شەڕێ شێڤێ چێترە ژ قەرقەشەیا ل سەر جۆخینێ
ئيحسان ئــامێدی
شێڤ ئەو زەڤیا بەرهەڤ بۆ چاندنێ، لێ هشتا نەهاتیە چاندن، جۆخین هندەك دەڤەر ل جهێ بێدەر بكاردئینن، ئەو جهە یێ دەرامەت لێ دهێتە كۆمكرن و گێرەكرن و (كا) و (دان) دهێنە ژێكجوداكرن و بۆ عمبار و كادینان دهێتە ڤەگوهاستن.
كێشە و ململانا مرۆڤان ژ كەڤندا ل سەر كاری و ئەردی و بەرهەمی و ڤەگوهاستنێ و بازاركرنێ هەبووینە و زیانێن مەزن گەهاندی نە، ژبەر هندێ زانایێن وان سەردەمان پەند و ئامۆژگاریێن خۆ ددان داكو شەڕ چێنەبن و زیان ڤێ نەكەڤن و ئەگەر ببن ژی ل وان جهان بن یێن كێمتر زیان ژێ چێدبن، لەوا دگۆتن شەڕێ ل شێڤێ چێترە ژ قەرقەشەیا ل سەر جۆخینێ، ل ڤێرە شیرەت ل خەلكی دكرن كو كێشەیێن خۆ ل شێڤێ، ئەو زەڤیا نەچاندی بەری زەحمەتێ پێڤەببەن و بهێتە بەرهەمی چارەكەن، خۆ ئەگەر ل وێرێ شەڕی ژی بكەن دێ زیان بتنێ ب شەركەران كەڤیت و دەرامەت نەهاتیە چاندن كو زیان ڤێ بكەڤیت و كارتێكرنێ ل خەلكی بكەت. بەلێ هەكە بۆ دەمێ كۆمكرنا بەرهەمی و دەرامەت هاتە ڤەگوهاستن بۆ سەر بێدەرێ، ئێدی دێ كارێن پێدڤی هێنەكرن قرش بهێتە گێرەكرن و كا و دان بهێنە ژێكجوداكرن و ڤەگوهاستن بۆ مالان و عمباركرن، ل وی دەمی هەر قەرقەشەكا ل سەر بێدەرێ چێبیت دێ بیتە هۆیێ كار راوەستاندنێ و تێكدانا رەوشا بێدەرێ و ژ گۆتنەكا ساڕ پیكدادان چێدبیت و چریسكەكا ئاگری تێرا هندێ هەیە گۆڕی ب هەمیێ بكەڤیت و بسۆژیت و زیان ب هەمیان بكەڤیت!.
ئانكو مەبەست ژ ڤێ پەندێ كێشەیێن خۆ د دەمێن خۆدا ل جهێ بەرژەوەندیێ چارەسەركەن و گفتوگۆ و شەڕێ خۆ ل وێرێ بكەن و ئێكلاكەن، بەری كەدا كار و رێنجبەریێ بەرهەم بهێت؛ دا زیان مەزن نەبن.
بەلێ دیارە رێڤەچوونا ژیانێ كەفتیە ژێر باندۆرا حەزێن كەسۆكی و یاسایێن ئاسمانی و یێن مرۆڤی نەشیاینە مرۆڤی هەڤساركەن و بۆ ئاراستەیا باشتر بهاژۆن، لەوا هەردەم كێشە و شەڕ و پیكدادان هەنە!، شەڕ و قەرقەشە ل شێڤێ ژی هەنە و ل جۆخینێ ژی و چووینا ناڤ گوندی و كەفتیە ناڤ مالان دا ژی و سەرێ هەمیان پێڤە گێژبوویە و زیان ب هەمیان گەهشتیە!.
جڤاك ب گشتی سیاسی بوویە و ل بن باندۆڕا پێشكەفتنا زانستی و تەكنولۆژی و بیاڤێن سۆئیال مەدیایێ هەمی بووینە مەدیاكار و مایێ خۆ د هەمی پرسان دا دكەن و ئەڤە مافەكێ سروشتی یە، بەلێ پەندەكا كوردی هەیە دبێژیت: پێژتنا نانی بۆ نانپێژی بهێلە، باشە هەر ئێك شۆلا خۆ بكەت. بەلێ دەمێ بیاڤەكێ چالاكیێن مرۆڤی باندۆڕا خۆ ل سەر ژیانا خەلكی هەبیت، ل وی دەمی مافێ خەلكی یە ب ئازادی رایا خۆ دەرببڕیت.
