شەڕێ چەكدارێن پەكەكێ و لەشكرێ توركیا مەترسی ل سەر ژیانا وەلاتیان پەیداكریە
ئامێدیێ، مەحمود نهێلی:
د دو رۆژێن دەربازبووی دا و ژ ئەنجامێ شەڕێ د ناڤبەرا چەكدارێن پەكەكێ و لەشكرێ توركیا دا چەندین جاران گوندێن دەڤەرا نهێلێ كەفتینە بەر هێڕش و مەترسیان.
ئاكنجیەكێ گوندێ بەرچی بناڤێ ئەبابەكر بۆ رۆژناما ئەڤرۆ دیار كر، گوللەیەكا تۆپێ ل رۆژا ئەینی بەر مالا وەلاتیەكێ گوندێ بەرچی كەفت و زیان گەهاندنە خانیێ وی و گۆت: «ژ بەر كو ل وی دەمی كەس ل دەرڤە نەبوو سوپاس بۆ خودێ زیانێن گیانی نەبووینە».
ژ لایەكێ دیڤە، دوهی رۆژا شەمبی 11/11/2023 و ژ ئەنجامێ شەڕێ د ناڤبەرا چەكدارێن پەكەكێ و لەشكرێ توركیا دا ل چیایێ مەتینا ل دەڤەرا نهێلێ گوللەیاكا دوشكێ ب مالا وەلاتیەكێ گوندێ سەرگەلێ كەفت.
ل گۆر شاهد حالان دوهی بەری نیڤرۆ شەرە تەقە د ناڤبەرا چەكدارێن پەكەكێ و لەشكرێ توركیا دا دروست بوویە و گوللەیەكا دوشكێ ب مالا وەلاتیەكێ گوندێ سەرگەلێ كەفت، لێ سوپاس بۆ خودێ زیانێن گیانی نەبووینە ب تنێ جهێ گوللە بەركەفتی زیان گەهشتینێ.
