شەڤ یەلدا
زوھێر کورەمارکی
گۆتی: شەڤ یەلدایە.
من گۆتێ: دحزوورا تەدا چ شەڤ یەلدا نینن.
دەم، گاڤ و لەحزەنە مینا ھڕ و بایە
نە خەمێن من دڤەڕەڤینن
نە لێڤێن من دگڕنژینن
نەبرینێن من دکەویێن
نەچاڤ ژدیتنێ دحەویێن
خەم ل سەر ھەڤ بوونە چین چین!
ب سەر خوارنا خەما بکوتەکی ئەزێ دژین،
حەیران نە تە دانە من..
ھەرمێ وقەیسی و مێویژ و بادەم و باھیڤ
نەژی دەیجۆڕا من تە کرە رۆناھی و ھەیڤ
لەوما دشەڤێن تەدا ھەرێ برسیمە و بێ شیڤ،
نە ژ دیتنا تە تێر بووم
نە ژ ھەمبێزێن تە تەڕ و شل بووم
ناخێ من ھەر سەقەم و سەڕمایە
پا چەوا ئەڤ شەڤە، شەڤ یەلدایە؟
سینگێ من ھێشتا ھێلینا خەمایە
ئاگر و ئاگردانکێ گوڕی و پەلایە
نە تە ڤەڕەڤاندن نە تە ئاڤەک پێداکر
نەتە ل دستارکرن ھێڕان نەتە دانە بایە!
ڤێجا كابێژە چەوا شەڤ یەلدایە؟
دلێ من ل سەر تەختێ خەما
ھێشتا پاشایە
ھێشتا شەڤەکی دھێلینا خۆدا،
ئارام نەڕازایە… نەڕازایە!