هەڤولاتیان ئاسایش و پاراستن و دەرفەتێن كاری دڤێن دا ب ئارامی بژین، سیاسەت ژی كارێ سیاسەتڤانان و لایەنێن سیاسی یە دا بەرژەوەندیێن گشتی بجهبینن، ئەو ب خۆ ژی هەر هەڤولاتینە كارێ سیاسەتێ هەلبژارتین و دكەن و لایەنێن سیاسی هێز و رەوایا خۆ ژ مللەتی وەردگرن و دەنگێن هەڤوەلاتیان د هەلبژارتنان و ڕاپرسینان دا دڤێن، دا بسەركەڤن و ب ئارمانجێن خۆڕا بگەهن.
مللەتی ب گشتی یا خۆ گۆتیە و كریە، ل سەردەمێ شۆرش و سەرهلدانان پێشمەرگەبوونە و ل هەنبەری دوژمن و داگیركەران سینگێ خۆ كرینە مەتال و خۆ كریە گۆری و قوربان، و ل هەلبژارتن و راپرسینان دا ژی یا خۆ گۆتیە و رایا خۆ دەربڕیە، ئێدی بەرپرسیارییا لایەنێن سیاسی یە رێزێ ل ئیرادەیا مللەتی بگرن و یا مللەتی گۆتی بجهبینن.
ل سەر ڤی بنگەهی دڤێت پرسا هەلبژارتنان گەڕا شەشێ یا پەرلەمانێ كوردستانێ ل بارەگایێ پەرلەمانێ كوردستانێ بهێتە چارەسەركرن، ئەندامێن پەرلەمانی ل وێرێ بەرهەڤ بن و گفتوگۆ و دانوستاندن و قەرقەشە و حەتا شەڕێ خۆ بۆ چارەسەركرنێ ل وێرێ بكەن و نە ڤەگوهێزن بۆ ناڤ جڤاكی و نەهێلن زێدەتر سەرێ خەلكی پێڤە گێژبیت و پتر بێزار بن!.
دێ بێژین ل بن باندۆڕا لایەنێن سیاسی، ئەندامێن هندەك لایەنان ئامادەنابن و پرس چارەسەر نابیت، پا چ بكەن!؟ بلا هەلبژارتنەكا دی بكەن و بریاربدەستێن لایەنێن سیاسی سویندا شەرەفێ بخۆن كو پێگیریێ ب قانوون و رێنما و ئەنجامێن هەلبژارتنان بكەن!.
هندە هندی شەڕێن ناڤ شێڤا هاتینەكرن و ل سەر بێدەران و ل ناڤ گوند و باژاران و كۆلان ـ كولان و مال بۆ مالان ژی هاتینەكرن و ل دوماهیێ ژبلی زیانان و شەرمزاریێ ب نەچاری پێكهاتن كرن، ئەڤجا مادەم هۆسانە و دوماهی هەر پێكهاتنە، كەرمكەن ل دویڤ بنەمایێن دیموكراسیەتێ كێشەیێن خۆ چارەسەركەن و مللەتی ئارام كەن.
شەڕ و كێشە و ئالۆزی و پێكدادان ل دەڤەرێ و ل جیهانێ گەلەكن و كوردستان د ناڤ وی ئاگری دایە و د ناڤخۆدا ژی قەرقەشە و شەڕێ سیاسی و مەدیایی دەروونێ خەلكی تێكدایە، ئێدی دبێژن هندی ئەڤ شۆلە درێژ بوو، سەرێ مە پێڤە گێژ بوو!.
مللەت پێدڤی ب رزگاركەرەكی یە، ژ ڤێ گێژبوونێ رزگاربكەت، ب هیڤینە هەمی لایەنێن پەیوەندیدار ل سەر دەستپێشخەریا سەرۆك بارزانی كۆم ببن و ڤێ پرسێ ئێكلاكەن.
دێ بێژین، قەرقەشەیا مەدیایی چێترە ژ شەڕێن چەكداری! لێ یا باش و باشتر هەردو نەبن و پێكهاتن هەبیت!.
هەر ململانەكێ دوماهیەك یا هەیی، هەر ئالۆزیەكێ ڤەبوونەكا هەی و هەر كێشەكێ چارەسەریەكا هەی!. و دوماهی هەر پێكهاتنە، ڤێجا مادەم هۆسانە، بۆچی دێ دەمی ژ خۆ بەن و قوربانیان دەن؟، هەما لۆژیكێ ژیری بكاربینن و گفتوگۆیان ل سەر بنگەهێن دیموكراتی و قانوونی بكەن و بگەهنە ئەنجامەكێ ئەرێنی، مللەتی ئارام كەن و خۆ سەرفراز كەن.
