیت هەموى ڕۆژهەلاتاناڤەڕاست.
سیناریووا دووێ: شەڕێ زەمینى پێنگاڤ ب پێنگاڤ بیت و بۆ ماوێ چەند هەیڤا ڤەکێشیت تاکو دەستێ لەشکەرێ ئسرائیلى دگەهیت غەزایێ و تونەل و ئەنبار و کارخانێن چەک یێن بنئەرد یێن حەماس ژناڤ دبەت و حەماسێ ب دوماهیک تینیت. ئەڤ سیناریو دێ بۆ ئسرائیلێ و حکومەتا نوکە گەلەک زەحمەت بیت و دێ گران لسەر ئسرائیلێ ڕاوەستیت، ب سەدان کەس ژ سەربازێن ئسرائیلێ دێ ئێنە کوشتن. ڕاستە جڤاکا ئسرائیلى یا ئامادەیە قوربانیان پێشکێش بکەت بۆ پاراستنا هەبوونا خوە و دەولەتا خوە. لێ د چارچووڤێ ژێکترازانا ناڤخوەیا جڤاکا ئسرائیلى و ئاریشێن ناڤخوە یێن حزبا، ئامادەییا قوربانیدانێ لاواز دبیت و جڤاک دێ نەیا ئامادە بیت، پێشوازییا سەدان، بەلکو ژى ب هەزاران، جەنازێن کوشتییا بکەت و بێدەنگ بمینیت. رەنگڤەدانا شەرەکێ دوومدرێژ لسەر ڕایاگشتییا جیهانى و ئەوروپى دێ دگەل دەمى سنوردار بیت، بەلێ هەر دیسا دویر نینە، ئەڤ سیناریو ژى ببیت مایێ پێلێن پەناهبەریێ ژ غەزایێ و ئەوجا کارڤەدانا پەناهبەر و ئێش و ئازارێن وان لسەر ڕایاگشتییا جیهانى و ئسلامى و عەرەبى…
سیناریووا سیێ: بۆمبەبارانکرنا غەزایێ ژ لایەن لەشکەرێ ئسرائیل کێم ببیت و سنوردار و ئێرشا زەمینى نەچیت پێش، یان ژى ئێرشا زەمینى سنوردار بیت. ل بەرامبەردا حەماس بێت قاییل کرن، چەکێ خوە ڕادەست بکەت و خوە ژ غەزایێ ڤەکێشیت بۆ وەلاتێن عەرەبى. بێگومان مەبەست ئەو نینە (و مومکن ژى نینە) حەماس چەکێ خوە ڕادەستى لەشکەرێ ئسرائیلێ بکەت، بەلکو چەکێ خوە ڕادەستێ لایەنێ سیێ بکەت. لایەنێ سیێ ل ڤێرە دشێت ببیت جڤاتا نەتەوێن ئێکگرتى و چەند وەلاتەکێن عەرەبى مینا وەلاتێ مسرێ و عەرەبستانا سعودى. دهەمان دەمدا تونەل و ئەمبارێن بنئەردێن چەکێ حەماس لژێر چاڤدێرییا ڤى لایەنێ سیێ و ئسرائیلێ بێن ژناڤ برن. ب ڤى ڕەنگى غەزا ژ وێرانکرن و کاڤلکرنێ ڕزگار دبیت و دهەماندەمدا ئاڤا رۆیێ حەماس ژى تێت پاراستن. ئەڤ سیناریو ژى زەحمەتە، چونکى قایلکرنا حەماسێ نەیا ساناهییە، ب تایبەت ژبەرکو وەلاتێ کارتێکرن هەبیت لسەر بڕیارا حەماسێ نە وەلاتێ مسرێ و عەرەبستانا سعودییە بەلکو وەلاتەک دى ل ڕۆژهەلاتا ناڤەڕاست. هەردیسا قایلکرنا حوکومەتا نەتەنیاهۆ ب سیناریوێ سیێ دێ گەلەک زەحمەت بیت، چونکى ئەڤ سیناریو دێ بیت مایێ لابرنا نەتەنیاهۆ ل دەمەک نێزیک.
