شەڕێ سحێلا هێمایـێ خـوەڕاگری و بنگۆڕكرنا خەونێن دوژمنان بوو
ديدار، سالار محةمةد دۆسكى:
4 – 4
هەموو هەڤالێن وی گەلەك حەز ژێ دكرن, ب راستی ژدەستدانا وی كارتێكرنەكا مەزن ل دەڕۆنێ مە هەمیان كر، هزار سلاڤ ل سەر گیانێ وی یێ پاك و تەڤایا شەهیدێن رێكا ئازادیا كوردستانێ بن.
فەرماندێ پێشمەرگەیێ كوردستانێ، محەمەد ساركی، بەرپرسێ رێكخراوا (كۆماتە) سەرب (ل ناوچا دهۆكێ) ڤە، ل سەردەمێ شۆرەشا گولانا نیشتیمانی و پێشكەفتن خواز، سەبارەت.. شەهید – وەحید باكۆزی گۆت: ل ناڤەندا سالا( 1987)ێ شەهید – وەحید – ژ رێكخراوا دەشتا سێمێلێ هاتە ڤەگوهاستن بۆ رێكخراوا مە یا (كۆماتە) وەك كادر و جێگرێ رێكخراوێ ..ئەوی دەمی – عەلی كێمیاوی – ببوو بەرپرسێ نڤێسینگەها رێكخستنا باكۆر, هەر ل دەستپێكا هاتنا وی, ئۆپراسیوونێن رژێما فاشست دژی دەڤەرێن ئازادكری دەستپێكرن, ژبۆ سۆتن و وێرانكرنا گوندا و ژناڤبرنا ژێرخانا ئابۆرییا كوردستانێ, مە ژی وەك پێشمەرگێ شۆرەشگێرێ كوردستانێ ل هەمی ناوچەكێ بەرهەڤیێن خۆ كرن, ژبۆ بەرسینگگرتنا هەرزێدەگاڤیەكا دوژمی بۆ دەڤەرێن رزگاركری, ئەم ل سەر چەند تەوەرەكان هاتینە دابەشكرن, رێكخراوا مە هاتە نێزیكی گوندێ (كەمەكا), هەر ل دەستپێكێ ئەم شیاین چالاكیەكا نمۆنەیی ل بنارا گوندێ كەمەكا دناڤبەرا گرسەیسی و جادا سەرەكیا گوندیدا ئەنجامدەین, كو ئەوژی دانانا بویسەیەكا رێكوپێك بوو ل سەر جادا سەرەكی, تومبێلەكا سیخورێن رژێمێ دگەل رێڤەبەرێ ئەمنا مانگێشكێ و رێڤەبەرێ ئەمنا زاویتە هەردوو دوێ تومبێلێ دابوون, ددەمەكێ نێزیكدا ئەم شیاین ئەوان سیخوران بكوژین و گەلەك بەلگەیێن وان ژی كەتنە ددەستێ مەدا ..مەگەلەك مفا ژ وان بەلگا دیت, پاشی پشتی دەمەكێ كورت مە ب هەماهەنگی دگەل بارەگایێ لیژنا ناوچا دهۆكێ ل دویف نەخشەیەكێ رێكوپێك هێرشكرە سەر هەرچوار رەبیێن سپیرێزی, ددەمەكێ كورتدا بێ زیان ئەم شیاین ئەوان رەبیا هەمیان بگرین و ژجاش و نوكەرێن رژێمێ رامالین, چەك و تەقەمەنیەكێ زۆر كەفتە دەستێ مە, پشتی ڤێ چالاكیێ چەندین چالاكیێن دی ژی مینا رەبیا سەرێ گرێ گەرماڤا و رەبیێن سەرێ ماسیكێ و پشكداریا مە دداستانا مەزنا دێرالۆكیدا و .. هتد و دڤان هەمی چالاكی و داستاناندا شەهید -وەحید – رۆلەكێ دیار و بەرچاڤ تێدا هەبوو, دەمێ چالاكیەك دهاتە ئەنجامدان, گەلەكێ ب لەزبوو ئەم چالاكیەكا دی بكەین, یەك ژ ساخلەتێن هەرە گرنگێن وی ئەوبوون هەردەم ورەیەكا بەرز و ئیرادەیەكا ب هێز هەبوو, گەلەكێ كێفخۆش و سوحبەتچی بوو دگەل هەڤال و هەڤسەنگەرێن خۆدا .كەسەكێ دلسۆز و رەوشت بەرز و مێرخاس و خودان هەلویستەكێ پاكێ كوردایەتیێ بوو, هزار سلاڤ ل سەرگیانێ وی و تەڤایا شەهیدێن بەرخوەدانێ و رێبازا پیرۆزا كوردایەتیێ و بارزانی بن.
