شەڤبێركێن ڕەوشەنبیری و خەلاتێ مەدالییا زێڕی ل دەڤەردارییا سێمێلێ
وەكو نەریتەكێ سالانە، دشەڤێن مەها رەمەزانا پیرۆزدا، ڕێڤەبەریا ڕەوشەنبیری و هونەری ل سێمێلێ ب ساخكرنا شەڤبێركێن ڕەوشەنبیری ڕادبیت، ئەڤ سالە ژی دسەقایەكێ ئارام و ئادارێ دا ل شەڤێن مەها رەمەزانێ چوارەمین سالە ب بەردەوامی ژبۆ خورتكرن و زیندیكرنا بزاڤا ڕەوشەنبیری، ئەدەبی، هونەری و فەلسەفی، مەرەم ژی؛ خورتكرنا هەڤنییاسینیا دناڤبەرا نڤیسەر و خوێنەر و ئەدەبدۆستان دا پەیداببیت، و شەڤێن رەمەزانێ ب چالاكیێن ئەدەبی و كەلتۆری و هونەری بهێنە ڤەژاندن میناك ژبوڤێ چەندێ هەر ژ كەڤن دا د شەڤێن رەمەزانان دا ئەڤ چالاكی دهاتنە ساخكرن لێ ب رەنگێن جیاواز. ئەڤ پێنگاڤ وێ دگەهینیت كو بزاڤا ئەدەبی ل دەڤەرێ یا زیندییە، سەرەرای وێ چەندێ وەسان خویا دبیت نە ب تنێ ل سەر ئاستی پارێزگەها دهۆكێ، بەلكو ل سەر ئاستێ هەرێما كوردستانی وەكو ناڤەندەكا ئەدەبی دهێنە نیاسین ژبۆ كۆمڤەكرنا نڤیسەرو ئەدەبدۆستان ژ تەخ و چینێن جودا جودا، ژبۆ گەهشتن ب ڤێ ئارمانجێ ژی ئەڤ بزاڤە خواستا نڤیسكارێن دەڤەرێ یە د شەڤێن مەها رەمەزانێ دا، كو ب ڕۆژ بۆ پەرستنا خودێ و ب شەڤ ژی چالاكیێن ئەدەبی بهێنە ئەنجامدان.. ب شێوەیەكێ گشتی شەڤبێركێن ڕەوشەنبیری ل دەڤەردارییا سێمێلێ كو تایبەتن ب ئەدەبییات و زیندیكرنا كەلتورێ كوردی ڤە.
ڕێڤەبەرییا ڕەوشەنبیری و هونەری شیایە دەڤەردارییا سێمێلێ بكەتە ناڤەندەكا ئەدەبی دناڤبەرا دهۆك و زاخۆ دا، و رەنگە گەلەك خواست ژبۆ پشكداربوونێ هەبوویە دپەنەلێن ڤان شەڤبێركاندا. بەلێ وەكو پێتڤی ڕێڤەبەریا ڕەوشەنبیری شیایە خزمەتا هەمییان بكەت بێ جوداهی، هەر ژ دەستپێكا رەمەزانێ بۆ خۆ بەرهەڤكرنێ ب بەرنامە و پلان و كۆمبوونێن بەرفرهـ دهێنە رێكخستن ژ ئالیێ ڕێڤەبەریا ڕەوشەنبیری و هونەری ل سمێیلێ دگەل نڤیسكارێن دەڤەرێ. لگۆری پرۆگرامێ شەڤانە یێ شەڤبێركێن ڕەوشەنبیری ل سەر دو بڕگەیان هاتیە دابەشكرن، ئەو ژی: بڕگەیا ئێكێ؛ پێشكێشكرنا سمینارێن هەمەجۆر كو هەمی ژانرێن ئەدەبی و هونەری بخوەڤەدگریت. بڕگەیا دووێ: خواندنا هەلبەستان، لێ جودا ژ سالێن دیتر، د ئەڤ رەمەزانێ دا پتر فوكس مە ئیخستنە سەروان بابەتێن نە هاتینە ئازراندن مینا (موزیك فەلسە فە) و بابەتێن دی یێن ئەدەبی ب گشتی. دهەر شەڤەكێ دا دو پانێل دهاتنە رێكخستن، هەتا نوكە (٨) رونیشتن هاتینە ئەنجامدان و د بەردەوامێن تا شەڤێن (قەدر)ی.
پێدڤییە ئاماژێ ب هندی بدەم كو پشتەڤانێ هەرە سەرەكی دگەل مەدا رێزدار ( د.عەلی تەتەر) پارێزگارێ دهۆكێ بوویە، و سوپاسیێن بێ پایان بۆ هەمی دەزگەهێن راگەهاندنێ كو دگەل مەدانە ژبۆ رۆمالكرن و گرنگیپێدانێ ب بەردەوامی تا نوكە.
هەژی گۆتنێ یە، دڤی بەرنامێ شەڤبیركێن ڕەوشەنبیری دا، ژ ئالیێ ڕێڤەبەریا ڕەوشەنبیری و هونەری وەكو نەریتەكێ سالانە خەلاتی (مەدالیا زێری) دهێتە پێشكێشكرن بو كەسایەتییەكێ دیار و ژێگرتی كو ب دەستێ نڤیسینێ خزمەتا كەلتۆر و ئەدەبێ كوردی ب تایبەت و یا جڤاكی كربیت.
ل شەڤا 17 لسەر 18 ئادارێ كو دبیت (روینشتنا هەشتێ)، دو پانێل هاتینە ئەنجامدان، پانێلێ ئێكێ (د. فاخر حەسەن گۆلی) لدۆر (دیرۆكا نڤیسینێ ل بەهدینان ) پەیڤی، بەحس ل هندێ كر هەر ژ دەستپێكا نڤیسین و گرنگییا دیرۆكا كەڤنار ل بەهدینان، پانێلێ دووێ: نڤیسەرو ڤەكۆلەر (داود مراد خەتاری) بەحسێ سەربۆرا خوە یا نڤیسینێ كر كو ئەو خودانێ زێدەتر ژ (٥٠) بەرهەمێن چاپكرینە و (٢٠) پەرتووكێن نەچاپكرینە د بۆارێن جودا جودا دا، و ب سەدان دیدار و ڤەكۆلێن دەربارەی دەردەسەریێن برایێن ئێزدی ئەنجامداینە و شیایە جینۆسایدا ئێزدییان بگەهینیتە مەحفەلێن جیهانێ، ژبەر ڤی دەستێ پیرۆزێ نڤیسینێ هاتە خەلاتكرن ژ ئالیێ ڕێڤەبەرییا ڕەوشەنبیری و هونەری ل دەڤەردارییا سێمێلێ ب بەخشینا خەلاتێ (مەدالییا زێری).
*بەرپرسێ بەشێ چالاكی و ڕاگەهاندنێ ل ڕێڤەبەریا ڕەوشەنبیری و هونەری/ سێمێل.
