شەڤا شەهیدبووی
ناجح بێجانی
ئەوشەڤا شەهیدبووی، دەستپێكا پاییزێ بوو، وەكو هەمی ڕۆژیێن دیتر مژویلی ژیانەكا رۆژانەبوون، دەه سال بۆرین هێشتا چاڤەرییێ پەیدابوونا زاڕۆكەكێ ئێكانەبوون، لێ چ ئێڤارەكا جەرگهەژین بوو، تیڕۆژكێن ڕۆژێ بەرەف بەرزەبوونێ ڤە دبوون، ئەو تاڤزەركا ئێڤارییان ژی هێدی هێدی یا بەرزە دبیت، داخوزا شیڤەكا ب لەز هە ر وەكو بێژی ئوغەرەكا ل پیشیا وی زڤڕین یا ب زەحمەتە، چانتكێ خوە هاڤێتە بەر هەڤژینا خوە و گۆتێ: نانێ بۆ دو ڕۆژان، پشتی هینگێ دێ ڤەگەڕم.. جلكێن خوە لبەر خوەكرن و باش خوە خەملاند و دو رەختێن فیشەكێن (بڕنو)ێ ژی لسەر شیتكێ گرێدان و خاترخواستنەكا نە چاڤەریێ و بێ ژڤان بوو، ئەوێ ڕۆژێ سەروسیماێن وی ژ هەمی رۆژێن دیتر گەشتربوون، بەری خوە دا وێ ئوغەرێ و چەند پێنگاڤەكا بەرەف دەرگەهێ مالێ دو – سێ جاران ل پشت خوە زڤڕی، هەر و ەكو دڤیا ئاخفتنەكێ بێژت، لێ ئەزمانێ وی هاریكار نەبوو، تەنها سەرێ خوە هەژاند و چاڤێن وی ژ رۆندكان پڕ بوون، بەرێ خوە دا وێ ئوغەرێ.. پشتی دەمەك كورت، ل نێزیك گوندێ وان شەری دەستپێكر و هەڤژینا وی ژوان گولەیێن تڤەنگان دترسییا، كاودان یێ ئالۆزە. تو بێژی شەهید ببت، نە.. نە.. دێ زڤڕیت ڤە، ئەڤە چیە و ئەز بۆچی هندە یا ب گۆمانم؟ مانێ مە سۆزا دایی هەڤدو ئەو ڕۆژا زارۆك بهێتە سەر دونیایێ ئەم پێكڤە بن و ناڤەكی كوردی بۆ ب هەلبژێرن.. یا دڤان هزراندا، دەنگێ گری نێزیك دبیت.
