عابد دهۆكی: ستران و فولكلۆرێ قەرەچان دێ ژ یێ كوردی جودا كەم
شاكر ئەتروشی:
سترانبێژ (عابد دهۆكی) د دیدارەكێ دا بۆ رۆژنامەیا ئەڤرۆ گۆت: ئەڤە دەمەكە ئەز یێ خوە بەرهەڤ دكەم بۆ ئامادەكرنا پەرتووكەكێ ل دۆر ژین و ژیار و فۆلكلۆر و ستران و دیرۆك و هونەر و دەست رەنگینیا قەرەچان و گەلەك راستی و نهێنێ هەنە بۆ جارا ئێكێ دێ ب بەلگەڤە ئاشكراكەم.
هەروەسا گۆت: گەلەك ستران هەنە د بنەرەت دا یێن قەرەچانە دێ دیاركەم كا كێ و كەنگی ئەڤ سترانە گۆتینە و ب دەنگێ كێ هاتینە دزین و هیڤی كەس خوە عاحز نەكەت، چنكو ئەڤە راستینە و دڤێت بهێنە ئاشكراكرن و دێ بزاڤێ كەم د سالا بهێت دا ئەو پەرتووك بكەڤیتە بەردەستێن خواندەڤانان و هەر ستران و تشتەكێ د پەرتووكێ دا بهێتە بەلاڤكرن دێ بەلگە هێنە بەلاڤكرن، ئانكو ئەز چو تشتان ژ دەف خوە تابێژم و بێ بەلگە نا ئاخڤم، هەروەسا دێ ل سەر مۆزیكا فەرەچان ئاخڤین كا چ ئامیرە دهاتنە ژەنین و دێ ب بەلگە دیاركەم كو بەری (500) سالان قەرەچان راپێن گۆتن، بۆ نموونە ل شەڕێ دمدم، هەروەسا هونەرمەند حەسەن عەلی خەنجەر و محەمەد پیرۆ و بابێ كنێ و ئیبراهیم جومعە و من ب خوە ژی راپێن گۆتین و گەلەك سترانێن قەرەچان، هەروەسا یێن دەروێشان ژی كو ب دەفێ هاتینە گۆتن و نوكە خەلكەك دبێژن و پێ بەرنیاس بووینە و ئەڤ سترانە د بنەرەت دا یێن قەرەچانە و ئەوێن نوكە دبێژن ژخوە ناگرن بێژن من ئەڤ سترانە یێ ژ قەرەچان وەرگرتین و ئەز دێ ب بەلگەڤە وان سترانان بەلاڤكەم.
