شەڕێ دایك و بابان زارۆكان تووشی تێكچۆنا دەروونی دكەت
بێوار حەمدی:
دەمێ زارۆك د ماڵەكا شەڕ و پێكدادان دا مەزن دبیت د داهاتی دا دێ هندەك جورێن كەسایەتیان لدەڤ پەیدا بن وەكو كەسایەتیەك ب دژی جڤاكی، چارەسەركارەكێ دەروونی ژی گۆت: دەمێ نەخۆشی دناڤبەرا دایك و بابا دا هەبیت زارۆك ژی تووشی تێكچۆنێن دەرونی دبیت ژبەركۆ یێ بچۆیكە و نزانیت چ چارەسەریان پەیدا بكەت.
عەلی عەبدولقادر، چارسەركارێ دەروونی، د دیدارەكێ دا بۆ رۆژناما ئەڤرۆ دیار كر هەر دەمێ زارۆك فاما دبیت هەست و سۆز لدەڤ پەیدا دبن، ئەڤجا چ هەست و سوزێن كەیفخۆشیێ بن یان یێن عاجزیێ و هەر دەمێ نەخۆشیەك دناڤبەرا دایك و بابا پەیدا دبیت ئەو دزانیت كۆ ئەڤە تشتەكێ نەخۆشە و گۆت: (د ڤی حالەتی دا گەلەك گڤاشتنێن دەرونی لدەڤ زارۆكی پەیدا دبن، ژبەركۆ یێ بچویكە ب دروستی نزانیت كا چ چێدبیت و نەشێت چ چارەسەریان پەیدا بكەت ).
چارەسەركارێ دەروونی، دیار كر ژی دەمێ ژیێ زارۆكی یێ بچویك ژی بیت و ڤان نەخۆشیان دبینیت دێ تووشی نەخۆشی و تێكچۆنێن دەروونی بیت، وەكۆ نەخۆشیێن (تێكچۆنا خەوێ، دوو دلی، خەمۆكی، تێكچۆنێن ڕەفتاری) و گۆت: (هەروەسا ژبلی هندێ ژی ئەو دبیتە مرۆڤەكێ عینادی و توڕە و هەست ب تنێبۆنێ دكەت).
عەلی عەبدولقادر د بەردەوامیا ئاخفتنێن خودا گۆت: (د داهاتی دا هندەك جوڕێن كەسایەتیان ژی لدەڤ زاڕۆكی پەیدا دبن وەكۆ (كەسایەتیا ب دژی جڤاكی یان كەسایەتیا دویری جڤاكی)، لەوما ئەڤ حەزە لدەڤ پەیدا دبیت كو زیانێ بگەهینیتە دەوروبەرا و نەشێت چ جاران پشت بەستنێ ل سەر خۆ بكەت).
چارەسەركارێ دەروونی عەلی ئەو چەندە ژی دا زانین كو هندی دایك و باب بشێن ب دانوستاندنەكا نەرم ئاریشێن خو چارە بكەن باشترە ژبەركو هەتا هەكە ئەو ل دووری چاڤێن زارۆكان ژی شەڕە دەڤا بكەن زارۆك هەر هەست ب ئەوان دكەت، لێ هەكە شەڕ و پێكدادان پەیدا بون ژی گەلەك گرنگە دایك و باب شەڕ و نەخۆشیێن خۆ ل دووری چاڤێن زارۆكان ئەنجام بدەن و گۆت: (هەتا كو نابیت دەنگێ خۆ ژی بلند بكەن، چۆنكی دەنگێ بلند كارتێكرنەكا خراب ل دەروونێ زارۆكان دكەت، ب هەموو رەنگان دڤێت بزاڤێ بكەن زارۆك تێكەلی ئاریشیێن وان نەبیت).
