شەڕێ دلی و مەژی
هێلین سالم
دناڤبەرا دل و مێشكی دا شەڕەكێ بەردەوام هەیە، شەڕەكێ كو هەموو مرۆڤ پێ دئێشن، مێشك ب لۆژیك و ژیری خوە بیر دكەت، لێ دل ب هەست و سۆزێن خوە ڕێ نیشان ددەت، ئەڤ هەڤڕكیە گەلەك جاران دبیتە ئەگەرێ دودلی و نەرحەتیێ دژیانا مە دا.
گەلەك جاران مێشك تشتەكی دبێژیت و دل تشتەكێ دی، مێشك دێ بێژیت (ئەڤە نە باشە بۆ تە) لێ دل دێ بێژیت ( ئەز ڤێ چەندێ دخوازم) كیژ یا ڕاستە و كیژ یا خەلەتە؟ ئەڤ پرسیارە گەلەك یا گرانە.
دەمێ ئەم بڕیارێن گرنگ دگرین، ئەم دشێین پشتبەستنێ ب كیژكێ بكەین؟ مێشكێ مە یێ ژیر یان دلێ مە یێ هەستیار؟ چارەسەریا راستی دناڤبەرا واندا یە، نە ب تنێ گوهداریا مێشكی بكە و نە ب تنێ گوهداریا دلی بكە.
مێشك باشیێ دخوازیت ب شێوەیەكێ پراكتیكی و عەقلانی، دل ژی باشیێ دخوازیت بەلێ ب شێوەیەكێ هەستیار و مەعنەوی، هەردو لایەن پێدڤینە بۆ ژیانەكا تەمام، هونەرێ ژیانێ ئەوە كو مرۆڤ بشێت هەڤسەنگیێ دناڤبەرا دل و مێشكی دا پەیدا بكەت و گوهداریا هەردویان بكەت و بزانیت كەنگی پێدڤیە گوهداریا وان بكەی، ئەڤ شەڕە دێ هەردەم بەردەوام بیت، چونكی ئەو بەشەكێ سروشتی یێ مرۆڤایەتیێ یە، لێ ئەم دشێین فێر ببین كا چەوا ژێ مفای وەربگرین و بكەینە هێزەكا ئەرێنی دژیانا خۆ دا و دێ چەوا هەڤسەنگیێ دناڤبەرا دلی و مێشكی دا كەی؟ ل دەستپێكێ هەردویان ب نیاسە بزانە دلی چ دڤێت و مێشكی چ دڤێت دڤێت زالبی لسەر هەستێن دلی و بریارێن رژد یێن مێشكی، كاغەزەكێ بینە و بنڤیسە دلی ئەڤە دڤێت و مێشكی ئەڤە دڤێت و سەحكە تێبیێن هەردو لایا و دگەل خو بێژە كیژ ژوانا پتر سەربۆر هەنە و كیژ ژوانا پتر هاری تەكریە د تەنگاڤیان دا، بڕیارێن خوە هەڤسەنگ بكە دناڤبەرا هەردویان دا چنكو ب پێشگوهـ ئێخستنا ئێك ژوان سەركەفتن نابیت.
دەمی بدە خوە بڕیارێن بلەز نەدی دا پەشیمانی ب سەر تەدا نەهێت، یا گرنگ ئەوە سەرنجا دلێ خوە بكەی ب هێزا مێشكێ خوە هەر كەسەك دزانیت دلێ وی ب چ خۆش دبیت و ئاقلێ وی ژ چ دبڕیت هەر دەمێ دلێ تە لسەر بریارەكێ خۆش بۆ و عاقلێ تە ژێبری دبیت ئەڤە بڕیارەكا راست بیت، لێ ئەگەر تە بڕیار دا و یا دروست نەبوو بلا پەشیمانی ب سەر تەدا نەهێت چونكو خەلەتی دبنە سەربۆر و سەربۆر دبنە عاقل و هەردەمێ عاقلێ تە زال بوو بسەر هەستێن تە و جەڕكێن تە یێن هەستا تژی بوون دێ یێ زال بی لسەر هەموو ژیانا خوە. هەڤسەنگی ب ڕامانا یەكسانیەكا ٥٠/٥٠ ناهێت بەلكی هەڤسەنگی ئەوە تۆ بشێی ب گوهـ ل هەردو دەنگێن دل و مێشكێ خوە بی و رازیبوونا هەردویان وەربگری.