پێشمەرگەیێ شۆرەشا گولانا پێشكەفتنخواز، تەیار سەلیم گەرماڤی،
بەرپرسێ رێكخستنا لقێ/20ێ پارتا مە پارتی دیموكراتی كوردستان ب ڤی ئاوایی پەسن و سالوخەتا مێرخاسی و مێرچاكیا شەهیدێ سەركردە كاك – وەحید باكۆزی دكەت و گۆت: شەهید وەحید باكۆزی – وەكو یەك ژهەڤال و هەڤرێباز و هەڤسەنگەرێ من دقادا خەبات و بەرخودانا رۆژانێن سەختێن كوردایەتیێ دا, د وژدانا گەل و نەتەوەیی دا, مینا گەنجەكێ خوین گەرم وزیرەك و خورت و دلسۆز و فیداكار و كوردپەڕوەر, مێشكێ وی و هەست و حەز و ڤیانا وی ب رێبازا پیرۆزا پارتی و بارزانی دهێتە ئاڤدان.. ل دەستپێكا سالێن هەشتیا ژبەر زولما بەعسیا و دوژمنكاریێن رژێما سەدامێ فاشست وگۆربەگۆر ل سەر مللەتێ مە یێ كورد،بریارێ ددەت ئێدی بگەهیتە ناڤ رێزێن شۆڕەشێ و چەكێ پێشمەرگاتیێ هەلگریت و خەباتێ بكەت بۆ دیموكراسیەتێ ژبۆ ئیراقێ و ئوتونومیێ راستەقینە بۆ كوردستانێ, دوارێ لەشكریدا چەكێن شۆڕەشێ كلاشینكۆف و بیكەیسی و ئارپیچی ل سەر ملێن وی بوون و ب ئاگرێ چەكێ خۆ لیس و مەخەلێت جاش و خۆ فرۆش و دوژمنا دسۆتن و سینگێ خۆ دكرە مەتال بۆ پاراستنا دەڤەرێن رزگاركری, هەردەنگە تەقەیەك هاتبا ل دەڤەرێ دابینی كاك – وەحید باكۆزی یێ لپێشیا هەڤالان ئامادەیە و گیانێ وی ل سەردەستێ وی یە, لاشێ وی ئاشق و شەیدایێ پارچەئاسنابوو, ژلایێ سیاسیڤە مەژیێ وی ب پرنسیپ و بیروباوەرێن رێبازا بارزانی هاتبوو ئاڤدان.. بەردەوام راستگۆیی و خزمەتكرن وپاراستنا خاك وگەل و وەلاتی ژئارمانجێن هەرەگرنگ و سەرەكیێن وی بوو, كاك – وەحید هەڤال و هەڤرێ و هەڤچەپەڕێ مەبوو, مرۆڤەكێ جامێر و زمان خۆش و ترانەكەر و چاڤنەترس و خودان هەلویست بوو, شەهیدێ ریفراندۆم و سەربەخۆیا كوردستانێ, هەموو دەما شەهیدبوون نیەت و حەز و ڤیانا وی بوو, بووی شەڕ و بەرخودان داوەت و دیلان بوون, بریاردا دگەل هەڤالێن خۆ ل سەنگەرێن رۆژئاڤا دیجلەی قادا مەیدانێ چۆل نەكەت و مەیدانا شەڕی ل دوژمنا بكەتە گۆڕستان, و گیانێ خۆ كرە قوربان و گۆری كورد و كوردستانێ كر, گیانێ شەهیدی شادە و سەرێ مالبات و هەڤال و هەڤچەپەڕ و رێبازا وی بەرز و بلندە كو چەپەڕێ وی ڤالا نینە و هزارەها – وەحید باكۆزی – ل سەر ڤێ رێبازێ هاتینە پەڕوەردەكرن, راستە ئەڤرۆ – وەحید – دناڤ مەدا نینە لێ رحا وی و ناڤ و بیروباوەرێن وی دگەل هەر پێشمەرگەهەك و پارتیەك دلسۆزدایە دەستا نا داهێلن هەتا سەربەخۆیا كوردستانێ یا كو شەهید – وەحیدی – سەرێ خۆ دانایە سەر نەهێتە راگەهاندن, گۆڕێ تە ب گول و نێرگزبیت هەڤال و برایێ خۆشتڤی هەبوون و مێرخاسیاتە دێ هەر مینت، گیانێ تە شاد و سەرێ مالباتاتە ساخ، كوردستان ب سایا خوینا تە ئازاد و بەختەوەر.
