عه‌ره‌بستانا سعوودیێ به‌رێ خوه ددەتە سووریێ
پشتی سه‌ره‌دانا فه‌یسه‌ل بن فه‌رحان وه‌زیرێ ده‌رڤه یێ سعوودیێ بۆ لوبنانێ و سووریێ رۆژنامه‌یا ئه‌لعه‌ره‌ب کو ناڤه‌ندا وێ ل بریتانیا یه، د راپۆرته‌کێ دا راگه‌هاند کو عه‌ره‌بستانا سعوودیێ ناخوازیت مه‌یدانا سووریێ بۆ تورکیا و قه‌ته‌رێ بهێلیت و بۆ ڤێ چه‌ندێ هه‌ول دده‌ت په‌یوه‌ندیێن سیاسی و ئابووری یێن ل گەل سووریێ باشتر لێ بکەت، عەرەبستانێ دڤێت پێگەهێ خوە ل سووریێ بهێز بکەت.
هەمان رۆژنامێ ئەو یەک ژی دیار کریە، عەرەبستانێ دەست ب قۆناغەکا نوو ل گەل دەستهەلاتا بەروەخت یا سووریێ کریە و دەستهەلاتا نها یا سووریێ ژی پێشوازیێ ل بزاڤێن عەرەبستانێ دکەت و دهێتە چاڤەرێکرن د دەمەکێ نێزیک دا چەندین رێککەفتنێن ئابووری د ناڤبەرا عەرەبستانێ و سووریێ دا بهێنە ئیمزا کرن.
چاڤدێرێن سیاسی ژی دیار دکەن، عەرەبستانێ دڤێت سووریێ ڤەگەریتە ڤە ناڤ کۆمکارا عەرەبی و هەروەسا سعوودیێ نەڤێت سووریێ بۆ تورکیا بهێلیت و بەرپرسێن نها یێن سووریێ ژی گەلەک دخوازن پەیوەندیێن خوە ل گەل عەرەبستانێ و وەلاتێن دی یێن عەرەبێ بهێز بکەن.
