شەڕ ب دژواری بەردەوامە و پۆتین هۆشداریێ ددەتە ئیرانێ
بەرپرسەکێ وەزاەتا دەرڤە یا رۆسیا دیار کریە، ل سەر داخوازا ئیرانێ پۆتین ل گەل ترامپی ئاخڤیە و پاشی ژی هۆشداری دایە رێبەرێ ئیرانێ کو دڤێت ل گەل ئەمریکا رێککەڤیت هەکە نە دێ دەستهەلاتا نها یا ئیرانێ ژناڤ چیت.
بەرپرسەکێ وەزارەتا دەرڤە یا رۆسیا دیار کریە، ل سەر داخوازا ئیرانێ سەرۆکێ رۆسیا پۆتین ل گەل ترامپی ئاخڤیە و داخواز ژێ کریە فشارێن خوە یێن ل سەر ئسرائیلێ زێدەتر لێ بکەت دا شەڕ بهێتە راگرتن و ل هەمبەر دا ترامپی ژی دیار کریە دڤێت ئیران هەموو مەرجێن رێککەفتنێ قەبوول بکەت.
هەمان بەرپرسی ئەو یەک ژی دیار کریە، پشتی پەیوەندیا تەلەفۆنی یا د ناڤبەرا ترامپی و پۆتینی دا، سەرۆکێ رۆسیا هۆشداری دایە رێبەرێ ئیرانێ کو لەزێ د رێککەفتنا ل گەل ئەمریکا دا بکەن، هەکە ئەو یەک نەهێتە کرن مەترسیا ژناڤچوونا دەستهەلاتا نها یا ئیرانێ هەیە.
ل ئالیێ دی دوهی سەرۆک وەزیرێن ئسرائیلێ جارەکا دی دیار کر، ئێرشێن وان دێ ل دژی ئیرانێ بەردەوام بن و داخوازا ژ خەلکێ ئیرانێ ژی کر کو ل دژی دەستهەلاتا نها یا زۆردار رابن و کار بۆ ئازادیا خوە بکەن و پەیڤدارێ لەشکرێ ئسرائیلێ ژی دوهی جارەکا دی داخواز ژ وەلاتیێن ئیرانێ کر کو خوە ژ هەموو ناڤەندێن سەربازی یێن ئیرانێ دوور بکەن، چونکی ئسرائیل دێ ئێرشی هەموو ناڤەندێن سەربازی ل هەموو دەڤەرێن ئیرانێ کەت.
سەرۆک کۆمارێ ئیرانێ مەسعود پزیشکیان ژی دوهی د داخویانیەکێ دا دیار کر، ئیران ب چو رەنگەکێ دەست ژ بەرنامێ خوە یێ ئەتۆمی بەرنادەت و دێ شەڕێ وان ل دژی ئسرائیلێ ژی بەردەوام بیت و گۆت: (مە بەری نها ژی چەندین جاران دیار کریە کو ئیرانێ نەڤێت چەکێ ئەتۆمی دروست بکەت، لێ د هەمان دەمی دا ئیران دەست ژ پیشەسازیا ئەتۆمی ژی بەرنادەت، بەرنامەیێ ئەتۆمی یێ ئیرانێ ژ بۆ مەرەمێن ئاشتیانە نە و داخواز ژ جڤاکێ نێڤدەلەتی ژی دکەین کو ئێرشێن ئسرائیلێ ب توندی شەمزار بکەن).
چاڤدێرێن سیاسی ژی وەسا دبینن، هەتا ئسرائیل نەگەهیتە هندەک ژ ئارمانجێن خوە دێ ئێرشێن وێ بەردەوام بن و ل ئالیێ دی ئیرانێ ژی ئەو شیان هەنە دشێت دربێن گران ل ئسرائیلێ بدەت، هەکە شەڕ بۆ دەمەکێ دی ڤەکێشیت دبیت ئەمریکا، بریتانیا، فرەنسا و هندەک وەلاتێن دی یێن رۆژئاڤایی ژی هاریکاریا ئسرائیلێ بکەن و دبیت وی دەمی شەڕ بەرفرەهتر لێ بهێت و بگەهیتە هندەک وەلاتێن دی یێن رۆژهەلاتا ناڤین، ژ بەر ڤێ یەکێ ژی ئەمریکا دڤێت ئیران هەموو داخوازیێن وێ قەبوول بکەت، لێ بەرپرسێن ئیرانێ وەسا دبینن ئەو یەک دێ بیتە شکەستنەکا مەزن بۆ ئیرانێ و ژ بەر ڤێ یەکێ ژی د رەوشا نها دا ئیرانێ دڤێت یا د شیان دایە ل دژی ئسرائیلێ بکەت.
